वीरगंज । विशेष अदालतले शिक्षक चन्देश कुमार चौहानलाई नक्कली प्रमाणपत्र सम्बन्धी मुद्दामा सफाइ दिएको छ।
अख्तियार दुरुपयोग अनुसन्धान आयोगले दायर गरेको मुद्दामा आइतबार सुनुवाइ गर्दै विशेष अदालतका न्यायाधीश नारायणप्रसाद पौडेल र विदुर कोइरालाको संयुक्त इजलासले चौहानलाई आरोपित कसुरबाट मुक्त गर्ने फैसला गरेको हो।
पर्साको पकहाँ मैनपुर गाउँपालिका–३ निवासी ५१ वर्षीय चौहानको शैक्षिक योग्यताको प्रमाणपत्र नक्कली रहेको आरोपमा अख्तियारले जेठ २६ गते विशेष अदालतमा मुद्दा दर्ता गरेको थियो । उक्त मुद्दामा आइतबार सुनुवाइ हुँदा अदालतले आरोप प्रमाणित हुन नसकेको ठहर गर्दै सफाइ दिएको जनाएको छ ।
वीरगंज १ छपकैयास्थित श्री पंडित रामदेनि तिवारी आधारभूत विद्यालयकाे प्रधानाध्यापक रहेका चौहानविरुद्ध अख्तियारले भ्रष्टाचार निवारण ऐन, २०५९ को दफा १६ (१) बमोजिम कैद तथा जरिवाना मागदाबीसहित आरोपपत्र दायर गरेको थियो। तर कसुर प्रमाणित हुन सकेन ।
उक्त फैसलाको जानकारी अदालतले शिक्षा विकास तथा समन्वय इकाई, वीरगंज महानगरपालिकाकाे शिक्षा महाशाखा तथा सम्बन्धित विद्यालयलाई समेत गराइसकेको जनाएको छ।
