वीरगंज । वीरगंज १६ नगवा निवासी खुश्बू श्रीवास्तवले आफू र आफ्नो परिवारमाथि भएको कुटपिट घटनामा प्रहरी प्रशासनले बेवास्ता गरेको आरोप लगाएकी छन्। उनले बुधबार पत्रकार सम्मेलन गर्दै पटक–पटक आक्रमण हुँदा पनि दोषीमाथि कारबाही नभएको गुनासो गरेकी हुन्।
उनका अनुसार, भारतको बिहार राज्य चनपटियाका स्थायी बासिन्दा भई हाल वीरगंज–१६ मा बसोबास गर्दै आएका केहि व्यक्तिहरूले विना कारण आफू र आफ्नो परिवारमाथि आक्रमण गर्दै आएको आरोप लगाइएको छ।
उनका अनुसार २०८२ असार २९ गते घरमै प्रवेश गरी कुटपिट गर्दा उनका श्रीमानको दाहिने कानको श्रवण शक्ति करिब ७० प्रतिशत गुमेको दाबी गरिएको छ । उक्त घटनाको जाहेरी लिएर जिल्ला प्रहरी कार्यालय पर्सा पुग्दा समेत उचित छानबिन नभएको उनले बताएकी छन्।
न्याय नपाएपछि उच्च अदालत जनकपुरको अस्थायी इजलास वीरगंजमा रिट दायर गरिएको र अदालतले आफ्नो पक्षमा आदेश जारी गरेको उनले उल्लेख गरेकी छन् । तर त्यसपछि पनि पुनः घरमै आक्रमण भई श्रीमान र वृद्ध ससुरा घाइते भएको दाबी गरिएको छ।
घटनापछि प्रहरी चौकी, वडा प्रहरी कार्यालय र जिल्ला प्रहरी कार्यालय धाउँदा पनि मुद्दा दर्ता र अनुसन्धानमा ढिलाइ भएको गुनासाे उनकाे छ । सम्बन्धित निकायले आश्वासन दिए पनि अहिलेसम्म ठोस कारबाही नभएको पीडितको भनाइ छ।
श्रीवास्तवले प्रहरी प्रशासनमाथि प्रश्न उठाउँदै पीडितमाथि अन्याय हुँदा पनि किन मौन बसेको भन्दै निष्पक्ष छानबिन र दोषीमाथि कारबाहीको माग गरेकी छन्।
