वीरगंज। लेखक दिनेश गुप्ताद्वारा स्थापित ‘दिनेश गुप्ता प्रतिभा पुरस्कार’ को पहिलो वर्षको सम्मान भोजपुरी साहित्यका उदीयमान स्रष्टा सुभाष कुमार बैठालाई प्रदान गरिने भएको छ।
बैठाका भोजपुरी भाषामा प्रकाशित कृतिहरू ‘गांव’ (उपन्यास) र ‘लडाई जिनगी के’ (कविता संग्रह)ले साहित्य क्षेत्रमा विशेष चर्चा कमाएका छन्। निर्णायक मण्डलले ग्रामीण परिवेशप्रतिको गहिरो बुझाइ र भोजपुरी भाषामा रहेको पकडलाई उच्च मूल्यांकन गर्दै उनलाई पुरस्कारका लागि योग्य ठहर गरेको जनाएको छ।
पुरस्कारको घोषणा गर्दै गुप्ताले बैठाको मातृभाषाप्रतिको समर्पणको प्रशंसा गरे । उनले बैठाका कृतिहरूले समाजको यथार्थ चित्रण गर्दै भोजपुरी साहित्यलाई समृद्ध बनाएको उल्लेख गरे।
पुरस्कारको राशी तथा सम्मान समारोहको मिति छिट्टै सार्वजनिक गरिने जानकारी आयोजकले दिएका छन् ।
