वीरगंज । भूमिगत जलश्रोत तथा सिंचाई विकास डिभिजन कार्यालय, सर्लाहीका डिभिजन प्रमुख सि.डि.हा.जी. अनुपमा ढकाल र मेकानिकल अधिकृत तुलाकान्त चौधरी ७ लाख ५० हजार रुपैयाँ घुससहित अख्तियार दुरुपयोग अनुसन्धान आयोगको नियन्त्रणमा परेका छन् ।
अख्तियारले शुक्रबार जारी गरेको प्रेस विज्ञप्तिअनुसार बोरिङ र मोटर जडानको कार्य सम्पन्न भएपछि भुक्तानी प्रक्रिया अघि बढाउने क्रममा सेवाग्राहीसँग अनावश्यक दुःख–हैरानी दिँदै घुस मागिएको भन्ने सूचना तथा उजुरीका आधारमा अनुसन्धान गरिएको थियो ।
अख्तियार दुरुपयोग अनुसन्धान आयोगको कार्यालय, बर्दिवासबाट खटिएको टोलीले दुवै कर्मचारीलाई सेवाग्राहीबाट ७ लाख ५० हजार रुपैयाँ घुस लिइसकेको अवस्थामा पक्राउ गरेको जनाएको छ ।
उनीहरूलाई जिल्ला सर्लाहीको बागमती नगरपालिका–१२ स्थित भूमिगत जलश्रोत तथा सिंचाई विकास डिभिजन कार्यालयका कार्यालय प्रमुखको सरकारी क्वार्टरबाट नियन्त्रणमा लिइएको हो । पक्राउका क्रममा घुस रकमसँगै स्रोत नखुलेको ७१ हजार ११५ रुपैयाँ नगद तथा तीन थान मोबाइलसमेत बरामद गरिएको अख्तियारले जनाएको छ ।
घटनाबारे थप अनुसन्धान भइरहेको अख्तियार दुरुपयाेग अनुसन्धान आयाेगका प्रवक्ता सुरेश न्यौपानेले जानकारी दिए ।
