वीरगंज । पर्सा निर्वाचन क्षेत्र नम्बर–२ अन्तर्गत बहुदरमाई नगरपालिका वडा नं. ४ डकैला बहुवारीमा नेपाल कम्युनिस्ट पार्टी (एमाले) को सम्पर्क कार्यालय उद्घाटन गरिएको छ। एमाले बहुदरमाई नगरपालिकाका अध्यक्ष प्रमोद कुशवाहाको अध्यक्षतामा सम्पन्न कार्यक्रममा पर्सा क्षेत्र नं. २ की उम्मेदवार रिमा कुमारी यादवले कार्यालयको उद्घाटन गरिन् ।
स्थानीय तहमा पार्टी संगठन सुदृढ गर्ने तथा जनतासँग प्रत्यक्ष समन्वय बढाउने उद्देश्यले कार्यालय स्थापना गरिएको उम्मेदवार यादवले जानकारी दिइन् । कार्यक्रममा बोल्दै उनले वडा तहसम्म संगठन बलियो बनाउँदै जनताको समस्या समाधानमा प्रत्यक्ष रूपमा काम गर्ने लक्ष्यका साथ सम्पर्क कार्यालय स्थापना गरिएको बताइन् । विकास, शिक्षा, रोजगारी तथा आधारभूत पूर्वाधार विस्तारलाई प्राथमिकतामा राखिने उनको भनाइ थियो।
कार्यक्रममा विशेष अतिथिका रूपमा सहभागी पर्सा क्षेत्र नं. १ का उम्मेदवार एवं पूर्व मन्त्री प्रदिप यादवले आगामी निर्वाचनमा पर्सा २ की उम्मेदवार रिमालाई विजयी गराउन कार्यकर्ता र मतदातालाई एकजुट हुन आग्रह गरे । उनले क्षेत्रको समग्र विकासका लागि सक्षम नेतृत्व आवश्यक रहेको उल्लेख गरे ।
उद्घाटन कार्यक्रममा एमालेका केन्द्रीय सदस्य विजय सरावागी, मधेश प्रदेश उपाध्यक्ष बिचारी यादव, बहुदरमाई नगरपालिकाका मेयर सिंघासन साह, युवा नेता मुकेश दुबेदी, लियाकत अली, अजय लगायत स्थानीय नेता तथा कार्यकर्ताको उल्लेखनीय सहभागिता रहेको थियो।
