वीरगंज । उज्यालो नेपाल पार्टीको मधेश प्रदेश अध्यक्षमा राम किशोर सिंह ‘पराग’ सर्वसम्मत रूपमा चयन भएका छन्। गत फागुन २१ गते सम्पन्न प्रतिनिधि सभा सदस्य निर्वाचनमा पर्सा क्षेत्र नं. १ का उम्मेदवारसमेत रहेका परागलाई प्रदेश समितिको भेलाले सर्वसम्मत रूपमा मधेश प्रदेशकाे नेतृत्वको जिम्मेवारी दिएको हो।

शनिबार मधेश प्रदेशको राजधानी जनकपुरधाममा सम्पन्न प्रदेश स्तरीय भेलाले परागको नेतृत्वमा ४६ सदस्यीय प्रदेश समिति गठन गरेको हो । नवगठित समितिको उपाध्यक्षमा सिराहाका तारा चौधरी र महोत्तरीका डा. दिपेन्द्र साह चयन भएका छन् । त्यसैगरी सचिवमा धनुषाका बैजनाथ राम, सहसचिवमा सप्तरीका बिश्व कुमार यादव र कोषाध्यक्षमा सर्लाहीकी ममता अचार्य चयन भएका छन् ।

समितिका सदस्यहरूमा पर्साका डा. घनश्याम यादव, मनिष श्रीवास्तव, मधु यादव, सन्दीप पुरी, बाराका भिमबहादुर रुम्बा, सन्तोष कुमार गुप्ता, प्रमोद साही, दीप नारायण यादव, चतुरमान स्याङ्बो, रामनरेश चौधरी, सर्लाहीका हरि प्रसाद देवकोटा, शेरबहादुर भोञ्जन, पंचमान गोले, बलबहादुर गोले लगायत रहेका छन् ।

पार्टीका राष्ट्रिय अध्यक्ष कुलमान घिसिङको विशेष उपस्थितिमा प्रदेश समिति गठन गरिएको प्रदेश अध्यक्ष परागले जानकारी दिए । उनले नवगठित समितिले मधेश प्रदेशमा पार्टी संगठन सुदृढ गर्दै जनताको मुद्दालाई प्राथमिकताका साथ उठाउने प्रतिबद्धता व्यक्त गरे ।

काठमाडौँ । केपी शर्मा ओली र पूर्वगृहमन्त्री रमेश लेखकको पक्राउविरुद्ध सर्वोच्च अदालतमा बन्दीप्रत्यक्षीकरणको रिट दायर भएको छ।

अध्यक्ष ओलीकी पत्नी राधिका शाक्यले ओलीलाई गैरकानुनी रूपमा थुनामा राखिएको भन्दै थुनामुक्त गर्न माग गर्दै सर्वोच्च अदालतमा रिट दायर गर्नुभएको हो। उक्त रिटमाथि भोलि साेमबार सुनुवाइ हुने जनाइएको छ।

सर्वोच्च अदालतका प्रवक्ता अर्जुनप्रसाद कोइरालाका अनुसार पूर्वगृहमन्त्री लेखकलाई पनि गैरकानुनी रूपमा थुनामा राखिएको जिकिरसहित दायर गरिएको रिटमाथि भोलि नै सुनुवाइ हुने भएको छ।