वीरगंज । नेपाल पत्रकार महासंघ जिल्ला शाखा पर्साले वीरगंजबाट प्रसारण हुने ‘माई टिभी’ लाई जिल्ला प्रहरी कार्यालय पर्साले पत्र काटेको घटनाप्रति गम्भीर ध्यानाकर्षण भएको जनाएको छ ।
महासंघका सचिव विजय चौहानद्वारा जारी प्रेस विज्ञप्तिमा वीरगंज महानगरपालिका वडा नं. ३१ को सिफारिसका आधारमा एक महिलाको नागरिकताबाट पतिको नाम हटाइएको विषयमा प्रसारित समाचारलाई लिएर वडा अध्यक्षले जिल्ला प्रशासन कार्यालय पर्सामा उजुरी दिएपछि प्रहरीले ‘माई टिभी’ लाई प्रसारित सामग्रीबारे तथ्य पेश गर्न पत्र पठाएको उल्लेख गरिएको छ ।
महासंघले कुनै समाचारप्रति असहमति वा गुनासो भएमा सम्बन्धित सञ्चारमाध्यममा खण्डन, स्पष्टीकरण वा प्रतिक्रिया पठाउने तथा त्यसबाट पनि चित्त नबुझे प्रेस काउन्सिल नेपालमा उजुरी दिएर कानुनी उपचार खोज्ने स्पष्ट व्यवस्था रहेको स्मरण गराएको छ ।
विज्ञप्तिमा सञ्चारसम्बन्धी विवादमा कानुनले तोकेको प्रक्रिया र अधिकारप्राप्त निकायलाई बेवास्ता गर्दै स्थानीय प्रशासनमार्फत उजुरी गरिनु र सोही आधारमा प्रहरीले सञ्चारमाध्यमलाई पत्र काट्नु विधिसम्मत अभ्याससँग मेल नखाने उल्लेख गरिएको छ । यस्तो कार्यले सञ्चारमाध्यममाथि अनावश्यक दबाब सिर्जना गर्ने, स्वतन्त्र पत्रकारितालाई निरुत्साहित गर्ने तथा प्रेस स्वतन्त्रतामाथि प्रत्यक्ष वा अप्रत्यक्ष हस्तक्षेप गर्ने मनसाय देखिएको महासंघको ठहर छ ।
महासंघले समाचारप्रति असहमति राख्ने सबै पक्षलाई कानुनले निर्दिष्ट गरेको प्रक्रिया र अधिकारप्राप्त निकायमार्फत मात्रै कानुनी उपचार खोज्न आग्रह गर्दै संविधान, प्रचलित कानुन तथा लोकतान्त्रिक अभ्यासको सम्मान गर्न सम्बन्धित पक्षको ध्यानाकर्षण गराएको छ ।
साथै, प्रेस स्वतन्त्रतालाई कुण्ठित गर्ने यस्ता गतिविधि निरन्तर दोहोरिए नेपाल पत्रकार महासंघ पर्सा स्वतन्त्र प्रेसको रक्षा, पत्रकारको पेशागत अधिकारको संरक्षण तथा संविधानप्रदत्त प्रेस स्वतन्त्रताको सुनिश्चितताका लागि संघर्षमा उत्रिन बाध्य हुने चेतावनी पनि विज्ञप्तिमार्फत दिएको छ ।
