वीरगंज । जिल्ला प्रहरी कार्यालय पर्साले आफ्नै श्रीमतीमाथि क्रूर आक्रमण गरी खुट्टा काट्ने श्रीमानलाई पक्राउ गरेको जनाएको छ।
प्रहरीका अनुसार मिति २०८२ चैत १ गते बिहान करिब ८:३० बजे पर्सागढी नगरपालिका–३, विरुवा टोल बस्ने ३० वर्षीय विश्वनाथ सहनीले घरायसी विवादका कारण आफ्नी करिब २५ वर्षीया श्रीमती हरिकला देवी सहनीमाथि धारिलो हतियार (दाउ) प्रहार गरेका थिए । आक्रमणका क्रममा उनले श्रीमतीको बायाँ खुट्टा काटेर गम्भीर घाइते बनाएका थिए भने घटनापछि फरार भएका थिए।
घटनाको जानकारी प्राप्त हुनासाथ इलाका प्रहरी कार्यालय पटेर्वासुगौली र स्थानीयवासीको सहयोगमा घाइतेलाई तत्काल उपचारका लागि परवानीपुरस्थित एल.एस. न्यूरो एण्ड जेनेरल हस्पिटल प्रालिमा पठाइएको थियो।
प्रारम्भिक अनुसन्धानका क्रममा फरार रहेका आरोपित विश्वनाथ सहनीलाई शनिबार दिउँसो करिब १२:३० बजे सोही स्थानबाट जिल्ला प्रहरी कार्यालय पर्सा र प्रहरी चौकी बडनिहारबाट खटिएको संयुक्त टोलीले पक्राउ गरेको जिल्ला प्रहरी कार्यालय पर्साका प्रमुख प्रहरी उपरिक्षक सुदिप राज पाठकले जानकारी दिए ।
उक्त घटनामा संलग्न सहनीमाथि ज्यान मार्ने उद्योग तथा कुटपिट अंगभंग सम्बन्धी कसुरमा थप अनुसन्धान भइरहेको प्रहरी उपरिक्षक पाठकले वताए ।
