Date
सोम, कार्तिक ३०, २०८३
Mon, November 16, 2026
Home Blog Page 533

सिएसके जितेकाे खुशीमा मानव सेवा आश्रमलाई सहयाेग

0

वीरगंज । आइपिएलको फाइनल म्याचमा चेन्नई सुपर किंग्सले (सिएसके) जितेकाे खुशीमा एमएसडि फैन क्लब वीरगंजले मानव सेवा आश्रममा खाद्यान्न सामग्री सहयाेग गरेकाे छ ।

क्लबका सदस्यहरुमा वीरगंजकाे श्रीसियास्थित मानव सेवा आश्रममा पुगी विभिन्न खाद्यान्न सामग्री सहयोग गर्नुकाे साथै आश्रम मै केक काटी खुशियाली मनाएका हुन् ।

साे अवसरमा मानवसेवा आश्रमका मधेस प्रदेश का संयोजक दिवेश गुप्ता, कल्बका अध्यक्ष बिक्की सर्राफ, सदस्य रबि सर्राफ, आतिस पटेल, आकास सर्राफ, समीर अन्सारी, चन्दन गुप्ता लगायतकाे उपस्थिती रहेकाे थियाे ।

 साेमबार राती सम्पन्न आइपिएलकाे फाइनल खेलमा गुजरात टाइटन्सलाई ५ विकेटले हराउँदै सिएसके पाँचौँ पटक विजयी भएकाे थियाे ।

बजेटमार्फत वीरगंज-पथलैया करिडोर घोषणासँगै उद्योगी व्यवसायी उत्साहित

0
वीरगंज । सरकारले प्रस्तुत गरेको आर्थिक वर्ष २०८०÷८१ बजेट मार्फत वीरगञ्ज–पथलैयालाई औद्योगिक करिडोर घोषणा गरिएकाले यहाँका उद्योगी व्यवसायी उत्साहित भएका छन् । अर्थमन्त्री डा प्रकाशशरण महतले सार्वजनिक गर्नुभएको आर्थिक वर्ष २०८०÷८१ को बजेटमा वीरगञ्ज–पथलैयालाई औद्योगिक करिडोरको रूपमा विकास गर्ने भनिएको छ ।
 
‘‘विगतमा हामीले उठाउँदै आएका केही सुझाव पनि अहिलेको बजेटमा सम्बोधन भएको छ”, वीरगञ्ज उद्योग वाणिज्य सङ्घका अध्यक्ष अनिलकुमार अग्रवालले भन्नुभयो, ‘‘हामीले वीरगञ्ज–पथलैया खण्डलाई औद्योगिक करिडोरको रूपमा घोषणा गरिनुपर्र्छ भनिरहेका थियौँ, त्यो बजेटमा सम्बोधन भएको छ ।” 
 
यो एकदमै स्वागतयोग्य कुरा हो, यसका लागि सरकारलाई धन्यवाद दिन चाहन्छाँै उहाँले भन्नुभयो । ‘‘बजेटमार्फत वीरगञ्ज–पथलैया औद्योगिक करिडोर घोषणा गरी सरकारले हाम्रो कुरालाई सम्बोधन गरेको छ”, अध्यक्ष अग्रवालले भन्नुभयो,‘‘ यो हाम्रा लागि उपलब्धिको कुरा हो, यसको आधारभूत कुराबारे अध्ययन गर्न बाँकी छ । विस्तृत अध्ययनपछि मात्रै यस विषयमा थप कुरा गर्न सकिन्छ ।”  
 
निजी क्षेत्रलाई महत्व दिई वर्तमान आर्थिक अवस्थामा  सुधारको प्रयास हुनु स्वागतयोग्य भएको भन्दै यहाँका उद्योगी व्यवसायीले बजेटको कार्यान्वयन हुनुपर्नेमा जोड दिए । निजी क्षेत्रको लगानी, युवा मनोबल वृद्धि र व्यवसाय रक्षाका लागि महत्वकांक्षी कार्यक्रम अघि बढाइए पनि आर्थिक तरलता कायम रहेका बेला आर्थिक वृद्धिको लक्ष्य पूरा हुने अवस्था नरहेको उहाँको कथन थियो । ‘‘एकातिर खुल्ला बोर्डका कारण अवैधरूपमा समान आयात र निर्यात हुने क्रम बढेको छ भने अर्काेतिर करको दर बढाइएको छ”, अध्यक्ष अग्रवालले भन्नुभयो,‘‘ त्यसैले खुल्ला नाकाबाट हुने अवैध आयात र निर्यात रोक्नुप¥यो र करको दरभन्दा पनि दायरा बढाउनु पर्छ ।” 
 
त्यसो गर्न सकिए मात्र राजस्व सङ्कलनको लक्ष्य पूरा हुनसक्छ, नभए लक्ष्य पूरा हुनसक्ने सम्भावना छैन उहाँले भन्नुभयो । सरकारले बजेटमा स्वदेशी उद्योगको उत्पादनलाई स्वदेशमै खपत गर्ने, युवा र महिला उद्योगीलाई प्रोत्साहन, आविस्कार र नवप्रवर्तनमा जोड दिएको छ । ‘‘बजेटमा दुईवटा औँद्योगिक क्षेत्रलाई अगाडि बढाउने र दुई वटालाई सार्वजनिक निजी साझेदारीअनुसार  अगाडि बढाउने कुरा आएको छ”, उद्योग वाणिज्य सङ्घ मधेश प्रदेशका पूर्वअध्यक्ष गणेश लाठले भन्नुभयो, ‘‘यो बजेटको सकारात्क पक्ष हो तर यसलाई कार्यान्वयन कसरी गरिन्छ भनेमा भरपर्छ ।” 
 
पूँजीगत खर्च बढ्न नसकेर अर्थतन्त्रमा समस्या देखिएको अवस्थामा बजेटले पुँजीगत खर्च बढाउने र अनुत्पादक खर्च कटौती गर्ने नीति लिनु सकारात्मक भएको उल्लेख गर्दै उहाँले बजेटमा उद्योग, वाणिज्य र लगानी क्षेत्रलाई सहजीकरण, प्रोत्साहन र कर छुटको घोषणा हुनु पनि स्वागतयोग्य भएको बताउनुभयो । 
 
‘‘सरकारी खर्च कटौती, नयाँ गाडी खरिद नगर्ने र नयाँ भवन नबनाउने घोषणा गर्नु बजेटको सकारात्मक पक्ष हो”, उहाँले भन्नुभयो,‘‘ अहिलेको बजेटमा खासै उत्साहित हुनुपर्ने कुरा नभए पनि अर्थतन्त्रमा सुधार ल्याउन लिएका कतिपनि नीतिहरू सकारात्मक छन् ।” त्यसैले यसको कार्यान्वयन महत्वपूर्ण पक्ष भएको उहाँको कथन थियोे । 
 
एक सय रुपैयाँ पुँजीमै कम्पनी खोल्न पाउनेदेखि उद्योग तथा कम्पनी दर्तामा सूचना प्रविधिको अधिकतम प्रयोगसम्मका लोकप्रिय कार्यक्रम बजेटमा छन् । कोभिड र आर्थिक सङ्कुचनका कारण धर्मराएको विदेशी लगानी प्रोत्साहन गर्न विदेशी लगानीमा थुप्रै सहजीकरणको घोषणा बजेटमा गरिएको छ । 
 
उत्पादनमूलक उद्योगको सहजीकरणका लागि जग्गाको भाडा र हदबन्दीसम्बन्धी कानुन संशोधन, वैदेशिक लगानीको कानुनी स्थिरता, वैदेशिक लगानीको न्यूनतम् सीमा पुनःविचार र क्षेत्रगत सीमा तोकिने कार्यक्रमले उद्योगीको मनोबल बढ्ने पूर्वअध्यक्ष लाठको भनाइ थियो  ।
 
बजेटले लिएको निर्यात वृद्धि र आर्थिक वृद्धि दुवै लक्ष्य पूरा हुननसक्ने अवस्था रहेकोले अहिले मुलुकमा देखिएको आर्थिक तरलतालाई यसले समाधान गर्न नसक्ने अन्य उद्योगी व्यवसायीको भनाइ थियो ।‘‘मुलुकको अर्थतन्त्र सङ्कटग्रस्त अवस्थामा पुगेको छ, यस्तो अवस्थामा उत्पादनमुखी बजेट आउनुपर्दथ्यो”, नेपाल उद्योग वाणिज्य महासङ्घका केन्द्रीय सदस्य डा सुवोध गुप्ताले भन्नुभयो,‘‘तर अहिले सरकारले प्रस्तुत गरेको बजेट उत्पादनशीलभन्दा पनि वितरणमुखी बजेट हो, यसले अर्थतन्त्रमा सुधार ल्याउनसक्ने अवस्था छैन ।” बजेट वितरणमुखी रहेकाले यसको कार्यान्वयनमा थुप्रै चुनौती रहेको उहाँको भनाइ थियो ।
 
बजेटमा निजी क्षेत्रलाई विश्वासमा लिने र प्राथमिकता दिने भनिए पनि कार्यान्वयनमा कसरी हुन्छ भन्ने विषयलाई आफूहरूले हेरिरहेको सदस्य डा गुप्ताले बताउनुभयो । विनियोजित बजेटमा आँैद्योगिक पूर्वाधार विकास, स्वदेशी उत्पादनलाई प्रोत्साहन तथा निर्यात प्रवद्र्धन, बहुमूल्य खानी अन्वेषण, पेट्रोलियम पदार्थ अन्वेषणलगायत कार्यक्रम बजेटमा समेटिनु अत्यन्तै सकारात्मक र महत्पूर्ण पक्ष भएको नेपाल पेट्रोलियम डिलर्स एशोसिएशनका अध्यक्ष मनोजकुमार दासले बताउनुभयो । रासस

महोत्तरीमा एनएमबी बैंकबाट हतियारधारीले दिउँसै लुटे ३५ लाख

0

वीरगंज । महोत्तरीको महोत्तरी गाउँपालिकास्थित एनएमबी बैंकको शाखाबाट ३५ लाख रुपैयाँ लुटिएको छ । मंगलबार दिउँसो साढे १२ बजेको करिबमा महोत्तरी गाउँपालिका- २ स्‍थित बैंकको शाखामा प्रवेश गर्दै हतियारधारी समूहले लुटपाट गरेका हुन् ।

बन्दुक देखाएर बैंकमा प्रवेश गरेको समूहले ३५ लाख रुपैयाँ लुटेर लागेको बैंकले प्रारम्भिक जानकारी दिएको छ ।

जिल्ला प्रहरी कार्यालय महोत्तरीका प्रवक्ता एवम् प्रहरी नायव उपरीक्षक (डिएसपी) दिलिपकुमार गिरीका अनुसार चार जना अज्ञात समूहले बैंकमा प्रवेश गरेर बन्दुक देखाउँदै लुटपाट गरेका हुन् । उनीहरुले लुटपाट गरिरहेको बैंकको सीसीटिभी फूटेज  पनि सार्वजनिक भएको छ । 

लुटेराहरुले मुखमा मास्कले छोपेको कारण उनीहरुको पहिचान गर्न कठिनाइ भइरहेको प्रहरीको भनाई छ ।  ‘हतियारसहित आएका चार जना व्यक्तिहरूले लुटेर फरार भएका छन् । अनुसन्धान गर्न हामी घटनास्थलमै छौं,’ उनले भने ।

प्रहरीले उनीहरुको खोजीलाई तीव्र बनाएको छ ।

बहिरा विद्यार्थीका लागि यात्रुवाहक बसको व्यवस्था महानगरले गर्ने

0

वीरगंज । वीरगंज महानगरपालिकाका प्रमुख राजेशमान सिंहले बहिरा विद्यार्थीका लागि आउजाउ गर्न यात्रुवाहक बसको व्यवस्था मिलाउने बताएका छन् ।

वीरगंजमा मंगलबारदेखि सुरु सरोकारवालाहरुका लागि १० दिने आधारभुत सांकेतिक भाषा तालिमको उद्घाटन गर्दै उनले बहिरा विद्यार्थीहरुको आवागमन सहज बनाउन यातायातको प्रबन्ध मिलाउने बताए ।

महानगर क्षेत्रमा २ सय जना बहिरा विद्यार्थी रहेको भन्दै उनले उनीहरुको शिक्षाको प्रबन्ध महानगरले गरिरहेको पनि बताए ।
अहिले पठन पाठन भइरहेको स्थानबाट सारेर अर्को स्थानमा सुविधासम्पन्न विद्यालय बनाउने काम अघि बढाइएको भन्दै उनले बहिरा बालबालिकाहरूको उज्ज्वल भविष्यको लागि सबै एक जुट भएर काम गर्नुपर्ने बताए ।

बहिराहरुको विचार भावना बुझ्न सकियोस भनेरै महानगरले सांकेतिक भाषाको तालिमका लागि सहयोग गरेको पनि उनले बताए ।
तालिममा १५ जना महिला पुरुषको सहभागिता रहेको छ ।

पर्सा बहिरा संघकी उपाध्यक्ष समिक्षा सापकोटाको सभापतित्वमा सम्पन्न उद्घाटन कार्यक्रममा महानगरका शिक्षा महाशाखा प्रमुख अरविन्दलाल कर्ण, बहिरा संघ पर्साका अध्यक्ष सगुन श्रेष्ठ लगायतको उपस्थिति रहेको थियो । कार्यक्रमको सहजिकरण अर्चना कर्णले गरेकी थिइन ।

बिन्दबासिनी गाउँपालिकाद्वारा विद्यालयलाई कम्प्युटर प्रदान

0

वीरगंज । पर्साकाे बिन्दवासिनी गाउँपालिकाले एक सामुदायिक विद्यालयलाई कम्प्युटर उपलब्ध गराएकाे छ । गाउँपालिकाकाे वडा नं. ३ झाैवामा रहेकाे श्री राम स्वरूप रामपृत चाैरसिया माध्यमिक बिधालयलाई मंगलबार गाउँपालिकाले १२ थान कम्प्युटर उपलब्ध गराएकाे हाे ।

विद्यालय मै पुगेर गाउँपालिका अध्यक्ष प्रमाेद तिवारी र प्रमुख प्रशासकिय अधिकृत राजु साहले विद्यालयका प्रधानाध्यापक रामचन्द्र महताेलाई साे कम्प्युटर हस्तान्तर गरेका हुन् । 

विद्यालयमा अध्ययनरत छात्र/छात्राकाे प्राबिधिक ज्ञानलाई मध्य नजर गर्दै कम्प्युटर उपलब्ध गराइएकाे गाउँपालिका अध्यक्ष तिवारीले बताए  । उनले आफ्नाे कार्यकालमा बिन्दवासिनी गाउँपालिकाकाे शिक्षा क्षेत्रलाई आधुनिकिकरण गरि सम्पुर्ण विद्यार्थीकाे पहुँच सम्म प्राबिधिक शिक्षा पुर्याउँने आफ्नाे लक्ष्य रहेकाे बताए ।

प्रमुख प्रशासकिय अधिकृत साहले आफै विद्यालयमा कम्प्युटर सेटप गर्दै चलाएर समेत देखेका थिए । उनले गाउँपालिकाले आवश्यकता अनुसार सधै बिद्यालय तथा विद्यार्थीकाे हक हितका लागि हर सम्भव सहयाेग गर्ने बताए ।

साे अवसरमा नेपाल शिक्षक संघका अध्यक्ष नन्दु कुमार प्रसाद यादव, शिक्षकहरू सँजय सर्राफ, सुकदेव प्रसाद चाैरसिया, शिव कुमार कलवार, अमाेद दास तत्वा, प्रमाेद चाैहान, बिनाेद चाैरसिया, धनिलाल दास तत्वा, अरबिन्द ठाकुर, अनुपा पटेल, मुकलेश गद्दी, संजय गुप्ता लगायतकाे उपस्थिति रहेकाे थियाे ।

गणतन्त्र दिवसको अवसरमा पर्सामा दीप प्रज्वलन

0

जितेन्द्र यादव /
पाेखरिया । नेपाली कांग्रेस पर्सा क्षेत्र नं. १ काे १ क्षेत्रिय समितिकाे आयाेजनामा साेमबार सांझ वीरगंजमा दीप प्रज्वलन गरिएकाे छ । १६ ओैँ गणतन्त्र दिवस्को अवसरमा वीरगंजकाे माइस्थान पार्कमा दीप प्रज्वलन गरिएकाे हाे ।

प्रदेश क्षेत्रिय सभापति अनिल कुमार सिंहकाे सभापतित्वमा भएकाे दीप प्रज्वलन कार्यक्रमकाे उद्घाटन प्रदेश सभा सदस्य एवम् कांग्रेस पर्साका सभापति जनार्दन सिंह क्षेत्रीले गरेका थिए ।

कार्यक्रममा प्रदेश सभा सदस्य श्याम पटेल, वीरगंज महानगरपालिकाका उप मेयर इम्तियाज आलम, मनोजा चौधरी, महमद सहाबुदीन लगायतकाले गणतन्त्रको महत्त्व दर्शाउदै शुभकामना मन्तव्य व्यक्त गरेका थिए ।

दीप प्रज्वलन कार्यक्रममा कांग्रेसका नेता रामनारायण प्रसाद कुर्सी, ध्रुव नेपाल, दिना गुप्ता, रमेश पाण्डे, प्रकाश उपाध्याय, नेतृ किरण शर्मा, प्रिति सिंह, मिन्तु सिंह, मनोजा चौधरी लगायतकाे सहभागीता रहेकाे थियाे ।

यसैगरी पर्साकाे छिपहरमाई गाउँपालिकाकाे वडा नं. ५ भिस्वामा पनि गणतन्त्र दिवसकाे अवसरमा दीप प्रज्वलन कार्यक्रम सम्पन्न भएकाे छ । नेवि संघ छिपहरमाई गाउँपालिकाकाे आयाेजना र नेपाली कांग्रेस पर्साका सह सचिव नविन सिंहकाे प्रमुख आतिथ्यतामा भएकाे कार्यक्रम सम्पन्न भएकाे हाे ।

भिस्वाबाट देवी बसमा लागु औषध बरामद, दुई जना पक्राउ

0

वीरगंज । प्रहरीले भिस्वाबाट काठमाडाैं चल्ने देवी बसबाट लागु औषध बरामद गरेकाे छ । बिशेष सूचनाको आधारमा इलाका प्रहरी कार्यालय पाेखरिया मातहतकाे प्रहरी चाैकी भिष्वाबाट खटिएकाे प्रहरी सहायक निरिक्षक बिन्देश्वर यादवसहितकाे प्रहरी टोलीले बसबाट लागु औषध बरामद गर्नुकाे साथै दुई जनालाई पक्राउ समेत गरेकाे हाे ।

पक्राउ पर्नेमा बसेका सहचालक पर्साकाे धोबिनी गाउँपालिका वडा नं. ४ लंगडी निवासी ४५ बर्षिय नुरेश मियाँ तेली र बस चालक दोलखाकाे भिमेश्वर नगरपालिका वडा नं.८ निवासी ४२ बर्षिय दुर्गा राज खत्री रहेका छन् । 

पर्साकाे छिपहरमाई गाउँपालिका वडा नं.५ भिष्वास्थित ब्रम्हस्थान नजिक खाली जग्गामा पार्किङ गरि राखेको बागमती प्रदेश ०३-००१ ख. १८१० नम्बरको यात्रु बाहक बसबाट लागु औषध बरामद भएकाे प्रहरीले जनाएकाे छ । 

हेरचाहको लागि सोही बसमा भेटी‍एका बसका सहचालक नुरेशसंग उक्त बसको डिक्कीहरु खोल्न लगाई चेकजाँच गर्दा उक्त बसको पछाडी डिक्की भित्र प्लास्टिकको बाल्टिनमा राखीएको कपडाको झोला भित्र कागजले बेरिएको ८ वटा पोका रहेको मध्ये ३ वटा पोकामा लागू औषध बरामद भएकाे इलाका प्रहरी कार्यालय पाेखरियाले जनाएकाे छ ।

प्रहरीका अनुसार ३ वटा पाेकामा नुफिनको एम्पुल ५०० पिस, लागू औषध फेनारगनको एम्पुल ५०० पिस र २ वटा पोकामा लागू औषध डाइजेपामको एम्पुल ५०० पिस गरी जम्मा १५०० पिस लागू औषधको एम्पुलहरु फेला परेको हाे ।

त्यसपछि उक्तकाे बसको सह चालकलाई पक्राउ गरी उल्लेखित नम्बरको बस चालकको नामथर वतन समेत सोधपुछ गर्दा जिल्ला दोलखा भिमेश्वर न.पा. वडा नं.८ बस्ने दुर्गा राज खत्री बताएकोमा उक्त लागू औषध बरामद गरी निजलाई सँगसाथमा लिई बस चालक दुर्गा राज खत्रीलाई समेत खोजतलास गर्दै जाँदा निजको आफ्नै डेरा कोठाबाट निजलाई फेला पारी पक्राउ गरीएकाे प्रहरीकाे भनाई छ ।

मानव अधिकार समाजको चौथाे राष्ट्रिय परिषद बैठक सम्पन्न

0

वीरगंज । स्वतन्त्र मानव अधिकार समाजको चौथाे राष्ट्रिय परिषद बैठक साेमबार वीरगंजमा सम्पन्न भएकाे छ । श्री त्रिजुद्व माहाविर प्रसाद रघुविर राम माध्यमिक विद्यालय वीरगंजमा बसेकाे बैठकले पुन: कृष्ण कुमार खनाल कै सभापतित्वमा २५ सदस्यीय नयाँ कार्य समिति चयन गरेकाे छ ।

नयाँ कार्य समितिकाे उप सभापति नन्दिकिशोर यादव, माहासचिव दिपक साह कानु, सचिव आशिष कुमार, कोषाध्यक्ष उर्मिला कुशवाहा, सह कोषाध्यक्ष राम भराेस यादव लगायतकाे चयन भएका छन् ।

यसैगरी समाजकाे केन्द्रिय सदस्यमा नन्दनी गुप्ता, सीता उप्रेती, रवि परियार, सुवाेध गुप्ता, नितिन शाह, वृजेश टेमानि, अंकित जालान लगायतका चयन भएका हुन् ।

यस अघि बैठकाे उद्घाटन वीरगंज महानगरपालिकाका मेयर राजेशमान सिंहले गरेका थिए । बैठक उद्घाटन गर्दै मेयर सिंहले आम सर्वसाधारणकोको न्यायमा पहुँच न्यून हुँदै गएकोले मानवअधिकारवादीले पीडितलाई न्याय दिलाउन पहल गर्नु पर्ने बताए ।

कार्यक्रमका प्रमुख अतिथी समेत रहेका मेयर सिंहले राम्रो कामको सहराना र गलत कार्यको बिरोध गर्नु पर्ने आवश्यकता रहेको बताए । उनले वीरगंज महानगरको समग्र विकासमा सबैलाई साथ सहयोग गर्न अपिल समेत गरे ।

मानवअधिकारकाे क्षेत्रमा सहयोग पु-याएकाे भन्दै वीरगंज महानगरपालिकाका मेयर सिंह र वीरगंज वडा नम्बर ५ वडाध्यक्ष प्रदिप कुमार चौरसियालाई समाजले सम्मान र कदर पत्रले सम्मान समेत गरेकाे थियाे

समाजका सभापति खनाल कै सभापतित्वमा भएकाे उद्घाटन समारोहमा वरिष्ठ साहित्यकार नवराज लम्साल, प्रमुख जिल्ला अधिकारी हिरालाल रेग्मी, नेपाली कांग्रेसका प्रकाश उपाध्याय, रेडियाे वीरगंज एवम् टिभि वीरगंजका अध्यक्ष धुर्व साह, मानव अधिकार तथा शान्ति समाजका केन्द्रीय सचिव अमर गौतम लगायतले शुभकामना मन्तव्य राखेका थिए । कार्यक्रमकाे सहजीकरण पत्रकार धुर्व अधिकारीले गरेका थिए ।

गणतन्त्र दिवसमा वीरगंज कारागारबाट १९ कैदी रिहा

0

वीरगंज । गणतन्त्र दिवसकाे अवसरमा साेमबार वीरगंज कारागारबाट १९ जना कैदीबन्दीलाई रिहा गरिएको छ । विभिन्न मुद्दामा कैदी जीवन विताईरहेका १४ जनालाई कैद मिनाहा र ५ जनालाई आममाफी दिईएको हो ।

१६ औं गणतन्त्र दिवसको अवसरमा सरकारको सिफारिसमा राष्ट्रपतिले देशभरका विभिन्न कारागारमा रहेकामध्ये ५०१ जना कैदीको सजाय माफी दिएका छन् । त्यहिमध्ये सोमबार वीरगंज कारागारबाटपनि १९ जना कैदी साजय माफी पाएर रिहा भएका हुन् ।

रिहा हुनेहरु सवारी ज्यान मुद्दा, चोरी मुद्दा, हातहतियार, ज्यान मार्ने उद्योग, मानिसको लापरवाहीले ज्यान गएको, वन पैदावार, चोरी लगायतका रहेको वीरगंज कारागारका सुचना अधिकारी नवराज बर्तौलाले जानकारी दिए ।

कैदी मिनाहा हुनेहरुमा रामसिंह राय थारु, ओमप्रकाश सहनी मलाहा, प्रकाश कार्की, चन्दन कुमार, श्याम महतो कोईरी, नागेन्द्र प्रसाद कलवार, प्रज्जवल तिवारी लगायतका रहेका छन् ।

आम माफीतर्फबाट प्रमोद महतो, रामप्रसाद साह कानु, राजेश्वरप्रसाद साह कानु, जोगिन्दर सिंह राजपुत र मुनिलाल साह कानुलाई बिदाई गरिएको सुचना अधिकारी बर्तौलाले बताए । 

चालचलनमा सुधार र भुक्तान हुनुपर्ने कैद समयको पचास प्रतिशत भुक्तान गरिसकेकाहरुलाई रिहा गरिएको वीरगंज कारगारले जनाएको छ । 

बिजबनिया बर्थिङ्ग सेन्टरबाट पहिलो प्रसूती सेवा

0

वीरगंज । पर्साको जगरनाथपुर गाउँपालिका वडा नम्बर ३ स्थित बिजबनिया बर्थिङ्ग सेन्टरबाट फतमा खातुनले पहिलो प्रसुती सेवा लिनुभएको छ । वडा नम्बर ३ खलुचडी निवासी फतमा खातुनले सो सेन्टरबाट प्रसुती सेवा लिई एउटा छोरीको जन्म दिएकी छन् ।

बैशाख ४ गते उद्घाटन भई सो बर्थिङ्ग सेन्टर सन्चालनमा आएको डेढ महिना हुन लागेको छ । गाउँमा कस्तो सेवा देलान वा अनुभवी चिकित्सक छैनन् की भनी विश्वास नभएका कारण अहिले सम्म कोही पनि प्रसुती सेवा लिन आउन मानेका थिएनन् । तर फतमा खातुनले विश्वासका साथ सेवा लिन आएमा उनले सकुशल २ं.५ किलोको छोरीको जन्म दिएको सेन्टरमा कार्यरत अ.न.मी पुजा यादवले बताउनुभयो ।

खातुन उपचारका लागी सेन्टरमा आउँदा पिभि गरि जाँच गर्दा म्युकोमियम स्टेन्ड अर्थात बच्चाले दिशा गरेको जानकारी आफुलाई भएको अनमी यादवले बताउनुभयो । विरामीलाई सि/एस गर्नुपर्ने अवस्था भएपनि थिन म्युकोमियमका कारण साधारण तवरले पनि उनको बच्चा जन्माउन सकिन्छ भनेर परिवारलाई आग्रह गरिएपछि अनुमतिका आधारमा उपचार शुरु गरिएको थियो ।

उपचार पछि उनले सकुशल एउटा छोरीको जन्म दिईन र आमा बच्चा दुवै स्वस्थ्य रहेको बर्थिङ्ग सेन्टरका इन्चार्ज अमोद कुमार साहले बताउनुभयो । सकुशल उपचार पछि सेवा लिन आएका खातुन परिवारले अनमी पुजा यादवलाई धन्यावाद तथा बधाई सँगसँगै बर्थिङ्ग सेन्टरको प्रशंसा गरेका थिए ।

अवस्था हेरेर आफुहरु वीरगंज जान लाग्दा यहाँको चिकित्सकको आग्रहलाई मानेपछि ठुलो खर्च जोगिएको खातुनका श्रीमान विनोद गद्दीले खुसि व्यक्त गर्नुभयो । उहाँ खुसी हुँदै बिजबनिया बर्थिङ्ग सेन्टरले स्थानियको विश्वास जितेकोमा अब गाउँका अन्य व्यक्तिलाई पनि सेवा लिन आफु प्रचारप्रसार गर्छु, भन्नुभयो ।

वीरगंज लगायत शहरका ठुल्ठुला अस्पतालमा जाँदा उनीहरु पैसा ठगी गर्नलाई साधारण तवरले जन्मिने बच्चाको लागी पनि जटिल भनेर पैसा ठग्ने गरेको यो सफल उपचारले आफुलाई विश्वास यस सेन्टरले दिएको खातुनका श्रीमान गद्दीले बताउनुभयो । यहाँको सेवा राम्रो रहेको भन्दै अरुलाई पनि सेवा लिन आउन सेन्टरका ईन्चार्ज साह र अनमी पुजाले आग्रह गर्नुभयो ।