वीरगंज । भारत सरकारको आर्थिक सहयोगमा धनुषा जिल्लाको मुखियापट्टी मुसहरनिया गाउँपालिका–तुल्सियाहीमा निर्माण गरिएको बैद्यनाथ देवनारायण पब्लिक मोडल माध्यमिक विद्यालयको नयाँ भवन शुक्रबार भव्य समारोहका बीच उद्घाटन गरिएको छ ।

नवनिर्मित विद्यालय भवनको संयुक्त रूपमा उद्घाटन वीरगञ्जस्थित भारतीय महावाणिज्यदूत देवी सहाय मीना र मुखियापट्टी मुसहरनिया गाउँपालिकाका अध्यक्ष जय कुमार यादवले गर्नुभएको हो । उद्घाटन कार्यक्रममा स्थानीय जनप्रतिनिधि, विद्यालय व्यवस्थापन समिति, शिक्षक, विद्यार्थी, अभिभावक तथा विभिन्न सरोकारवालाको उल्लेखनीय उपस्थिति रहेको थियो ।

उक्त विद्यालय भवन तथा सम्बन्धित पूर्वाधार भारत सरकारको सहयोगमा उच्च प्रभाव सामुदायिक विकास परियोजना अन्तर्गत निर्माण गरिएको हो । परियोजनाको कार्यान्वयन मुखियापट्टी मुसहरनिया गाउँपालिकामार्फत गरिएको थियो । चार करोड रुपैयाँभन्दा बढीको लागतमा सम्पन्न भएको यस भवनले स्थानीय स्तरमा शैक्षिक पूर्वाधार सुदृढीकरणमा महत्वपूर्ण योगदान पुर्‍याउने अपेक्षा गरिएको छ ।

बैद्यनाथ देवनारायण पब्लिक मोडल माध्यमिक विद्यालय धनुषा जिल्लाका अग्रणी सरकारी विद्यालयहरूमध्ये एकका रूपमा परिचित छ । विद्यालयमा प्रारम्भिक बालविकासदेखि कक्षा १२ सम्म अध्ययन–अध्यापन हुँदै आएको छ । साथै, प्राविधिक शिक्षा तथा व्यावसायिक तालिम परिषद्सँग आबद्ध भई १८ महिनाको कम्प्युटर प्रि–डिप्लोमा पाठ्यक्रम पनि सञ्चालन हुँदै आएको छ । हाल विद्यालयमा करिब २५ सय विद्यार्थी अध्ययनरत छन्, जसमध्ये करिब ६० प्रतिशत छात्रा रहेका छन् ।

उद्घाटन समारोहलाई सम्बोधन गर्दै भारतीय महावाणिज्यदूत देवी सहाय मीनाले शिक्षा कुनै पनि राष्ट्रको दिगो विकासको आधार भएको उल्लेख गर्नुभयो । उहाँले नेपालको शैक्षिक विकासमा सहयोग गर्न पाउँदा भारत सरकार गर्वान्वित भएको बताउँदै नयाँ विद्यालय भवनले विद्यार्थीलाई सुरक्षित, सहज र गुणस्तरीय सिकाइ वातावरण प्रदान गर्ने विश्वास व्यक्त गर्नुभयो । विशेषगरी बालिका शिक्षा, प्राविधिक तथा व्यावसायिक शिक्षाको विस्तार र ग्रामीण क्षेत्रका युवालाई अवसर प्रदान गर्न यस्ता परियोजनाहरू महत्वपूर्ण हुने उहाँको धारणा थियो ।

कार्यक्रममा बोल्दै मुखियापट्टी मुसहरनिया गाउँपालिकाका अध्यक्ष जय कुमार यादवले भारत सरकारद्वारा प्रदान गरिएको सहयोगप्रति आभार व्यक्त गर्नुभयो । उहाँले नयाँ भवनले विद्यालयको शैक्षिक गुणस्तर सुधार हुनुका साथै स्थानीय समुदायमा शिक्षाप्रति सकारात्मक सोच विकास गर्न टेवा पुग्ने विश्वास व्यक्त गर्नुभयो ।

छिमेकी राष्ट्र भारत र नेपालबीचको बहुआयामिक सहकार्यको उदाहरणका रूपमा यस विद्यालय भवन निर्माणलाई लिइएको छ । उच्च प्रभाव सामुदायिक विकास परियोजनाको सफल कार्यान्वयनले स्थानीय तहमा शिक्षा लगायत प्राथमिक क्षेत्रको पूर्वाधार विकासमा दीर्घकालीन योगदान पुर्‍याउने सरोकारवालाहरूले बताएका छन् ।

सेढवा । पर्साको ठोरी गाउँपालिकाको सुवर्णपुरस्थित ज्ञानवाटिका माध्यमिक विद्यालयमा ५५ लाख रुपैयाँको लागतमा थप चार कोठे पक्की भवन निर्माण हुने भएको छ । सो भवनको शिलान्यास शुक्रबार एक कार्यक्रमबीच ठोरी गाउँपालिकाका अध्यक्ष लालबहादुर श्रेष्ठले गर्नुभएको हो ।

शिक्षा, विज्ञान तथा प्रविधि मन्त्रालय र ठोरी गाउँपालिकाको लागत साझेदारीमा चालु आर्थिक वर्षका लागि विनियोजन गरिएको एकमात्र विद्यालय भवन यही वर्ष ज्ञानवाटिका माध्यमिक विद्यालयमा निर्माण गर्न लागिएको गाउँपालिका अध्यक्ष श्रेष्ठले जानकारी दिनुभयो । विद्यालयमा अतिरिक्त कक्षाकोठा सञ्चालन गर्नुपर्ने, साथै पुस्तकालय र प्रयोगशालाका लागि कोठाको अभाव देखिएकाले ज्ञानवाटिकालाई भवन निर्माणका लागि छनोट गरिएको उहाँको भनाइ छ ।

कक्षा १२ सम्म पठनपाठन हुँदै आएको उक्त विद्यालयमा भवनको कमीका कारण विभिन्न प्रयोगशाला तथा पुस्तकालय सञ्चालन गर्न नसकिएको विद्यालय प्रशासनले जनाएको छ ।

विद्यालय व्यवस्थापन समितिका अध्यक्ष चन्द्र नेवारका अनुसार दुई तले भवन निर्माण गरिनेछ, जसमा प्रत्येक तलामा दुई–दुई वटा कक्षाकोठा रहनेछन् । पुसको पहिलो सातादेखि निर्माण कार्य सुरु भइसकेको र आगामी जेठ मसान्तसम्म सम्पन्न गर्ने लक्ष्य राखिएको उहाँले बताउनुभयो । व्यवस्थापन समितिकै प्रत्यक्ष रेखदेखमा प्राविधिक मापदण्डअनुसार गुणस्तरीय भवन निर्माण गरिने पनि उहाँले स्पष्ट पार्नुभयो ।

शिलान्यास कार्यक्रममा जीराभवानी गाउँपालिका–१ का वडाध्यक्ष रामशरण खवास, ठोरी गाउँपालिकाका कार्यपालिका सदस्य मेघराज सुनुवार, शिक्षा प्रमुख भूपाल जोशी, विद्यालय व्यवस्थापन समितिका पदाधिकारी, स्थानीय अगुवा, अभिभावक तथा शिक्षकहरूको उल्लेखनीय उपस्थिति रहेको थियो ।