कावासोती । जिल्ला प्रहरी कार्यालय नवलपरासी (बर्दघाट सुस्ता पूर्व) को आयोजनामा कावासोती नगरपालिका–३ स्थित वडा कार्यालयको सभाहलमा चोरी नियन्त्रण तथा सुरक्षा सचेतनासम्बन्धी प्रशिक्षण कार्यक्रम सम्पन्न भएको छ ।
विभिन्न क्षेत्रसँग सम्बन्धित व्यक्तिहरूको सहभागिता रहेको कार्यक्रममा प्रहरी निरीक्षक मुरारी प्रसाद गुप्ताले चोरी नियन्त्रणका लागि अपनाउनुपर्ने प्रभावकारी उपाय, आवश्यक सुरक्षा सतर्कता तथा समुदायको भूमिकाबारे जानकारी दिएका थिए ।
प्रशिक्षणका क्रममा प्रहरी निरीक्षक गुप्ताले चोरीका घटना न्यूनीकरण गर्न प्रहरीको प्रयास मात्र पर्याप्त नहुने उल्लेख गर्दै प्रहरी–जनता साझेदारी (Police–Public Partnership) लाई अझ प्रभावकारी बनाउनुपर्नेमा जोड दिए । समुदायको सक्रिय सहभागिता, समयमै सूचना आदान–प्रदान तथा पारस्परिक सहकार्यबाट चोरी नियन्त्रणलाई थप प्रभावकारी बनाउन सकिने उनले बताए ।
उनले शंकास्पद गतिविधिबारे तत्काल प्रहरीलाई जानकारी गराउन, घर तथा व्यवसायिक प्रतिष्ठानको सुरक्षा व्यवस्थालाई सुदृढ बनाउन र स्थानीय स्तरमा सुरक्षा सचेतना बढाउन सहभागीहरूलाई आग्रह गरेका थिए ।
समुदायमा सुरक्षा सचेतना अभिवृद्धि गर्दै प्रहरी र नागरिकबीचको विश्वास तथा सहकार्यलाई थप सुदृढ बनाउने उद्देश्यका साथ उक्त प्रशिक्षण कार्यक्रम आयोजना गरिएको आयोजकले जनाएको छ ।
