Date
मङ्ल, मंसिर १, २०८३
Tue, November 17, 2026
Home Blog Page 558

सडक मर्मतकाे काम सुरु भएपछि महानगरले हटायाे फाेहर

0

वीरगंज । वीरगंज महानगरपालिकाले मंगलबार फोहोर लगेर कार्यालयमै थुपारि दिएपछि दबाबमा आएको नेपाल टेलिकमले खनेर अलपत्र छाडिएका सडक र फुटपाथ बुधबार देखि मर्मत गर्न शुरु गरेको छ ।

वीरगंजकाे बाइपास सडकमा अप्टिकल फाइबर तार बिछयाउने क्रममा टेलिकमले कालोपत्रे सडक र फुटपाथ खनेर महिनौंदेखि अलपत्र छाडेको आक्रोशमा मंगलबार बिहान महानगरपालिकाले शहरबाट संकलित ७ ट्याक्टर फाेहोर श्रीपुरस्थित टेलिकमको प्रादेशीक निर्देशनालय कार्यालय परिसर भित्रै लगेर फालि दिएको थियो ।

महानगरको उक्त कदमपछि दबाबमा परेको टेलिकमले खनेर छाडिएका सडक र फुटपाथ बुधबार बिहानै देखि मर्मत गर्न थालेको वीरगंजका मेयर राजेशमान सिंहले बताए । मंगलबार बिहान टेलिकम परिसरमा महानगरले फोहोर थुपारेर सांकेतिक विरोध जनाएपछि मंगलबार नै बेलुकी टेलिक प्रादेशीक कार्यालयका प्रमुख अनन्त प्रकाश मल्ल्किले महानगरको कार्यालयमै पुगेर सडक र फुटपाथको बाँकी रहेको मर्मत कार्य चैत २७ भित्रै पुरा गर्ने लिखित प्रतिबद्धता जनाएका थिए ।

मल्लिका अनुसार, बाइपास सडकखण्ड अन्तर्गत गण्डक चोकदेखि रजतजयन्ति चोकसम्मको क्षेत्रमा ३ सय मिटरको मात्रै फुटपाथ मर्मत गर्न बाँकी रहेको छ । उक्त कार्य चैत २७ भित्र सक्ने गरि मर्मतको ठेक्का सकारेको पाइनस/बनके जेभी कन्ट्रक्सनले लिखित रुपमा प्रतिबद्धता जनाएको जानकारी पनि मल्लिकले महानगरपालिकाको कार्यालयलाई गराएका छन् ।

त्यहि प्रतिबद्धता अनुसार रोकिएको मर्मत कार्य बुधबार बिहानैदेखि सुरु पनि गरिसकिएको मल्लिकले बताए ।

टेलिकमले सडक र फुटपाथ मर्मतको काम सुरुगरेपछि टेलिकम परिसरभित्र थुपारेको फोहोर पनि महानगरले बुधबार बिहानै देखि हटाएको मेयर सिंहका स्वकीय सचिव सत्यराज घिमिरेले जानकारी दिए ।

टेलिकमले अप्टिकल फाइबार ओछ्याउने क्रममा बाइपास सडकखण्डको कालोपत्रे सडक र फुटपाथ खनेर महिनौंदेखि अलपत्र छाडेको थियो । खनिएका सडक र फुटपाथ मर्मतका लागि पटक पटक आग्रह गर्दा पनि अटेरी गरेपछि बाध्य भएर मंगलबार बिहान टेलिकम परिसरमा कचरा सहितको फोहोर फाल्नु परेको घिमिरेले बताए ।

घिमिरेका अनुसार , गत फागुन ३ गते प्रमुख जिल्ला अधिकारीकै उपस्थितीमा बसेको सरोकारवाला निकायहरुको बैठकमा टेलिकमले खनिएका सडक र फुटपाथ फागुन मसान्त भित्रै मर्मत गरिसक्ने लिखित सहमति गरेको थियो । उक्त सहमति कार्यान्वयनका लागि महानगरपालिकाले टेलिकमलाई पटक पटक आग्रह गर्दै आएपनि टेलिकमले अटेरी गर्दै आएकाे थियाे।

बृहत्तर जनकपुर क्षेत्र विकास परिषद्का पूर्व अध्यक्षसहित पाँचजना भ्रष्टाचारी ठहर

0

धनुषा । वृहत्तर जनकपुर क्षेत्र विकास परिषद्का पूर्वअध्यक्ष, कार्यकारी निर्देशकसहित पाँच जनालाई विशेष अदालतले भ्रष्टाचारी ठहर गरेको छ । विशेष अदालतले परिषद्का पूर्वअध्यक्ष दीगम्बर राय, कार्यकारी निर्देशक सूर्यदेव साह र राजेशकुमार साह, नायब सुब्बा उषा मिश्रा तथा लेखापाल उत्तमराज शर्मा ढकाललाई भ्रष्टाचारी ठहर गरेको हो ।

विशेष अदालतका न्यायाधीशद्वय शालिग्राम कोइराला र बलभद्र बाँस्तोलाको इजलासले पाँच जनालाई भारत सरकारको सहयोगमा आठवटा परियोजना ठेक्का लागेकोमा पाँचवटा परियोजनामा अनियमितता भएको भन्दै भ्रष्टाचारी ठहर गर्ने फैसला गरेको हो ।

विभिन्न परियोजनाको ठेक्का लगाउने क्रममा अनियमितता भएको पाइएपछि अख्तियार दुरुपयोग अनुसन्धान आयोगले १० जनालाई विपक्षी बनाएर २०७५ कात्तिक १५ गते मुद्दा दायर गरेको थियो । दश जनामध्ये पाँच जनालाई विशेष अदालतले सफाइ दिएको छ भने पाँचलाई दोषी ठहर गरेको छ । परिषद्बाट गठित बोलपत्र मूल्याङ्कन समितिले विभिन्न मितिमा मूल्याङ्कन गर्दा लागत अनुमान अङ्कमा बदनियतपूर्वक विभिन्न परियोजनामा मूल्याङ्कन सिफारिस गरेको विशेष अदालतको ठहर छ । अनुमान अङ्कभन्दा ३० प्रतिशतभन्दा धेरै घटेको भन्दै बोलपत्र अमान्य भएको देखाउँदै केही बोलपत्रलाई मूल्याङ्कन प्रक्रियामा समावेश नै नगराइएको भेटिएको छ ।

यसरी लापरबाहीपूर्वक मूल्याङ्कन र बोलपत्र स्वीकृत गर्दा परिषद्लाई रु ६२ लाख ८८ हजारभन्दा बढीको घाटा भएको भन्दै अख्तियारले मुद्दा दर्ता गरेको थियो । साथै, निर्माण कार्यका विभिन्न वस्तुमा ठेक्का सम्झौता भएकोमा इकाइ दरमा घटबढ हुने गरी भिन्न स्वीकृत गरेको भेटिएको थियो ।

यसले परिषद्लाई थप नौ लाख ८५ हजार र अर्को ठेक्कामा तीन लाख ५४ हजारको अनियमितता भएको दाबी अख्तियारले गरेको थियो । अख्तियारले कूल रु ७६ लाख २८ हजारभन्दा बढी रकम बिगो माग दाबी गर्दै मुद्दा दायर गरेको थियो । दोषी ठहर भएका पाँचैजनाको चैत २८ गते सजाय निर्धारण हुने बताइएको छ । रासस

अधिकार यात्रा सफल बनाउन अभिमुखिकरण

0

वीरगंज । मुक्त हरवा चरवाहरुको पुनरस्थापनाको लागि दबाव स्वरुप चैत २५ गते देखि वीरगंज र राजबिराजबाट शुरु हुने अधिकार यात्रालाई सफल बनाउन हरवा चरवा अधिकार मंचले आफ्नो गतिविधि तिब्र बनाएको छ ।

जनसहभागिता जुटाई यात्रालाई प्रभावकारी बनाउने उदेश्यले हरवा चरवा युवा एकटिभिसटहरुलाइ परामर्श एवं अभिमुखिकरण कार्यक्रम महोत्तरीको बर्दिबासमा सम्पन्न भएको छ । रास्ट्रिय दलित नेटवोर्कको आयोजना, हारवा चरवा अधिकार मंचको संयोजन र फ्रिडम फन्डको सहयोगमा कार्यक्रम सम्पन्न भएकाे हाे ।

मंचका महासचीव लागेन्द्र सदाको अध्यक्षतामा आयोजित परामर्श एवं अभिमुखिकरण कार्यकमा अगामी हुने अधिकार यात्राको बिस्तृत कार्ययोजनाको बारेमा छ्लफल भएको जन वकालत अधिकृत रुपनरायन पासवानले जानकारी दिए ।

कार्यक्रममा रास्ट्रिय दलित नेटवोर्कका कोषाध्यक्ष जंगबहादुर सुनारले यात्रा अवधीमा हुने शुभारम्भ र कोणसभाहरुमा स्थानिय तहका जनप्रतिनिधिहरुसंग अत्याधिक समन्वय र सहकार्य गर्न निर्देश दिए ।

अभिमुखिकरणमा राष्ट्रिय दलित नेटवोर्कका कार्यकारी निर्देशक हुकुम सार्क, फाइनास अफिसर भरत आग्रि, राष्ट्रिय हरवा चरवा अधिकार मंचका सह सचीव रामदयाल सदा लगायतले मन्तव्य ब्यक्त गरेका थिए ।

सडक विगारेकाे भन्दै टेलिकम कार्यालयमा महानगरले फाल्यो फोहोर

0

वीरगंज । फाइबर विच्छ्याउँदा कालोपत्रे सडक र फुटपाथ खनेर महिनौंँदेखि अलपत्र छाडेको आरोप लगाउँदै वीरगंज महानगरपालिकाले वीरगंजस्थित नेपाल टेलिकम कार्यालय हाताभित्र फोहर थुपारेर विरोध जनाएको छ ।

टेलिकमले कालोपत्रे सडक र फुटपाथ खनेर सडक विगार्दा नगरवासीले पीडा भोग्नु परेपछि निर्माणका लागि पटकपटकको आग्रहलाई अटेर गरेकाले श्रीपुरस्थित टेलिकमको प्रादेशिक निर्देशनालयकाे कार्यालय परिसरमा महानगरले साङ्केतिक विरोधस्वरुप फोहर थुपारेको हो ।

वीरगञ्जमा सञ्चालन भइरहेको सरसफाइ तथा स्वच्छता अभियानमा टेलिकमले भाँजो हालेको भन्दै महानगरपालिकाका कर्मचारी र नगर प्रहरीसहितको टोलीले सात ट्र्याक्टर फोहर टेलिकमको परिसरभित्र लगेर फालेको जनाइएको छ ।

टेलिकमले अप्टिकल फाइबार विच्छ्याउने क्रममा बाइपास सडकखण्डको करिब पाँच किलोमिटर कालोपत्र सडक र फुटपाथ खनेर महिनौँदेखि अलपत्र छाडेको र पटकपटक सडक मर्मत गर्न आग्रह गर्दा पनि अटेर गरेपछि बाध्य भएर टेलिकम परिसरमा फोहर फाल्नुपरेको महानगरप्रमुख राजेशमान सिंहले बताए ।

कार्यालयमै फोहर फालेपछि खनेर अलपत्र छाडिएका सडक र फुटपाथ मर्मतका लागि अब टेलिकमलाई दबाब पर्ने उनकाे भनाई छ । गत फागुन ३ गते प्रमुख जिल्ला अधिकारीकै उपस्थितिमा बसेको सरोकारवाला निकायको बैठकमा टेलिकमले खनिएका सडक र फुटपाथ फागुन मसान्तभित्रै मर्मत गरिसक्ने लिखित सहमति जनाएकामा हालसम्म पनि सहमति कार्यान्वयन नगरेकाले यस्तो गरिएको महानगरप्रमुख सिंहले बताए ।

टेलिकम कार्यालयद्वारा कारवाहीकाे माग

यसैबिच फाेहाेर फाल्नेहरु विरुद्ध कारवाहीकाे माग गर्दै टेलिकमकाे प्रादेशिक निर्देशनालयकाे कार्यालय वीरगंजले पर्साका प्रमुख जिल्ला अधिकारी हिरा रेग्मीलाई ज्ञापन पत्र बुझाएकाे छ । आवश्यक कारवाही सम्बन्धमा । 

टेलिकमका कर्मचारीहरुमा डरत्रासको वातावरण सिर्जना भएकोले आवश्यक शान्ति सुरक्षाको व्यवस्था गर्दै अमर्यादित र अमानवीय कार्य गर्ने पक्षहरुलाई कानून बमोजिम कारवाही गरी कार्यालयको काम गर्ने वातावरण सहज बनाईदिनहुन अनुरोध गरिएकाे टेलिकमकाे प्रादेशिक निर्देशनालयका प्रमुख अनन्त प्रकाश मल्लिकले वताए ।

साे ज्ञापन पत्र मधेश प्रदेश सरकार, मुख्यमन्त्री तथा मन्त्रीपरिषद्‌को कार्यालय, जनकपुरधाम, नेपाल टेलिकम, प्रबन्ध निर्देशककाे कार्यालय, केन्द्रिय काठमाण्डौ, नेपाल टेलिकम प्रमुख संचालन अधिकृतकाे कार्या प्लाजा, काठमाण्डौ, बीरगंज महानगरपालिकाको कार्यालय तथा नगर प्रमुख र जिल्ला प्रहरी कार्यालय, पर्सालाई समेत बाेद्धार्थ गरिएकाे छ ।

जगरनाथपुरकाे ८ औं गाउँ सभा सम्पन्न

0

वीरगंज । पर्साकाे जगरनाथपुर गाउँपालिकाकाे ८ औं गाउँ सभा सम्पन्न भएकाे छ । गाउँपालिका अध्यक्ष श्रीकान्त प्रसाद यादवकाे अध्यक्षतामा सम्पन्न गाउँ सभाले आर्थिक बर्ष २०७९/०८० काे लागि केही याेजनाहरु संशाेधन गरेकाे हाे ।

गाउँ कार्यपालिकाकाे कार्यालय जगरनाथपुरमा भएकाे गाउँ सभाले केही याेजनाहरु संशाेधन गर्नुकाे साथै केही ऐन समेत सर्वसहमत  पारित गरेकाे प्रमुख प्रशासकिय अधिकृत कृष्णनन्दन रायले जानकारी दिए ।

गाउँ सभालाई सम्बाेधन गर्दै ‍गाउँपालिका अध्यक्ष यादवले अव विकास निर्माणकाे कामलाई गति दिनु पर्ने वताए । उनले चालु आर्थिक मसान्त सक्न अब मात्र ३ महिना मात्र बाकी रहेकाेले आ आफ्नाे ठाउँबाट विकास निर्माणकाे काममा जुटन जनप्रतिनिधि तथा कर्मचारीहरुलाई आग्रह गरे ।

गाउँ सभामा उपाध्यक्ष बबिता सिंह, वडाध्यक्षहरु लक्ष्मी साह तेली, नेपाली कुशवाहा, सुबाष यादव, प्रभु नाथ प्रसाद नुनिया, बिहारी महताे नुनिया, अयाेध्या प्रसाद पटेल लगायतका गाउँ सभा सदस्यहरुकाे उपस्थिती रहेकाे थियाे ।

जनकपुरधाममा हिन्दू मुस्लिम धर्मावलम्बीको संयुक्त सद्भाव ¥याली

0

जनकपुरधाम । यही चैत १६ गते रामनवमीका दिन हिन्दू युवाहरूले निकालेको शोभा यात्रा मुस्लिम धर्मावलम्बीको मस्जिद नजिक पुग्दा भएको विवादपछि बढेको अविश्वास र नागरिकमा देखिएको सद्भाव भड्किने त्रासलाई सामान्यीकरण गर्न हिन्दू मुस्लिम धर्मावलम्बीले आज जनकपुरधाममा संयुक्त सद्भाव ¥याली निकालेका छन् ।

जिल्ला प्रशासन कार्यालय धनुषा र जनकपुरधाम उपमहानगरपालिकाको अगुवाइमा दुवै धर्मका अगुवा तथा सरोकारवालाको सहभागितामा सद्भाव ¥याली निकालिएको हो । ¥याली जानकी मन्दिर प्राङ्गणबाट सुरु भई राम मन्दिर, महावीर चोक, पेठिया बजार, जनकपुरधाम–५ स्थित मस्जिद हुँदै पुनः जानकी मन्दिरको प्राङ्गणमा पुगेर सभामा परिणत भएको थियो । सो सभामा दुवै पक्षले सामाजिक सद्भाव कायम गर्न आफूहरू प्रतिबद्ध रहेको भन्दै नागरिकलाई आश्वस्त पारेको थियो ।

हिन्दू धर्मावलम्बीका तर्फबाट सम्बोधन गर्नुभएका जानकी मन्दिरका महन्थ रामतपेश्वर दासले सद्भाव ¥यालीले दुवै धर्ममा आस्था राख्ने नागरिक तहमा बढेको अविश्वासलाई मत्थर गर्न महत्त्वपूर्ण भूमिका खेल्ने विश्वास व्यक्त गर्नुभयो । उहाँले विश्व प्रसिद्ध जानकी माताको जन्मस्थल जनकपुरधाममा सामान्य विवाद भए पनि दुवै धर्मावलम्बी आपसी मेलमिलाप र छलफलको माध्यमबाट सद्भाव कायम गर्न प्रतिबद्ध रहेको सन्देश देश विदेशमा प्रवाहित गर्न जरुरी रहेको धारणा राख्नुभयो ।

“एक ठाउँमा बस्दा सामान्य विवाद हुनसक्छ, त्यसको समाधान पनि मिलेरै गर्ने हो । हामी दुवै पक्षले युगौँदेखि कायम रहेको भाइचारा, सामाजिक सद्भाव र धार्मिक सहिष्णुतालाई बल पुग्ने गरी प्रतिबद्ध हुन जरुरी छ । म ईश्वर, अल्लाह वा भगवान्समक्ष दुवै धर्मका अनुयायीहरूलाई त्यही सद्बुद्धि दिनका लागि प्रार्थना गर्दछु”, महन्थ दासले भन्नुभयो । मुस्लिम धर्मावलम्बीका तर्फबाट सम्बोधन गर्नुभएका अगुवा मोहम्मद अस्गर अलीले दुवै पक्षले कुनै पनि बहानामा वर्षौंदेखि कायम सद्भावलाई खल्बल्याउने गरी गतिविधि गर्न नहुने धारणा राख्नुभयो । उहाँले आफूह सामाजिक सद्भाव कायम गर्न सधैँ तयार रहेको भन्दै धर्मको अनुशासनमा रहेर आफ्ना धार्मिक कर्म गर्न सबैलाई आग्रह गर्नुभयो ।

त्यसैगरी जनकपुरधाम उपमहानगरपालिकाका प्रमुख मनोजकुमार साहले राम नवमीका दिन भएको विवाद र पछि त्यसलाई मलजल गर्ने पक्षले सामाजिक सञ्जालबाटै आम माफी मागिसकेकाले आगामी दिनमा कुनै असामाजिक काम नहुनेमा आफू आशावादी रहेको बताउनुभयो । आपसी विवाद र असमझदारीले दुवै धर्म तथा जनकपुरधाम क्षेत्रको परम्परा, मूल्य मान्यता र प्रतिष्ठामा गम्भीर असर पु¥याउने भन्दै नगरप्रमुख साहले सामाजिक सद्भाव कायम गर्न दुवै पक्ष इमान्दारीपूर्वक प्रस्तुत हुनुपर्ने धारणा राख्नुभयो ।

“आजको सद्भाव ¥यालीले जनकपुरका नागरिकमा मात्रै होइन, यो सन्देश पुग्ने सबै ठाउँमा सामाजिक सद्भावका लागि प्रेरणा मिल्नेछ । यसलाई जोगाइराख्न दुवै पक्षलाई म विशेष अनुरोध गर्न चाहन्छ”, नगरप्रमुख साहको भनाइ छ । त्यसैगरी धनुषाका प्रमुख जिल्ला अधिकारी काशिराज दाहालले ऐतिहासिक जनकपुर क्षेत्रमा हुने राम्रा र नराम्रा दुवै क्रियाकलापले क्षणभरमै नेपालका अरु भूभाग तथा विश्वमा प्रभाव पार्ने भएकाले नराम्रा क्रियाकलाप नगर्न दुवै पक्षलाई सचेत गराउनुभयो । उहाँले सानो गल्तीले ठूलो क्षति र अविश्वास उत्पन्न हुनेतर्फ सचेत रहँदै आगामी दिनमा धर्मको अनुशासन र कानूनको अधीनमा रही आफ्ना सार्वजनिक क्रियाकलाप गर्न दुवै पक्षलाई आग्रह गर्नुभयो । “जनकपुर विश्व प्रसिद्ध एक ऐतिहासिक ठाउँ हो । यसले विश्वलाई नै सामाजिक सद्भाव र सहिष्णुताका लागि सन्देश प्रवाह गर्न सक्छ तर हाम्रो सामान्य त्रुटिबाट हुने गलत कार्यले एकै पटक ठूलो सङ्ख्यामा नराम्रो सन्देश पनि प्रवाह हुन्छ भन्ने विषयमा ध्यान दिनुपर्दछ”, उहाँले भन्नुभयो, “अब यहाँहरूले प्रहरी प्रशासनलाई जानकारी गराएर ठूला ¥याली तथा अन्य गतिविधि गरेमा गलत पक्षले खेल्ने मौका पाउँदैन । म त्यसका लागि यही सभामार्फत आग्रह गर्न चाहन्छु ।”

सद्भाव ¥यालीमा हिन्दू मुस्लिम समुदायका अगुवा र युवा तथा चार वटै सुरक्षा निकायका प्रमुख तथा प्रतिनिधिको उपस्थिति रहेको थियो । रासस

अनलाइन ठगी कारोबारमा संलग्न २३ पक्राउ

0

महेन्द्रनगर (धनुषा) । अनलाइन ठगी कारोबारमा सङ्लग्न रहेको आरोपमा धनुषा प्रहरीले २३ जनालाई पक्राउ गरेको छ । आज साँझ जिल्ला प्रहरी कार्यालय धनुषाको टोलीले उनीहरूलाई जनकपुरधामको पिडारी चोकस्थित बर्गर हाउस नजिकैबाट पक्राउ गरेको हो ।

पिडारी चोकमै एउटा फ्ल्याट भाडामा लिएर अनलाइन ठगीको कारोबार गर्दै आइरहेको सूचनाका आधारमा उनीहरूलाई पक्राउ गरिएको जिल्ला प्रहरी कार्यालय धनुषाका प्रहरी नायब उपरीक्षक वेदप्रसाद गौतमले बताउनुभयो । गौतमका अनुसार उनीहरूले विभिन्न एपमार्फत हनिट्र्याप जस्तो धन्दा गर्दै आएका थिए । पक्राउ पर्नेमा १४ पुरुष र नौ महिला रहेको जिल्ला प्रहरी कार्यालय धनुषाले जानकारी दिएको छ । पक्राउ परेकामाथि थप अनुसन्धान भइरहेको गौतमले बताउनुभयो । पर्सा पकहा मोहनपुर–५ का सत्यानन्द रामले यो गिरोहको नेतृत्व गर्दै आइरहेका थिए । धनुषाको सबैला घर भई जनकपुरमै रहँदै आएकी सञ्जु साहले अनलाइन ठगीको कारोबार सम्हाल्दै आएको प्रहरीले बताएको छ ।

यो गिरोहमा २० देखि ३० वर्ष उमेर समूहका युवायुवती रहेका छन् । आधाभन्दा बढी युवतीले सेवाग्राही खोज्ने र आफ्नो जालमा पार्नका लागि विभिन्न प्रलोभन दिने र पछि तस्बिर आदानप्रदानमार्फत नग्न फोटो भिडियो बनाएर ब्ल्याकमेल गर्दै रकम उठाउँदै आएको धनुषा प्रहरीले जानकारी दिएको छ । रासस

अर्थतन्त्रको समस्या समाधान गर्न निजी क्षेत्रको साथ आवश्यक : मन्त्री रिजाल

0

काठमाडौँ । उद्योग, वाणिज्य तथा आपूर्तिमन्त्री रमेश रिजालले मुलुकको अर्थतन्त्रको समस्या समाधान गर्न निजी क्षेत्रको साथ आवश्यक रहेको बताउनुभएको छ ।

नेपाल उद्योग परिसङ्घका पदाधिकारीहरूसँग आज भएको भेटमा उहाँले वर्तमान अर्थतन्त्रको समस्या समाधान गर्न निजी क्षेत्रको साथ आवश्यक रहेको बताउनुभएको हो । “म निजी क्षेत्रको साथमा छु, निजी क्षेत्रको समस्या समाधान गर्न पूर्णरूपमा लाग्नेछु”, मन्त्री रिजालले भन्नुभयो । मुलुकलाई समृद्ध बनाउन निजी क्षेत्रलाई प्रोत्साहन नगरी नहुने भन्दै उहाँले निजी क्षेत्रको समस्या समाधान गर्न प्रभावकारी रूपमा लाग्ने बताउनुभयो ।

भेटमा नेपाल उद्योग परिसङ्घका अध्यक्ष विष्णुकुमार अग्रवालले मन्त्री रिजाललाई उद्योगी व्यवसायीको मनोबल उकास्ने काम गर्न आग्रह गर्नुभयो । अध्यक्ष अग्रवालले मागमा आएको उच्च सङ्कुचन, उच्च ब्याजदर, लगानी योग्य पूँजीको अभावलगायतका कारणले उद्योगी व्यवसायीको मनोबल निकै खस्किएको र अर्थतन्त्र सुधारका लागि उद्योगी व्यवसायीको मनोबल बढाउन आवश्यक रहेको बताउनुभयो ।

उहाँले कुल गार्हस्थ्य उत्पादन (जीडीपी) मा उत्पादनमूलक उद्योगको योगदान निरन्तर घट्दो रहेको बताउँदै अर्थतन्त्रमा उत्पादनमूलक उद्योगको योगदान बढाउन वातावरण बनाउनुपर्ने उल्लेख गर्नुभयो । परिसङ्घले औद्योगीकरणले मात्रै दीगो विकास प्राप्त गर्न सक्ने र यसले पर्याप्त रोजगारीका अवसर सिर्जना गर्न सक्ने हुँदा नेपालको औद्योगिकरणलाई उच्च प्राथमिकताका साथअघि बढाउन अनुरोध गरेको छ । परिसङ्घले आयात प्रतिस्थापन गर्ने उद्योगलाई प्रोत्साहन गर्न, चालु आर्थिक वर्षको बजेटमा घोषणा गरिएको औद्योगिक क्षेत्र सार्वजनिक निजी साझेदारीमा अगाडि बढाउनुपर्ने बताएको छ । रासस

घुम्ती स्वास्थ्य शिविरबाट ६ सय महिला लाभान्वित

0
ghumati sibir_kalikatimes

पोखरीया । पर्साको विभिन्न स्थानमा सञ्चालित घुम्ती स्वास्थ्य शिविरबाट ६ सयभन्दा बढी महिला लाभान्वित भएका छन् । वीरगञ्ज महानगरपालिकाद्वारा आयोजित घुम्ती शिविरमा महिलामा हुने आङ खस्ने समस्या, पाठेघरको मुखको क्यान्सर, स्तन क्यान्सर, फिस्टुला तथा पाठेघरसम्बन्धी स्क्रिनिङ जाँचलगायतका विभिन्न स्वास्थ्य जाँच गरिएको हो ।

वीरगञ्ज महानगरपालिकाको स्वास्थ्य तथा सामाजिक विकास महाशाखा अन्तर्गतको जनस्वास्थ्य प्रवद्र्धन शाखाको सहकार्यमा चैत ८ गतेदेखि सुरु भएको शिविर विभिन्न वडा हुँदै चैत १९ मा सम्पन्न भएको हो । उपचारका लागि टाढासम्म जान नसक्ने महिलालाई लक्षित गरी ६ वटा वडामा सञ्चालन गरिएको घुम्ती स्वास्थ्य शिविरबाट ६ सय ६१ महिला लाभान्वित भएका हुन् ।
शिविरमा एक सय नौ जनाको पाठेघरको मुखको क्यान्सरसम्बन्धी गरिएको परीक्षणमा २० जनामा गम्भीर समस्या देखिएको र १६ जनामा शङ्कास्पद अवस्था देखिएको थियो । साथै ७३ जनाको अवस्था सामान्य भएको पाइएको छ ।

त्यसैगरी २९ जना गरिएको स्तनसम्बन्धी परीक्षणमा १२ जनाको अवस्था शङ्कास्पद देखिएको र उनीहरुलाई अस्पताल पठाइएको थियो । साथै १७ जनामा सामान्य अवस्था पाइएको छ ।

चौबीस महिलामा आङ खस्ने समस्याबारे गरिएको चेकजाँचमा तीन जनामा सुरुवाती चरण देखिएको तथा १७ जनामा पहिलो र दोस्रोचरणको समस्या देखिएको थियो । त्यसैगरी तीन जनामा तेस्रो चरणको समस्या देखिएको थियो भने एक जनामा चौँथोचरणको समस्या पाइएको डाक्टरहरुले बताएका छन् ।

त्यस्तै चेकजाँचको क्रममा चारजनामा पाठेघरको मुखमा मासु पलाएको र १४ जनामा भने सिस्टोसेलसम्बन्धी समस्या पाइएको डाक्टरले जनाएका छन् । स्त्री रोग विशेषज्ञ डाक्टर प्रतिति यादव र डा दिप्ती यादवले परीक्षण गर्नुभएको थियो भने वीरगञ्ज महानगर वडा नं २८ बगही प्राथमिक स्वास्थ्य केन्द्रकी स्टाफ नर्स रिन्कुकुमारी साहले सहजीकरण गर्नुभएको थियो ।

वीरगञ्ज महानगरपालिका–२९ बसडील्वाको स्वास्थ्य चौकीबाट सुरु भएको शिविर वडा नं २८ को बगही स्वास्थ्य केन्द्र, वडा नं २० हरपतगञ्जको स्वास्थ्य चौकी, वडा नं २६ सुगौली विर्ताको स्वास्थ्य चौकी, वडा नं २४ रागढवाको स्वास्थ्य चौकी हुँदै वडा नं २३ प्रसौनी विर्ताको स्वास्थ्य चौकी पुगी सम्पन्न भएको थियो । रासस

बारा २ मा ३६ जनाकाे मनाेनयन दर्ता, मुख्य प्रतिस्पर्धी काे काे हुन् ?

0

वीरगंज । बारा क्षेत्र नं. २ काे उपनिर्वाचनमा प्रतिनिधि सभा सदस्यका लागि ३६ जनाले मनाेनयन दर्ता गराएका छन् । बैशाख १० गते हुने उपनिर्वाचनका लागि २४ जना स्वतन्त्र र १२ जना विभिन्न दल गरी ३६ जनाले मनाेनयन दर्ता गराएकाे मुख्य निर्वाचन अधिकृतकाे कार्यालयले जनाएकाे छ ।

नेकपा एमालेबाट पुरुषाेत्तम पाैडेल, जनता समाजवादी पार्टी (जसपा) बाट उपेन्द्र यादव, जनमत पार्टीबाट शिवचन्द्र प्रसाद कुशवाहा, राष्ट्रिय स्वतन्त्र पार्टी (रास्वपा) रमेश खरेल, आम जनता पार्टी (आजपा)बाट अरुण कुमार ज्ञवाली, नागरिक उन्मुक्ति पार्टीबाट कमरुलाह अंसारी, राष्ट्रिय प्रजातन्त्र पार्टी नेपालबाट मनिफ मियाँ अंसारीले मनाेनयन दर्ता गराएका छन् ।

यसैगरी राष्ट्रिय प्रजातन्त्र पार्टीबाट साेनालाल प्रसाद सा तेली, नेपाल मजदुर किशान पार्टीबाट मुक्ति प्रसाद यादव, नेपा संघिय समाजवादी पार्टीबाट नेजारुल अंसारी, मंगाेल नेशनल अर्गनाइजेसनबाट प्रमाेद राम चमार, हाम्राे नेपाली पार्टीबाट चन्द्रप्रकाश सुवेदीले मनाेनयन दर्ता गराएका हुन् । 

यसैगरी स्वतन्त्रबाट विनाेद कुमार कर्ण, धुपलाल हजरा, गिरजा कुमारी, उमा कुमारी कुशवाहा, सिगारी देवी, रिता देवी, दिनेश प्रसाद यादव, असर्फी राउत अहिर, बाबु राम प्रसाद, मुना मंसुरी, जैसी राउत, धर्मविर प्रसाद यादव, उमेश प्रसाद यादव, सुरेन्द्र कुमार सिंह, जितेन्द्र प्रसाद यादव, दुर्गा प्रसाद काेइरी, विरेन्द्र प्रसाद यादव, छाेटेलाल महताे काेइरी, कुसेसवर साह बनियाँ, शम्भु प्रसाद साह तेली, राधिका न्याैपाने साह कलवार, रामबालक महरा चमार, सुरज साह तेली र वीरेन्द्र पंडितले मनाेनयन दर्ता गराएका छन् ।

यी नै हुन् मुख्य प्रतिस्पर्धी

मनाेनयन दर्ता गराएका मध्ये ५ जना बिच मुख्य प्रतिस्पर्धा हुने सम्भावना रहेकाे छ । जसपा, जनमत, एमाले, रास्वपा र आजपाका उम्मेदवार बिच मुख्य प्रतिस्पर्धा हुने देखिएकाे हाे । 

जसपाबाट मनाेनय दर्ता गराएका उपेन्द्र यादव पार्टीका राष्ट्रिय अध्यक्ष हुन् । यादवलाई गठबन्धनका नेपाली कांग्रेस, नेकपा माओवादी केन्द्र, नेकपा एकीकृत समाजवादी र लोकतान्त्रिक समाजवादीको समर्थन रहेकाे छ । यी दलले आफ्नाे दलबाट उम्मेदवारी दर्ता गराएका छैनन् । 

यसैगरी, जनमत पार्टीकाे तर्फबाट मनाेनयन दर्ता गराएका शिवचन्द्र कुशवाहा यस अघिकाे चुनावमा साढे ३ सय मतले मात्र पराजित भएकाे उम्मेदवार हुन् । गत मंसिर ४ को प्रतिनिधिसभा निर्वाचनमा गठबन्धनका तर्फबाट यसै क्षेत्रमा उम्मेदवारी दिएर पराजित कुशवाहा केही दिनअघि मात्रै जनमत पार्टी प्रवेश गरेका थिए । माओवादीबाट उम्मेदवारी दिएका उनी उपराष्ट्रपति बनेका जसपाका रामसहाय यादवसँग तीन सय ५४ मतले पराजित भएका थिए ।

रास्वपाबाट मनाेनयन दर्ता गराएका रमेश खरेल नेपाल प्रहरीका पूर्व प्रहरी नायब महानिरीक्षक हुन् । गत असोजमा आफैँ नेपाल सुशासन पार्टी खोलेका खरेल केही दिनअघि मात्र रास्वपा प्रवेश गरेका थिए । जिल्ला प्रहरी कार्यालय पर्साकाे प्रहरी उपरिक्षककाे रुपमा काम गरिसकेका उनले यस क्षेत्रमा राम्राे पहिचान रहेकाे छ ।

यता, एमालेका तर्फबाट उम्मेदवारी दिएका पुरुषाेत्म पाैडेल पूर्व संविधान सभा सदस्य एवं पूर्वमन्त्री हुन् । यस क्षेत्रमा एमाले जनाधार रहेकाेले पाैडेललाई मुख्य प्रतिस्पर्धीकाे रुपमा आंकलन गरिएकाे छ ।

पूर्व मन्त्री एवम् प्रतिनिधि सभा सदस्य प्रभु साह नेतृत्वकाे आजपाबाट उम्मेदवारी दर्ता गराएका अरुण कुमार ज्ञवाली अधिवक्ता हुन् । यस क्षेत्रमा प्रभु साहकाे पहिचान राम्राे रहेकाेले र उनकाे पार्टीकाे उम्मेदवार नयाँ भएकाेले मुख्य प्रतिस्पर्धीमा पर्ने अनुमान गरिएकाे छ ।