वीरगंज । नेपाली कम्युनिष्ट पार्टी (नेकपा) का नेता मनोज चौधरी पक्राउ प्रकरणलाई लिएर मंगलबार वीरगंजमा सर्वदलीय बैठक सम्पन्न भएको छ। नेकपाको आयोजनामा बसेको बैठकले चौधरी पक्राउ सम्बन्धमा साझा धारणा बनाउँदै राजनीतिक रूपमा प्रतिवाद गर्ने निर्णय गरेको हो।
बैठकले पर्साका प्रहरी प्रमुख प्रहरी उपरीक्षक सुदिप राज पाठकको राजनीतिक दल तथा नेताप्रति दृष्टिकोण सकारात्मक नरहेको निष्कर्ष निकाल्दै त्यहीँ कारणले मनाेज चाैधरी पक्राउ प्रकरणकाे अनुसन्धान प्रक्रिया ढिलो भइरहेको समेत आरोप लगाएको छ । बैठकको बुझाइमा चौधरी पक्राउ प्रकरणमा अनुसन्धान गर्न र प्रतिवेदन बुझाउन प्रहरीले अनावश्यक ढिलाइ गरेको छ।
बैठकमा बोल्ने नेताहरूले प्रहरी उपरिक्षक पाठक पर्सा प्रहरी प्रमुख भएर आएदेखि राजनीतिक दलका नेताहरूको कुरा नसुन्ने, जनताका समस्या लिएर जाँदा समेत राम्रो व्यवहार नगर्ने गरेको गुनासो गरेका थिए।
पर्साका विभिन्न राजनीतिक दलका जिल्ला प्रमुख तथा प्रतिनिधिहरू सहभागी बैठकले प्रहरी उपरीक्षक पाठकको कार्यशैलीप्रति असन्तुष्टि जनाउँदै मनाेज चाैधरी पक्राउ प्रकरणकाे सम्बन्धमा बुधबार पर्साका प्रमुख जिल्ला अधिकारीसमक्ष डेलिकेसन जाने निर्णय पनि गरेको छ।
त्यसैगरी, बैठकले गत फागुन २१ गते सम्पन्न प्रतिनिधिसभा सदस्य निर्वाचनमा पर्सा क्षेत्र नं. २ मा उम्मेदवार समेत रहेका मनोज चौधरीले आफ्नै गाडीमा बम राखेर हिँड्न नसक्ने भन्दै उनलाई फसाउन षड्यन्त्र गरिएको हुन सक्ने निष्कर्ष निकालेको छ। घटनाको यथाशीघ्र निष्पक्ष अनुसन्धान गरी पर्सा जिल्ला अदालतमा प्रतिवेदन पेश गर्न माग गर्ने निर्णय गरिएको बैठकमा सहभागी नेपाली कांग्रेस पर्साका कार्यवाहक सभापति रामनारायण कुर्मीले जानकारी दिए।
बैठकका निर्णयहरू बुधबार संयुक्त प्रेस विज्ञप्तिमार्फत सार्वजनिक गरिने र सोही दिन प्रमुख जिल्ला अधिकारी भोला दाहालसँग भेटेर मागहरू पेश गरिने उनले बताए।
वीरगंजस्थित नेपाल पत्रकार महासंघको सभा हलमा बसेको बैठकमा नेकपाका केन्द्रीय सदस्यहरू नागेन्द्र चौधरी, रामचन्द्र साह, बालगोपाल थापा, बृजलाल पासवान, पिएल श्रेष्ठ, गंगा खड्का, नेकपा पर्साका रामदरश कुशवाहा, नेपाली कांग्रेस पर्साका कार्यवाहक सभापति रामनारायण कुर्मी, नेकपा एमालेका सुन्दर कुर्मी, जनता समाजवादी पार्टी नेपालका जिल्ला अध्यक्ष रामनरेश यादव, जनमत पार्टीका जिल्ला अध्यक्ष ओमप्रकाश सर्राफ, राष्ट्रिय प्रजातन्त्र पार्टीका जिल्ला सचिव पानालाल पटेल, जनता समाजवादी पार्टीका तबरेज अहमद, प्रगतिशील लोकतान्त्रिक पार्टीका अमिताभ बचन दास, वैज्ञानिक समाजवादी कम्युनिष्ट पार्टीका जिल्ला संयोजक धनबहादुर श्रेष्ठ तथा राष्ट्रिय जनमोर्चाका जिल्ला संयोजक हिमाल चन्द्र गौतमलगायतको उपस्थिति रहेको थियो।
फागुन १९ गते नेता चौधरी सवार बा १० च १२५० नम्बरको गाडीमा शंकास्पद वस्तु फेला परेको आरोपमा उनीसहित नेकपा नेता सत्यनारायण थारु, सुरज कार्की र चालक साहब आलम अन्सारी विगत १५ दिनदेखि जिल्ला प्रहरी कार्यालय पर्साको हिरासतमा छन्। प्रहरीले निर्वाचन र विस्फोटक पदार्थ सम्बन्धी कसुरमा तेस्रो पटक चार दिनको म्याद थप गरी अनुसन्धान गरिरहेको जनाएको छ।
नेता चौधरीलाई फसाउने षड्यन्त्र भएको भन्दै सामाजिक सञ्जालमा आवाज उठ्न थालेपछि राजनीतिक दलहरू सक्रिय भएका हुन्।
