वीरगंज । पर्सा निर्वाचन क्षेत्र नम्बर ४ अन्तर्गत छिपहरमाई गाउँपालिका वडा नम्बर ३ मा नेपाली कांग्रेसको वडा स्तरीय भेला सम्पन्न भएको छ । भेलाले आगामी फागुन २१ गते हुने निर्वाचनमा पर्सा–४ बाट कांग्रेसका उम्मेदवार पूर्व मन्त्री एवं निवर्तमान प्रतिनिधिसभा सदस्य रमेश रिजाललाई विजयी गराउने प्रतिबद्धता व्यक्त गरेको छ ।
भेलालाई सम्बोधन गर्दै नेपाली कांग्रेस पर्साका सह–सचिव नविन सिंहले पर्सा–४ मा कांग्रेस उम्मेदवार रमेश रिजालको जित सुनिश्चित रहेको दाबी गरे । उनले क्षेत्रका अन्य उम्मेदवारको तुलनामा रिजाल अनुभवी, योग्य र सक्षम नेता भएकाले जनताको विश्वास उनैमाथि रहेको बताए ।
सिंहले भने, “हाम्रा उम्मेदवार सधैं क्षेत्रका जनताको सुख–दुःखमा साथ रहनुहुन्छ । अरू उम्मेदवारजस्तो निर्वाचनको बेला मात्र देखिने होइन, त्यसैले कांग्रेसको जित निश्चित छ ।”
भेलाका प्रमुख अतिथि समेत रहेका युवा नेता सिंहले हावाको पछि नलाग्न नेता–कार्यकर्तालाई आग्रह गर्दै आगामी निर्वाचनमा कांग्रेसको विकल्प नरहेको जिकिर गरे । उनले लोकतन्त्र स्थापनादेखि सुदृढीकरणसम्म कांग्रेसको ऐतिहासिक योगदान रहेको उल्लेख गर्दै कांग्रेस नै लोकतन्त्रको वास्तविक पहरेदार भएको दाबी गरे ।
भेलामा सहभागी नेता–कार्यकर्ताले एकताबद्ध भएर घरदैलो तथा जनसम्पर्क अभियानलाई तीव्र बनाउँदै रमेश रिजालको जितका लागि सक्रिय रूपमा लाग्ने प्रतिबद्धता व्यक्त गरेका थिए ।
