वीरगंज । जेनजी आन्दोलनका समर्थकहरूले शुक्रबार वीरगंजमा खबरदारी बाइक र्याली आयोजना गर्न लागेका छन् । वीरगंजकाे लालबंगला–घण्टाघरबाट बिहान ११:०० बजे र्यालि निस्कने जनाइएकाे छ।

आयाेजक कमन जेनजी र जेन जेड नेपालका अनुसार, सरकारले प्रस्तुत गरेको सम्झौतापत्रले जेनजी जनआन्दोलनको मूल मर्म, मुद्दा र जनआवाजलाई पूर्ण रूपमा बेवास्ता गरेको छ । उनीहरूले फेक आइडीबाट प्रस्तावित र अदृश्य शक्तिबाट संचालित सुशीला सरकारसँग भएको सम्झौतालाई अस्वीकार्य ठहर गर्दै युवाहरूलाई र्यालीमा सहभागि हुन आव्हान गरेका छन्।

र्यालीमार्फत युवाहरूले “हत्यारा र भ्रष्टाचारीलाई कारबाही गर” र “जेनजी आन्दोलनलाई संस्थागत गर” भन्ने मूल नारा अघि सारेका छन्।  आयोजकहरूले सम्पूर्ण युवाहरूलाई आन्दोलनको औचित्यपूर्ण समर्थनका लागि उपस्थित हुन अनुरोध गरेका छन् ।

वीरगंज । वीरगंज महानगरपालिका–१० घडिर्वा पोखरी नजिक अवस्थित ऐतिहासिक तथा सांस्कृतिक महत्त्व बोकेको राम–जानकी मन्दिरको स्वन्दिकरण तथा दीर्घकालीन विकास योजनालाई गति दिन बिहिबार मेयर राजेशमान सिंहले स्थलगत अवलोकन तथा अनुगमन गरेका छन्।

वडा अध्यक्ष सुशील साहको विशेष उपस्थितिमा गरिएको अनुगमनका क्रममा मेयर सिंहले स्थानीय बासिन्दाहरूसँग प्रत्यक्ष संवाद गर्दै मन्दिरको वर्तमान अवस्था, पूर्वाधार अभाव, संरचनागत कमजोरी, पर्यटकीय सम्भावना तथा आगामी योजना सम्बन्धी सुझाव संकलन गरेका थिए।

मन्दिर क्षेत्रलाई सुरक्षित, आकर्षक र व्यवस्थित धार्मिक गन्तव्यका रूपमा विकास गर्ने लक्ष्यसहित मेयर सिंहले मार्ग विस्तार, सोलार तथा आधुनिक बत्ती व्यवस्था, सफाइ सुदृढीकरण, हरियाली विस्तार, ढल निकास, पार्किङ सुविधा तथा संरचनागत सुधारलाई प्राथमिकतामा राखेर तत्काल कार्य अघि बढाउन सम्बन्धित प्राविधिक तथा कार्यान्वयन टोलीलाई स्पष्ट निर्देशन दिए।

स्थानीय समुदायको सुझावलाई आधार बनाउँदै धार्मिक तथा सांस्कृतिक महत्त्व बोकेको राम–जानकी मन्दिरलाई धार्मिक पर्यटनको प्रमुख केन्द्रबिन्दु बनाउन सकिने सम्भावनाबारे मेयर सिंहले जोड दिए । उनले मन्दिर क्षेत्रलाई सहज, सुरक्षित र व्यवस्थित बनाउने कार्यमा महानगर पूर्ण रूपमा प्रतिबद्ध रहेको उल्लेख गर्दै स्वन्दिकरण कार्यलाई छिटो, दिगो र प्रभावकारी रूपमा अघि बढाइने आश्वासन दिए ।