वीरगंज । श्रीमतीमाथि क्रूर आक्रमण गरी खुट्टा काटिएको घटनाकी पीडित हरिकला देवी सहनीका अभिभावकलाई आर्थिक सहयोग प्रदान गरिएको छ।
पर्साको पर्सागढी नगरपालिका–३, विरुवा टोल निवासी ३० वर्षीय विश्वनाथ सहनीले घरायसी विवादका कारण आफ्नी करिब २५ वर्षीया श्रीमती हरिकला देवी सहनीमाथि धारिलो हतियार (दाउ) प्रहार गरी बायाँ खुट्टा काटेर गम्भीर घाइते बनाएका थिए।
उक्त घटनापछि पीडित परिवारको आर्थिक अवस्था दयनीय रहेको देखिएपछि जिल्ला स्तरीय लैङ्गिक हिंसा सञ्जाल समिति कोषबाट पीडितका बुवा–आमालाई रु. ५० हजार १०५ रुपैयाँ सहयोग उपलब्ध गराइएको हो।
जिल्ला प्रहरी कार्यालय पर्साका प्रमुख प्रहरी उपरीक्षक सुदीप राज पाठकले उक्त रकमको चेक पीडितका अभिभावकलाई हस्तान्तरण गरेका हुन्।
यस सम्बन्धमा जानकारी दिँदै जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले पीडित परिवारलाई राहतस्वरूप उक्त सहयोग प्रदान गरिएको बताएका छन्।
