वीरगंज । प्याब्सन पर्साको आयोजनामा जारी अन्तरविद्यालय क्रिकेट तथा फुटबल प्रतियोगिताअन्तर्गत आज क्रिकेटतर्फ ३ तथा फुटबलतर्फ ४ गरी जम्मा ७ खेल सम्पन्न भएका छन्।
प्रतियोगितामा सहभागी विद्यालयस्तरीय खेलाडीहरूले उत्साहजनक, अनुशासित र प्रतिस्पर्धात्मक प्रदर्शन प्रस्तुत गरेका छन्।
क्रिकेटतर्फ, मुनलाईट स्कुलले मिनील्याण्ड स्कुललाई ८४ रनको फराकिलो अन्तरले पराजित गर्दै प्रभावशाली जित हात पार्यो। टस जितेर पहिले ब्याटिङ गरेको मुनलाईटले निर्धारित १५ ओभरमा ६ विकेटको क्षतिमा १४५ रन बनाएको थियो।
जवाफी ब्याटिङमा उत्रिएको मिनील्याण्ड पूरै ओभर खेले पनि ६१ रनमै समेटियो। खेलमा ४५ रनको योगदान दिएका दिलराज यादव म्यान अफ द म्याच घोषित भए।
यस्तै, दोस्रो खेलमा फुर्कान एकेडेमीले नेपाल काभेरीलाई ८ विकेटले पराजित गर्यो। टस जितेर ब्याटिङ गरेको नेपाल काभेरीले ६ विकेट गुमाउँदै ९५ रन मात्र बनाउन सकेको थियो। उक्त लक्ष्य फुर्कान एकेडेमीले २ विकेटको क्षतिमा १२.२ ओभरमै पूरा गर्यो।
तेस्रो खेलमा सेन्ट जेभियर्स विजयी भयो। सेन्ट जेभियर्सले टस जितेर ब्याटिङ गर्दै १५ ओभरमा ८ विकेटको क्षतिमा १५२ रन बनाएकोमा आचार्य एकेडेमी पूरै ओभर खेल्दा पनि ८४ रनमै सीमित रह्यो।
फुटबलतर्फ, गुरुकुल एकेडेमीले गोल्डेन फ्युचर माविलाई पराजित गर्दै विजयी सुरुआत गर्यो। गोल्डेन फ्युचरका खेलाडीबाट भएको आत्मघाती गोल निर्णायक बन्यो भने गुरुकुलका युहान राई म्यान अफ द म्याच घोषित भए।
दोस्रो खेलमा ज्ञानदा एकेडेमीले नेपाल काभेरीलाई ३–२ गोल अन्तरले पराजित गर्यो। खेलमा उत्कृष्ट प्रदर्शन गरेका ज्ञानदा एकेडेमीका अनुरन्जन साह म्यान अफ द म्याच बने।
तेस्रो खेलमा बिकन माविले वीरगञ्ज पब्लिक ई–स्कुललाई ८–० को फराकिलो अन्तरले पराजित गर्यो। बिकनका अंश थारु म्यान अफ द म्याच घोषित भए।
त्यसैगरी चौथो तथा अन्तिम खेलमा साउथ जोनले डिएभीलाई ५–० ले पराजित गर्दै शानदार जित दर्ता गर्यो। साउथ जोनका आयुष चौधरी म्यान अफ द म्याच घोषित भए।
प्रतियोगिताले विद्यार्थीहरूमा खेलकुदप्रति रुचि बढाउनुका साथै अनुशासन, सहकार्य र प्रतिस्पर्धात्मक भावना विकास गर्न सहयोग पुग्ने आयोजकले जनाएको छ।
