राष्ट्रिय स्वतन्त्र पार्टी पर्साद्वारा भ्रामक उम्मेदवारी प्रचारप्रति चेतावनी

वीरगंज । राष्ट्रिय स्वतन्त्र पार्टी (रास्वपा) पर्साले सामाजिक सञ्जालमा फैलिएको भ्रामक उम्मेदवारी प्रचारप्रति गम्भीर ध्यानाकर्षण भएको जनाएको छ।

पार्टीका अनुसार, विगत केही दिनदेखि केही व्यक्ति तथा समूहहरूले आफूलाई रास्वपाको तर्फबाट वीरगंज महानगरपालिका लगायत अन्य स्थानीय तहका मेयर तथा वडाअध्यक्ष पदका उम्मेदवार भनेर फेसबुक, टिकटक लगायतका सामाजिक सञ्जालमार्फत प्रचारप्रसार गरिरहेका छन्।

यस विषयमा पार्टीले आधिकारिक विज्ञप्ति जारी गर्दै आजको मितिदेखि यस्ता गलत गतिविधि नगर्न र नगराउन सम्बन्धित सबैलाई सचेत गराएको छ। रास्वपा पर्साले हालसम्म कुनै पनि पदका लागि कसैलाई उम्मेदवार नतोकिएको स्पष्ट पारेको छ।

जिल्ला सचिव सुदिश प्रजापतिले प्रेस विज्ञप्ति जारी गर्दै पार्टीले यस्ता भ्रामक, कपोलकल्पित र गलत सूचनामा विश्वास नगर्न आम सर्वसाधारणलाई आग्रह गर्दै त्यस्ता व्यक्ति तथा समूहबाट सतर्क रहन समेत अनुरोध गरेको छ।