वीरगंज । पर्साको जगरनाथपुर गाउँपालिकामा लामखुट्टे नियन्त्रणका लागि औषधि छर्ने (स्प्रे गर्ने) अभियान सुरु गरिएको छ। गाउँपालिका कार्यालयले वडा नं. ५ मसिहानीबाट मंगलबारदेखि अभियानको सुरुवात गरेको हो।
गाउँपालिका अध्यक्ष श्रीकान्त प्रसाद यादवले स्प्रे कार्यको उद्घाटन गर्दै गाउँपालिकाका सबै वडामा क्रमशः औषधि छर्ने कार्यक्रम सञ्चालन गरिने जानकारी दिए । उनले यस अभियानले डेंगु, मलेरिया लगायत लामखुट्टेबाट सर्ने रोग नियन्त्रणमा सहयोग पुग्ने विश्वास व्यक्त गरे।
गाउँपालिकाबासीबाट लामखुट्टेको प्रकोप बढेको गुनासो आएपछि उक्त अभियान सुरु गरिएको गाउँपालिकाले जनाएको छ।
साथै, गाउँपालिकाले स्प्रे गर्ने क्रममा झ्याल–ढोका खुला राख्न र आवश्यक सावधानी अपनाउन आग्रह गरेको छ। बालबालिका, वृद्धवृद्धा तथा पशुपन्छीको सुरक्षामा विशेष ध्यान दिन समेत अनुरोध गरिएको छ।
