सेढवा । पर्सा जिल्लाको धोबिनी गाउँपालिका वडा नं. १ भिखमपुरमा रहेको नेपाल राष्ट्रिय माध्यमिक विद्यालय (ने.रा.मा.वि.) मा साेमबार दुई पक्षबीच झडप भएको छ। झडपमा दुई जना शिक्षकसहित पाँच जना घाइते भएका छन्।
घटनापछि आक्रोशित स्थानीयले केही शिक्षकलाई कालो मोसो दल्नुका साथै विद्यालयभित्र रहेका फर्निचरहरू तोडफोड गरेको जनाइएको छ।
प्राप्त जानकारीअनुसार, घटनाको मुख्य कारण सामाजिक सञ्जालमा अपलोड गरिएको एक अश्लील भिडियो रहेको छ। माघ ९ गते शुक्रबार सरस्वती पूजाको राति पूजा व्यवस्थापन समिति र विद्यालय प्रशासनको सहमतिमा विद्यालय परिसरमै सांस्कृतिक कार्यक्रम आयोजना गरिएको थियो। उक्त कार्यक्रममा तेस्रोलिंगी समूहलाई आमन्त्रण गरिएको र उनीहरूसँग अश्लील गीतमा अश्लील प्रदर्शन तथा अनैतिक क्रियाकलाप भएको आरोप स्थानीयले लगाएका छन्।
सो कार्यक्रमका दृश्यहरू भिडियो बनाई सामाजिक सञ्जालमा पोस्ट भएपछि स्थानीय बासिन्दा तथा अन्य विद्यार्थीहरूको समूह आक्रोशित बनेको प्रत्यक्षदर्शीहरूले बताएका छन्। विद्यालय प्रशासनको लापरवाहीका कारण यस्ता गतिविधि भएको भन्दै उनीहरूले विरोध जनाउँदा स्थिति तनावग्रस्त बनेर झडपको रूप लिएको हो।
घटनापछि सुरक्षाकर्मी परिचालन गरिएको र अवस्था नियन्त्रणमा लिइएको जनाइएको छ। यस विषयमा विद्यालय प्रशासन तथा स्थानीय प्रशासनबाट थप अनुसन्धान भइरहेको छ।
