वीरगंज। पर्सा निर्वाचन क्षेत्र नम्बर–२ मा शनिबार वीरगंज महानगरपालिका–१७ अलौमा आयोजित घरदैलो कार्यक्रम केवल राजनीतिक अभियान मात्र नभई उम्मेदवार र जनताबीचको आत्मीय मिलनको उत्सव जस्तै बन्यो ।
घरदैलोका क्रममा टोल–टोलमा पुगेकी रिमा कुमारी यादवलाई स्थानीय आमा–दिदीबहिनी र वृद्धवृद्धाहरूले “लक्ष्मीको स्वरूप” भन्दै खुलेर समर्थन जनाए । मतदाताहरूले उनलाई फूलमाला र अबिर मात्र होइन, जितको शुभकामना स्वरूप दही र मिठाई (सगुन) खुवाएर सम्मान पनि प्रकट गरे।
यादवले भाषणमा व्यस्त नेताहरूको विपरीत स्थानीयका समस्या र गुनासो ध्यानपूर्वक सुन्दै भनिन्, “म भाषणमा होइन, काममा विश्वास गर्छु। तपाईँहरूले दिनुभएको विश्वास नै मेरो सबैभन्दा ठूलो शक्ति हो।” उनले महिलाको आवाज सदनसम्म पुर्याउने र शिक्षा, स्वास्थ्य, सडक तथा रोजगारीमा ठोस परिवर्तन ल्याउन फागुन २१ गते ‘सूर्य’ चिह्नमा मतदान गर्न आग्रह गरिन्।
कार्यक्रममा नेकपा एमालेका केन्द्रीय सदस्य विजय सरावगी, समानुपातिक उम्मेदवार बिचारी यादव, वडा नम्बर–१७ का वडा अध्यक्ष संजु छत्कुली, युवा नेताहरू मुकेश द्विवेदी, अजय साह, पिन्टु उपाध्याय, अमल यादव, प्रधुमन यादव र विकी सिंह सहित समर्थकहरूको ठूलो उपस्थिति रहेकाे थियाे ।
