वीरगंज । राष्ट्रिय स्वतन्त्र पार्टी (रास्वपा) पर्साले पर्सा निर्वाचन क्षेत्र नं. १ का सक्रिय पार्टी सदस्यहरूसँग भेटघाट तथा अन्तरक्रिया कार्यक्रम सम्पन्न गरेको छ। कार्यक्रममा सहभागिहरुले पार्टीका उम्मेदवारलाई क्षेत्र नं. १ का विजयी गराउन प्रतिवद्धता जनाएका थिए ।
कार्यक्रममा पर्साका चारै निर्वाचन क्षेत्रमा रास्वपाका उम्मेदवारहरूलाई विजय गराउन सबै तह र तप्काबाट कसरी प्रभावकारी भूमिका खेल्न सकिन्छ भन्ने विषयमा गहन छलफल तथा अन्तरक्रिया गरिएको थियो । छलफलका क्रममा सहभागीहरूले आ–आफ्ना दृष्टिकोण राख्दै विभिन्न सुझावहरू प्रस्तुत गरेका थिए।
कार्यक्रममा उठेका विषयहरूलाई सम्बोधन गर्दै रास्वपा पर्सा सभापति एवं क्षेत्र नं. १ का उम्मेदवार हरि पन्तले प्राप्त भएका जायज सुझावहरू पार्टीले सहर्ष ग्रहण गर्ने प्रतिबद्धता जनाए । उनले आगामी फाल्गुन २१ गते नेपाली जनताले वर्षौंदेखि मौलाउँदै आएको भ्रष्टाचार, कुशासन, अनियमितता, नातावाद र कृपावादविरुद्ध मतपत्रमार्फत जवाफ दिने दाबी गरे।
सभापति पन्तले कार्यक्रममा देखिएको उल्लेखनीय पार्टी सदस्य तथा शुभेच्छुकहरूको उपस्थितिले आफू र पार्टीलाई थप हौसला मिलेको उल्लेख गर्दै पर्साका चारै निर्वाचन क्षेत्रमा रास्वपाको जित सुनिश्चित हुने विश्वास व्यक्त गरे।
सयौं रास्वपा सदस्य तथा शुभेच्छुकहरूको सहभागिता रहेको उक्त कार्यक्रममा जिल्ला सचिव सुदिश प्रजापति, क्षेत्रीय सभापति राम आर्या, फैयाद मिया लगायतका नेताहरूको उपस्थिति रहेको थियो। कार्यक्रम सहसचिव कृष्ण पास्वानले सञ्चालन गरेका थिए भने महानगर सभापति अमन आलमको सभापतित्वमा सम्पन्न भएको थियो।
