वीरगञ्ज । २१ फागुनमा हुने प्रतिनिधि सभा निर्वाचनलाई लक्षित गर्दै जनमत पार्टी पर्साले संगठन सुदृढीकरण अभियानलाई तीव्रता दिएको छ।
“आपन बुथ सब से मजबुत” अभियानअन्तर्गत पर्सा क्षेत्र नम्बर–१ का ३४ वटै बुथका बुथ इन्चार्ज, महिला इन्चार्ज तथा युवा इन्चार्जहरूको अभिमुखीकरण कार्यक्रम सम्पन्न भएको छ। कार्यक्रम जनमत पार्टी पर्साको आयोजनामा सम्पन्न भएको हो।
अभिमुखीकरण कार्यक्रममार्फत बुथस्तरको संगठनलाई थप मजबुत बनाउँदै मतदाता केन्द्रित अभियान अघि बढाउने रणनीति तय गरिएको पार्टीले जनाएको छ। कार्यक्रममा बुथ व्यवस्थापन, मतदाता सम्पर्क, संगठनात्मक समन्वय र चुनावी रणनीतिबारे छलफल गरिएको थियो।
उक्त अवसरमा पर्सा क्षेत्र नम्बर–१ बाट प्रतिनिधि सभा सदस्यका उम्मेदवार ओमप्रकाश सर्राफले औपचारिक रूपमा आफ्नो चुनावी अभियान सुरु गरेका छन्। उनले निर्वाचन जितको आधार बुथस्तर नै हुने उल्लेख गर्दै पार्टी संगठनलाई एकताबद्ध, सक्रिय र जिम्मेवार बनाएर मैदानमा उत्रिन कार्यकर्तालाई आग्रह गरे।
जनमत पार्टीले आगामी दिनमा घरदैलो कार्यक्रम, जनसम्पर्क अभियान तथा विभिन्न चुनावी गतिविधिलाई निरन्तरता दिने तयारी गरेको जनाएको छ। २१ फागुनको निर्वाचनलाई निर्णायक रूपमा लिएको पार्टीको भनाइ छ।
