वीरगंज । हरि खेतान बहुमुखी क्याम्पस, वीरगंजमा कक्षा ११ र १२ को परीक्षा अन्तिम समयमा स्थगित भएपछि आक्रोशित विद्यार्थीहरूले तोडफोड र प्रदर्शन गरेका छन्। शिक्षक आन्दोलन र क्याम्पस व्यवस्थापनबीचको विवादका कारण परीक्षा दिनबाट वञ्चित भएपछि विद्यार्थीहरू क्याम्पसभित्रै आक्रोश पोख्दै सडकमा उत्रिएका हुन्।
क्याम्पस प्रशासनले आइतबारदेखि परीक्षा सञ्चालन हुने कार्यतालिका सार्वजनिक गरेको थियो । तर बिहान परीक्षा दिन पुगेका विद्यार्थीहरूलाई मूल गेटमै रोकिएको थियो। आन्दोलनरत शिक्षकहरूले परीक्षा रद्द गरिएको भन्दै क्याम्पसभित्र प्रवेश गर्न नदिएपछि विद्यार्थीहरूले क्याम्पस अगाडि प्रदर्शन सुरु गरेका थिए।
प्रदर्शनका क्रममा स्थिति तनावपूर्ण बनेपछि प्रहरीले लाठीचार्ज गर्नुका साथै तीन जना विद्यार्थीलाई नियन्त्रणमा लिएको छ। त्यसपछि झन् आक्रोशित बनेका विद्यार्थीहरूले नाराबाजी गर्दै घण्टाघर चोकसम्म र्याली निकालेका थिए । त्यहाँ पुगेर उनीहरूले चक्काजाम गर्नुका साथै सडकमै धर्ना बसेर टायर बालेर विरोध जनाएका थिए, जसका कारण मुख्य सडक केही समय अवरुद्ध भएको थियो।
आन्दोलनका क्रममा केही विद्यार्थीहरूले क्याम्पसको ना १ क २८८७ नम्बरको बसमा तोडफोड गर्दा ठूलो क्षति पुगेको बताइएको छ।
प्रदर्शनमा सहभागी कक्षा १२ का एक विद्यार्थीले क्याम्पसभित्र विगत एक वर्षदेखि व्यवस्थापन र शिक्षकबीचको विवादका कारण नियमित पठनपाठन र परीक्षा प्रभावित हुँदै आएको गुनासो गरे। “हाम्रो भविष्य अन्योलमा परेको छ, एक वर्षदेखि आन्तरिक परीक्षा पनि हुन सकेको छैन,” उनले भने।
विद्यार्थीहरूले नियमित कक्षा सञ्चालन, समयमै परीक्षा र शैक्षिक वातावरण सुधारको माग गर्दै क्याम्पस प्रमुख र सञ्चालक समितिका अध्यक्षको राजीनामा समेत माग गरेका छन्। ठाकुरराम बहुमुखी क्याम्पसका स्ववियु सभापति राजकुमार यादवले सामुदायिक क्याम्पसलाई निजीकरणतर्फ धकेलिएको आरोप लगाउँदै व्यवस्थापन पक्षको आलोचना गरेका छन्।
