वीरगंज । पर्साको कालिकामाई गाउँपालिका वडा नं. ४ बलुवामा मंगलबार “लागू औषध विरुद्ध जनचेतना अभियान” अन्तर्गत प्रशिक्षण कार्यक्रम सम्पन्न भएको छ। कालिकामाई युवा समाजले इलाका प्रहरी कार्यालय पोखरियाको सहकार्यमा श्री ने.रा.मा.वि. कट्टिबलुवामा कार्यक्रम आयोजना गरेको हो।
कार्यक्रममा युवा समाजका अध्यक्ष आकाश चौरसियाले पछिल्लो समय युवा तथा बालबालिकाहरू लागू औषधको लतमा फस्दै गएको उल्लेख गर्दै पहिलो चरणमा पालिकाभित्रका सबै विद्यालयमा प्रशिक्षण सम्पन्न गरिएको र दोस्रो चरणमा स्थानीय सरकारसँग सहकार्य गरी अभियानलाई अझ प्रभावकारी बनाउने योजना रहेको बताए।
कालिकामाई गाउँपालिकाकी उपाध्यक्ष राजमति देवी बरैनीले लागू औषधको दुष्प्रभावले युवा मात्र होइन, परिवार नै प्रभावित हुने भएकाले यसबाट टाढा रहन आग्रह गरिन्। उनले अभियान सफल बनाउन आफू सदैव सहयोग गर्न तयार रहेको पनि बताइन्।
इलाका प्रहरी कार्यालय पोखरियाका प्रमुख प्रहरी निरीक्षक प्रदीप पौडेलले लागू औषधको परिभाषा, यसको बेफाइदा, लत लाग्ने कारण, नियन्त्रणका उपाय तथा कानुनी प्रावधानबारे विस्तृत प्रशिक्षण दिएका थिए।
कार्यक्रमका क्रममा विद्यालय आसपासका पसलेहरूलाई लागू औषधसँग सम्बन्धित वस्तु बिक्री नगर्न चेतावनी दिँदै प्रहरीले उल्लंघन भए कडा कानुनी कारबाही गरिने स्पष्ट पारेको छ।
कालिकामाई युवा समाजका अध्यक्ष आकाश चौरसियाको अध्यक्षता तथा उपाध्यक्ष राजमति देवी बरैनीको प्रमुख आतिथ्यतामा सम्पन्न कार्यक्रममा विद्यालयका प्रधानाध्यापक इन्द्रदेव कुर्मी, राधाकिसुन प्रसाद चौरसिया, कट्टी बेस क्याम्पका सहायक प्रहरी निरीक्षक उपेन्द्र यादव, युवा समाजका पदाधिकारीहरू तथा ठूलो संख्यामा शिक्षक–विद्यार्थीहरूको सहभागिता रहेको सदस्य मोहन महतोले जानकारी दिए।
