वीरगंज । पर्सा निर्वाचन क्षेत्र नम्बर–२ बाट प्रतिनिधिसभा सदस्य पदका लागि राष्ट्रिय स्वतन्त्र पार्टी (रास्वपा) का उम्मेदवार सुशील कुमार कानुले वीरगञ्ज महानगरपालिका–२४ मा स्थानीय युवाहरूसँग भेटघाट तथा छलफल गरेका छन्।
भेटघाटका क्रममा युवाहरूले रास्वपाप्रति बढ्दो विश्वास र समर्थन व्यक्त गर्दै चुनावी अभियानमा सक्रिय रूपमा सहभागी हुने प्रतिबद्धता जनाएका छन्। उनीहरूले आगामी निर्वाचनमा घण्टी छापलाई जिताउन जनसम्पर्क, जनमत निर्माण र घरदैलो अभियानमा जुट्ने बताएका हुन्।
कार्यक्रममा बोल्दै उम्मेदवार कानुले युवाहरूको उत्साह र साथले राजनीतिक परिवर्तन सम्भव भएको बताए। “निराशा र पुरानो राजनीतिक शैलीबाट मुक्त हुन युवाहरू अघि बढिरहेका छन्,” उनले भने, “युवाको साथ र विश्वासले नै अब देशमा परिवर्तन सम्भव छ।”
स्थानीय युवाहरूले रास्वपाले नयाँ सोच, पारदर्शिता र जिम्मेवार राजनीतिलाई अघि बढाएको उल्लेख गर्दै यही कारण पार्टीसँग जोडिएको बताएका छन्। उनीहरूले अब पुरानै प्रवृत्तिको राजनीतिलाई विस्थापित गर्दै नयाँ विकल्प रोज्ने समय आएको धारणा राखे।
भेटघाट कार्यक्रम युवाहरूलाई पार्टीमा स्वागत गर्ने, एकता सुदृढ गर्ने र परिवर्तनको साझा संकल्प व्यक्त गर्दै सम्पन्न भएको थियो।
