वीरगंज । पर्साबाट एक जना महिला समानुपातिक प्रतिनिधिसभा सदस्यमा निर्वाचित भएकी छन् । राष्ट्रिय स्वतन्त्र पार्टी (रास्वपा) बाट पर्साको पकहाँ मैनपुर गाउँपालिका वडा नं. १ धोरे निवासी ३५ वर्षीया सुनिता कुमारी चौधरी समानुपातिक तर्फबाट प्रतिनिधिसभा सदस्यमा निर्वाचित भएकी हुन् ।
निर्वाचन आयोगले आज सार्वजनिक गरेको समानुपातिक निर्वाचनतर्फ निर्वाचित उम्मेदवारहरूको नामावलीमा चौधरीको नाम ५४ नम्बरमा समावेश गरिएको छ । आयोगका अनुसार उनी समावेशी समूह अन्तर्गत मधेशी कोटाबाट निर्वाचित भएकी हुन् ।
निर्वाचन आयोगले सार्वजनिक गरेको विवरण अनुसार रास्वपाले बुझाएको समानुपातिक तर्फको बन्दसूचीमा चौधरीको नाम १०१ नम्बरमा रहेको थियो ।
फागुन २१ गते सम्पन्न प्रतिनिधिसभा सदस्य निर्वाचनमा रास्वपाले पर्सामा सबैभन्दा बढी एक लाख ३६ हजार ८९३ मत प्राप्त गरेको थियो । यसपटकको निर्वाचनमा समानुपातिक तर्फबाट पर्साबाट चौधरी एक मात्र सांसद बन्न सफल भएकी छन् ।
