वीरगंज। पर्सा जिल्लामा टोलटोलका स्थानीयहरू स्वस्फूर्त रूपमा राष्ट्रिय स्वतन्त्र पार्टी (रास्वपा) का प्रतिनिधिहरू खोज्दै पार्टी प्रवेश गर्न थालेका छन् । रास्वपाका वरिष्ठ नेता बालेन साहको वीरगंज रोड शोपछि जिल्लामा रास्वपाप्रति आकर्षण ह्वात्तै बढेको बताइएको छ ।
यसैक्रममा पर्सा निर्वाचन क्षेत्र नं. १ अन्तर्गत शुक्रबार राति परवानीपुर र शनिबार बिहान भिस्वामा आयोजित छुट्टाछुट्टै कार्यक्रममा ५०० भन्दा बढी पेशाकर्मी, अभियन्ता तथा समाजसेवी रास्वपामा प्रवेश गरेका छन् ।
परवानीपुरमा स्थानीय अभियन्ता प्रदीप साहको नेतृत्वमा शुक्रबार अबेर राति आयोजित कार्यक्रम तथा भिस्वामा कृष्ण श्रेष्ठ, सन्देश श्रेष्ठ र राजेश श्रेष्ठको नेतृत्वमा शनिबार बिहान सम्पन्न कार्यक्रममा विभिन्न क्षेत्रका विशिष्ट व्यक्तित्वहरूलाई रास्वपा पर्सा जिल्ला सभापति एवं पर्सा–१ का प्रतिनिधिसभा सदस्य उम्मेदवार हरि पन्तले पार्टीमा स्वागत गरेका थिए।
कार्यक्रमलाई सम्बोधन गर्दै सभापति पन्तले पुराना दल र तिनका उम्मेदवारहरूलाई यसपालिको निर्वाचनमा बहिष्कार गर्न मतदातालाई आग्रह गरे।
त्यसैगरी, उम्मेदवार पन्तले गहवामा घरदैलो कार्यक्रम सञ्चालन गर्दै मतदातासँग भेटघाट गरेका छन् । घरदैलोका क्रममा स्थानीयहरूले टीका, माला र खादा लगाएर स्वागत गरेका थिए । कार्यक्रममा उल्लेख्य स्थानीय सहभागिता रहेको जनाइएको छ।
