वीरगंज । आगामी फागुन २१ गते हुने प्रतिनिधिसभा सदस्य निर्वाचनलाई लिएर देशभर जस्तै पर्सा जिल्लामा पनि राष्ट्रिय स्वतन्त्र पार्टी (रास्वपा) प्रति चासो र आकर्षण बढेको देखिएको छ। विशेषगरी काठमाडौं महानगरपालिकाका पूर्व मेयर बालेन्द्र साह (बालेन) लाई रास्वपाले प्रधानमन्त्रीको उम्मेदवारको रूपमा अघि सारेपछि पर्सामा समेत पार्टीप्रति उत्साह बढेको हो।
तर, पर्सामा रास्वपाले उम्मेदवार छनोट गर्दा अपेक्षाअनुसार निर्णय नगरेको भन्दै केही निर्वाचन क्षेत्रमा मतदाता अन्योलमा परेका छन्। रास्वपाले पर्सा क्षेत्र नम्बर–१ मा जिल्ला सभापति हरि पन्त, क्षेत्र नम्बर–२ मा वीरगंज–१० का निवर्तमान वडाध्यक्ष सुशील साह कानु, क्षेत्र नम्बर–३ मा निर्माण व्यवसायी रामाकान्त चौरसिया र क्षेत्र नम्बर–४ मा नवप्रवेशी टेक बहादुर शाक्यलाई उम्मेदवार बनाएको छ।
मतदाताका अनुसार विशेषगरी पर्सा क्षेत्र नम्बर–३ र ४ का उम्मेदवारप्रति असन्तुष्टि देखिएको छ । क्षेत्र नम्बर–३ मा स्थानीय विकास, लगानी र सामाजिक योगदान स्पष्ट नभएका व्यक्तिलाई उम्मेदवार बनाइएको भन्दै मतदाता सन्तुष्ट छैनन् । एक मतदाताले भने, “बालेनलाई प्रधानमन्त्री बनाउन रास्वपालाई मतदान गर्न मन छ, तर उम्मेदवार ठीक नहुँदा प्रत्यक्षतर्फ मत दिन सक्ने अवस्थामा छैनौं । समानुपातिकतर्फ मात्रै मतदान गर्छौं।”
उनका अनुसार क्षेत्र नम्बर–३ का उम्मेदवार निर्माण व्यवसायी हुन् र उनी अचानक आएर पैसाको बलमा चुनाव लड्न खोजेको आरोप मतदाताबीच व्यापक छ । “विगतमा यसै क्षेत्रमा निर्माण व्यवसायी हरिनारायण रौनियारलाई जिताएर पठाउँदा उनले पूरा कार्यकाल काम गर्न नसकेको हामीले बिर्सेका छैनौं,” अर्का मतदाताले भने, “अब त्यही गल्ती दोहोर्याउन चाहँदैनौं।”
त्यस्तै पर्सा क्षेत्र नम्बर–४ का रास्वपा उम्मेदवार टेक बहादुर शाक्य विगत पाँच वर्ष काठमाडौंमा बसोबास गर्ने र चुनावको बेला मात्रै क्षेत्रमा आएर उम्मेदवारी दिएको आरोप पनि मतदाताले लगाएका छन्। स्थानीय मतदाताका अनुसार यस्ता उम्मेदवार चयन हुँदा पार्टीको चुनाव चिन्ह घण्टीमा मतदान गर्ने चाहना हुँदाहुँदै पनि अन्योल सिर्जना भएको हो ।
समग्रमा बालेन साहप्रति रहेको विश्वास र परिवर्तनको चाहनाका कारण रास्वपाप्रति आकर्षण बढे पनि केही क्षेत्रमा उम्मेदवार चयनकै कारण पार्टीले अपेक्षित समर्थन गुमाउने जोखिम देखिएको छ ।
