वीरगंज । पर्साको कालिकामाई गाउँपालिका वडा नं. २ भेडिहारी टोलमा अन्तर्राष्ट्रिय दुसाद समाजको पहलमा नेतृत्व सिकाइ तथा अनुभव आदानप्रदान कार्यक्रम सम्पन्न भएको छ।
नेपाल पासवान संघ, पर्साको आयोजनामा सम्पन्न कार्यक्रममा विभिन्न राष्ट्रिय तथा अन्तर्राष्ट्रिय स्तरका पासवान समुदायका अगुवाहरूको सहभागिता रहेको थियो।
कार्यक्रमका प्रमुख अतिथि डा. बिरेन्द्र पासवानले पासवान समुदायबीचको एकताले सिङ्गो दलित मुक्ति आन्दोलनलाई अझ सशक्त बनाउने विश्वास व्यक्त गरे। उनले नेपालका पासवानहरूको हकहितका लागि आफूहरूको संस्था सधैं साथ र सहयोगमा रहने प्रतिबद्धता जनाए।
नेपाल पासवान संघ, पर्साका अध्यक्ष प्रभु पासवानको अध्यक्षतामा सम्पन्न कार्यक्रममा बिश्वेन्द्र पासवान, महेन्द्र पासवान, रन्जित पासवान, विशाल आनन्द, सुमन पासवान लगायतका अतिथिहरूले मन्तव्य व्यक्त गरेका थिए।
त्यसैगरी दलित अगुवा राजाराम पासवान, मटुक पासवान, सोनी देवी, जयकुमार पासवान, कमलेश पासवान, अमरदेव पासवान, श्याम पासवान लगायत स्थानीय अगुवाहरूले पनि समुदायको एकता, नेतृत्व विकास तथा सामाजिक सशक्तीकरणमा जोड दिएका थिए।
कार्यक्रममा सहभागी वक्ताहरूले शिक्षा, नेतृत्व विकास र आपसी सहकार्यलाई मजबुत बनाउँदै दलित समुदायको अधिकार सुनिश्चित गर्न यस्ता कार्यक्रमहरू महत्वपूर्ण हुने धारणा राखेका थिए।
