वीरगंज। पर्सा निर्वाचन क्षेत्र नम्बर–२ मा जनता समाजवादी पार्टी का प्रतिनिधिसभा सदस्य उम्मेदवार अशोक टेमानीले घरदैलो अभियान तीव्र पार्दै वीरगंज महानगरपालिका वडा नम्बर–२५ का मतदातासँग प्रत्यक्ष संवाद गरेका छन्।
घरदैलोका क्रममा टेमानीले स्थानीयवासीको समस्या, आवश्यकता र अपेक्षाबारे विस्तृत जानकारी लिएका थिए। उनले विकास, रोजगारी, शिक्षा, स्वास्थ्य र आधारभूत सेवामा पहुँच अभावले ग्रामीण क्षेत्रका बासिन्दा अझै समस्या भोग्न बाध्य भएको भन्दै ती समस्याको समाधानलाई प्राथमिकतामा राख्ने प्रतिबद्धता व्यक्त गरे।
स्थानीय कृषकहरूले मल, बीउ र सिँचाइ सुविधा नपाउँदा उत्पादन घटेको, स्वास्थ्य सेवा पहुँच कमजोर रहेको र विद्यालयमा पूर्वाधारको कमी भएको गुनासो गरेका थिए। टेमानीले यी समस्या समाधानका लागि योजनाबद्ध रूपमा काम गर्ने बताए।
यसैक्रममा वडा नं. २५ का करिब १५० जना युवाहरू जनता समाजवादी पार्टी मा प्रवेश गरेका छन्। नवप्रवेशी युवाहरूलाई स्वागत गर्दै उम्मेदवारले युवाको सक्रिय सहभागिताले पार्टी र अभियानलाई ऊर्जा दिएको उल्लेख गरे।
घरदैलो कार्यक्रममा सहभागी स्थानीय मतदाताहरूले आफ्ना समस्या सुन्न उम्मेदवार आएकोमा सकारात्मक प्रतिक्रिया दिएका थिए। टेमानीले आगामी दिनमा पनि क्षेत्रका विभिन्न वडामा प्रत्यक्ष संवादलाई निरन्तरता दिने प्रतिबद्धता व्यक्त गरे।
