वीरगंज । पर्सा निर्वाचन क्षेत्र नम्बर–३ अन्तर्गत बहुदरमाई नगरपालिकामा नेकपा एमालेका अगुवा नेता तथा कार्यकर्ताहरूको भेला आइतबार सम्पन्न भएको छ। फागुन २१ गते हुने प्रतिनिधिसभा निर्वाचनलाई लक्षित गरी आयोजित उक्त भेलामा सहभागीहरूले क्षेत्र नम्बर–३ का उम्मेदवार रूपेश कुमार पाण्डेलाई विजयी गराउने दृढ प्रतिबद्धता जनाएका छन्।
नेकपा एमाले बहुदरमाई नगर कमिटी अध्यक्ष प्रमोद कुशवाहाको अध्यक्षता तथा पार्टी केन्द्रीय कमिटी सदस्य एवं पर्सा जिल्ला इन्चार्ज प्रभु हजराको प्रमुख आतिथ्यमा सम्पन्न कार्यक्रममा केन्द्रीय सल्लाहकार परिषद सदस्य शिव पटेल, अखिल नेपाल पिछडावर्ग (ओबीसी) महासंघका केन्द्रीय अध्यक्ष तेजप्रकाश नेपाली निषाद, मधेस प्रदेश कमिटी सदस्य तथा बहुदरमाई नगरपालिकाकी उपप्रमुख सुष्मा कुशवाहासहित प्रदेश, जिल्ला र स्थानीय तहका नेता–कार्यकर्ताहरूको उल्लेखनीय उपस्थिति रहेको थियो।
कार्यक्रममा स्थानीय बुद्धिजीवी, अगुवा नेता तथा सक्रिय कार्यकर्ताहरूको बाक्लो सहभागितालाई नेकपा एमालेप्रतिको बढ्दो विश्वास र संगठनको मजबुत अवस्थाको संकेतका रूपमा लिइएको छ।
भेलामा वक्ताहरूले पार्टीको नीति, सिद्धान्त र राष्ट्रवादी अडानलाई घर–घरमा पुर्याउँदै एकताबद्ध रूपमा उम्मेदवारलाई विजयी गराउन कार्यकर्ताहरूलाई आह्वान गरेका थिए। मधेसमा एमालेविरुद्ध फैलाइएका भ्रमहरू चिर्दै विकास, सुशासन र राष्ट्रिय स्वाभिमानको पक्षमा उभिनुपर्नेमा उनीहरूले जोड दिएका थिए।
कार्यक्रमलाई सम्बोधन गर्दै पर्सा निर्वाचन क्षेत्र नम्बर–३ का प्रतिनिधिसभा उम्मेदवार तथा परिवर्तनका संवाहकका रूपमा स्थापित युवा नेता रूपेश कुमार पाण्डेले क्षेत्रको समग्र विकासका लागि आफ्नो स्पष्ट भिजन प्रस्तुत गरे। उनले कृषि, शिक्षा, स्वास्थ्य, रोजगारी र पूर्वाधार विकासलाई प्राथमिकतामा राख्दै पर्सा–३ लाई समृद्ध बनाउने प्रतिबद्धता दोहोर्याए।
“राष्ट्र, राष्ट्रियता र जनताको भविष्य सुरक्षित गर्ने शक्ति नेकपा एमाले हो,” पाण्डेले भने, “देश र जनताको हितका लागि आज एमालेमा मतदान गर्नु अपरिहार्य आवश्यकता हो।”
