वीरगंज । पर्सा निर्वाचन क्षेत्र नम्बर–२ निवासी निर्माण व्यवसायी रामाकान्त चौरसियाले निर्वाचन क्षेत्र नम्बर–३ बाट प्रतिनिधिसभा सदस्यको चुनाव लडेपछि स्थानीय मतदाताबीच अन्योल सिर्जना भएको छ। स्थायी घर वीरगंज महानगरपालिका–१९, बर्वा (क्षेत्र नं. २) मा भए पनि उनी क्षेत्र नं. ३ बाट उम्मेदवार बनेका हुन्।
निर्वाचनअघि नेपाली कांग्रेससँग आवद्ध रहेका चौरसियाले पैसाको बलमा एकाएक राष्ट्रिय स्वतन्त्र पार्टी (रास्वपा) बाट टिकट लिएर चुनाव लडेको आरोप समेत लाग्दै आएको छ। जानकारहरूका अनुसार उनले आफ्नै क्षेत्र नं. २ बाट चुनाव नलड्नुको प्रमुख कारण उनकै आफन्त पर्ने कांग्रेस उम्मेदवार, पूर्व मन्त्री तथा निर्वतमान सांसद अजय चौरसिया रहेको बताइन्छ।
क्षेत्र नं. २ बाट चुनाव लडेमा आफन्त उम्मेदवारलाई असर पर्ने सम्भावनाका कारण उनले क्षेत्र नं. ३ रोजेको विश्लेषण राजनीतिक वृत्तमा भइरहेको छ । तर आफ्नै क्षेत्र छोडेर अर्काे क्षेत्रबाट उम्मेदवारी दिएपछि क्षेत्र नं. ३ का मतदाताहरूले समेत उनलाई सहज रूपमा स्वीकार गर्न नसकेको स्थानीयहरू बताउँछन्।
स्थानीय बासिन्दाका अनुसार क्षेत्र नं. ३ मा चौरसियाको सामाजिक तथा राजनीतिक योगदान उल्लेखनीय नदेखिएको कारण मतदाताबीच विश्वासको वातावरण बन्न नसकेको हो । यही कारण उनले रोजेको क्षेत्रमै उनको उम्मेदवारीप्रति आशंका र असन्तुष्टि बढ्दै गएको बताइन्छ।
यसैबीच, रास्वपा उम्मेदवार चौरसियाले शनिबार निर्वाचन आचारसंहिता उल्लंघन गरेको समाचार समेत सार्वजनिक भएको थियो। पोखरिया नगरपालिका–७ मा आयोजित घरदैलो कार्यक्रममा भीड देखाउन बालबालिकाको प्रयोग गरिएको आरोप लागेको हो । निर्वाचन आचारसंहिताले चुनावी गतिविधिमा बालबालिकाको प्रयोग स्पष्ट रूपमा निषेध गरे पनि उक्त गतिविधिप्रति सम्बन्धित निकायको ध्यान पुग्न नसकेको स्थानीयहरूको गुनासो छ।
