वीरगंज । वीरगंजका विभिन्न खाजा होटलहरूमा अस्वस्थ तथा चोट लागेको कुखुराको मासु प्रयोग गरेर परिकार तयार गरिँदै आएको तथ्य सार्वजनिक भएपछि उपभोक्ताहरूमा गम्भीर चिन्ता बढेको छ। विशेषगरी “चिकेन ललिपप” जस्तो लोकप्रिय परिकारमा यस्तो मासु प्रयोग भइरहेको भेटिएपछि खाद्य सुरक्षामाथि प्रश्न उठेको हो।
स्थानीय स्रोतका अनुसार, वीरगंजस्थित Food Garden नामक खाजा होटलमा ग्राहकलाई पस्किएको चिकेन ललिपपमा कुखुराको शरीरमा स्पष्ट रूपमा चोट लागेको भाग फेला परेको छ । उक्त घटना सार्वजनिक भएसँगै होटलको खाद्य गुणस्तर र सरसफाइबारे व्यापक आलोचना सुरु भएको छ।
ग्राहकहरूले यस्तो लापरबाहीले स्वास्थ्यमा प्रत्यक्ष असर पर्ने भन्दै सम्बन्धित निकायलाई तत्काल छानबिन गरी आवश्यक कारबाही गर्न माग गरेका छन् । चिकित्सकहरूका अनुसार अस्वस्थ कुखुराको मासु सेवन गर्दा विभिन्न संक्रमणजन्य रोग लाग्ने जोखिम उच्च रहन्छ।
यस घटनाले होटल व्यवसायीहरूको जिम्मेवारी र उत्तरदायित्वमाथि पनि प्रश्न खडा गरेको छ । गुणस्तरहीन तथा असुरक्षित खाद्य सामग्री प्रयोग गर्नु उपभोक्ता अधिकारको स्पष्ट उल्लंघन भएको भन्दै सरोकारवालाहरूले कडा अनुगमन र कारबाहीको माग गरेका छन्।
उपभोक्ता अधिकारकर्मीहरूले खाद्य प्रविधि तथा गुण नियन्त्रण कार्यालयलगायत सम्बन्धित निकायलाई बजार अनुगमन तीव्र बनाउन आग्रह गरेका छन् । दोषी व्यवसायीलाई कानुनी दायरामा ल्याई कडा कारबाही गर्नुपर्नेमा उनीहरूले जोड दिएका छन्।
स्थानीय प्रशासनले यस्ता घटनालाई गम्भीरतापूर्वक लिँदै छानबिन प्रक्रिया अघि बढाउनुपर्ने आवश्यकता देखिएको छ। उपभोक्ताको स्वास्थ्यसँग प्रत्यक्ष जोडिएको विषय भएकाले अब ढिलाइ नगरी प्रभावकारी कदम चाल्नुपर्नेमा सर्वत्र आवाज उठिरहेको छ।
