वीरगंज । पर्सा जिल्लामा क्रियाशील विभिन्न राजनीतिक दलहरूले प्रतिनिधिसभा सदस्य उम्मेदवार मनोज कुमार चौधरीसँग सम्बन्धित घटनालाई लिएर संयुक्त प्रेस विज्ञप्ति जारी गर्दै निष्पक्ष अनुसन्धानको माग गरेका छन्।
नेपाली कम्युनिष्ट पार्टी पर्साको आयोजनामा चैत्र ३ गते बसेको सर्वदलीय बैठकले उक्त घटनाबारे आफ्नो धारणा सार्वजनिक गर्दै सम्बन्धित निकायको ध्यानाकर्षण गराएको हो । विज्ञप्तिमा चौधरीलाई एक असल, मिलनसार तथा सक्रिय राजनीतिक अगुवाका रूपमा उल्लेख गरिएको छ ।
विज्ञप्ति अनुसार २०८२ फागुन १९ गते साँझ वीरगंज फर्किने क्रममा सुरक्षा जाँचका क्रममा चौधरी सवार गाडीको डिकीबाट संकास्पद वस्तु फेला परेको भन्दै उनीसहित चार जनालाई प्रहरीले नियन्त्रणमा लिएको थियो । तर १६ दिनसम्मको अनुसन्धानपछि पनि उक्त वस्तु के हो ? कसले राखेको हो ? र किन राखिएको हो ? भन्ने विषय स्पष्ट हुन नसकेको भन्दै दलहरूले चिन्ता व्यक्त गरेका छन्।
राजनीतिक व्यक्तित्व र प्रतिनिधिसभा उम्मेदवार नै रहेको अवस्थामा आफ्नै गाडीमा विस्फोटक पदार्थ राखेर हिँड्नु अस्वाभाविक देखिने भन्दै विज्ञप्तिमा यस घटनामा षड्यन्त्रको आशंका गरिएको छ । साथै घटनाको भोलिपल्ट अर्को स्थानमा फेला परेको वस्तुसँग जोडेर घटनालाई थप जटिल बनाउने प्रयास भइरहेको संकेत पनि गरिएको छ ।
दलहरूले अनुसन्धानको नाममा समय लम्ब्याएर मनोवैज्ञानिक दबाब सिर्जना गरिँदै निर्दोष व्यक्तिहरूलाई फसाउने प्रयास भइरहेको हुनसक्ने आशंका व्यक्त गरेका छन् । उनीहरूले सम्बन्धित निकायलाई ढिलाइ नगरी निष्पक्ष छानबिन गरी यथाशीघ्र न्यायिक प्रक्रिया अगाडि बढाउन आग्रह गरेका छन् ।
“ढिलो गर्नु न्याय नदिनु सरह हो,” भन्दै विज्ञप्तिमा अविलम्ब घटना प्रतिवेदन सम्बन्धित निकायमा पेश गर्न माग गरिएको छ। साथै आफ्नो सदासयतालाई कमजोरी नठान्न चेतावनी दिँदै अन्यथा अवस्था सिर्जना भए थप कदम चाल्न बाध्य हुने पनि उल्लेख गरिएको छ ।
उक्त विज्ञप्तिमा नेपाली काँग्रेसका रामनारायण कुर्मी, नेकपा (एमाले) का सुन्दर कुर्मी, जसपा नेपालका रामनरेश यादव, जसपाका तबरेज अहमद, जनमत पार्टीका ओमप्रकाश सर्राफ, प्रलोपाका अभिताभ बचन दास, राप्रपाका पन्नालाल पटेल, राष्ट्रिय जनमोर्चाका हिमाल चन्द्र गाैतम, वैज्ञानिक समाजवादी पार्टीका धन बहादुर श्रेष्ठ, पिपुल फस्ट पार्टीका बिरेन्द्र कण्ठ तथा नेपाली कम्युनिष्ट पार्टीका बालगाेपाल थापा र रामदरश कुशवाहाले हस्ताक्षर गरेका छन् ।
यसैबीच यी सबै दलका प्रतिनिधिहरुले घटनाको सम्बन्धमा पर्साका प्रमुख जिल्ला अधिकारी भोला दाहालसंंग भेट गरि छ्लफल गरेका छन् । सो छ्लफलमा पर्सा प्रहरी प्रमुख प्रहरी उपरीक्षक सुदिप राज पाठक लगायतको पनि उपस्थिति रहेको थियो ।
