वीरगंज । पर्सा जिल्लाका चार वटै प्रतिनिधिसभा निर्वाचन क्षेत्रमा मतगणना सुरु भएको छ । पर्सा क्षेत्र नं. १ र २ को मतगणना वीरगंजस्थित ठाकुर राम बहुमुखी क्याम्पसमा तथा क्षेत्र नं. ३ र ४ को मतगणना पोखरियास्थित श्री जिल्ला उच्चांगल रामदेव कलवार माध्यमिक विद्यालयमा सुरु भएको मुख्य निर्वाचन अधिकृत गायत्रीप्रसाद रेग्मीले जानकारी दिएका छन्।
प्रारम्भिक मतपरिणामअनुसार पर्सा क्षेत्र नम्बर १, २ र ३ मा राष्ट्रिय स्वतन्त्र पार्टी (रास्वपा) का उम्मेदवारले अग्रता लिएका छन्।
पर्सा क्षेत्र नं. १ मा रास्वपाका हरि पन्तले ७९३ मत प्राप्त गरि अग्रस्थानमा छन् । नेपाली कांग्रेसका अनिल रुंगटाले ४८० मत प्राप्त गरि दाेस्राे र नेकपा एमालेका उम्मेदवार पूर्व मन्त्री प्रदिप यादवले ४०५ मत प्राप्त गरि तेस्राे स्थानमा छन् । कांग्रेसका रुंगटा भन्दा ३१३ मतले अगाडी रहेका छन् ।
यसैगरी पर्सा क्षेत्र नं. २ मा रास्वपाका उम्मेदवार सुशिल साह कानुले १२७७ मत प्राप्त गर्दै अग्रस्थानमा रहेका छन्। नेकपा एमालेकी रिमा यादवले १०५६ मत प्राप्त गरेकी छन् भने नेपाली कांग्रेसका पूर्व मन्त्री अजय चौरसियाले ६८३ मत प्राप्त गरेका छन्। हालसम्मको गणनामा सुशिल साह कानु एमालेकी रिमा यादवभन्दा २२१ मतले अगाडि रहेका छन्।
त्यस्तै पर्सा क्षेत्र नं. ३ मा पनि रास्वपाका रामाकान्त चौरसिया अग्रस्थानमा रहेका छन् । उनले १०५१ मत प्राप्त गरेका छन् भने नेपाली कांग्रेसका सुरेन्द्र चौधरीले ७७१ मत ल्याएर दोस्रो स्थानमा रहेका छन् । रामाकान्त चौरसिया कांग्रेसका चौधरीभन्दा २८० मतले अगाडि छन् । यसैगरी नेकपा एमालेका रुपेश पाण्डेले २३८ मत प्राप्त गरी तेस्रो स्थानमा रहेका छन्।
पर्सा क्षेत्र नं. ४ मा पनि मतगणना सुरु भइसकेको भएपनि हालसम्म त्यहाँको आधिकारिक मतपरिणाम भने सार्वजनिक भएको छैन।
