वीरगंज । केपी शर्मा ओली पक्राउको विरोधमा नेकपा एमालेका नेता तथा कार्यकर्ताहरूले शनिबार वीरगंजमा प्रदर्शन गरेका छन्। अध्यक्ष ओलीलाई शनिबार बिहान प्रहरीले नियन्त्रणमा लिएपछि त्यसको विरोधमा घण्टाघर चोकमा भेला भई कार्यकर्ताहरूले नाराबाजी गर्दै प्रदर्शन गरेका हुन्।
एमाले मधेश प्रदेशका उपाध्यक्ष विचारी यादवले पार्टीको निर्णयअनुसार जनवर्गीय संगठनहरू प्रदर्शनमा सहभागी भएको वताए । उनले अध्यक्ष ओलीको पक्राउलाई राजनीतिक प्रतिशोधको संज्ञा दिँदै तत्काल रिहाइ गर्न माग गरे।
गत भदौ २३ र २४ गते भएको जेन–जी आन्दोलनका क्रममा विद्यार्थीहरूको ज्यान गएको घटनासँग जोडेर प्रहरीले ओलीलाई नियन्त्रणमा लिएको बताइएको छ। उक्त समयमा ओली प्रधानमन्त्री रहेका थिए भने रमेश लेखक गृहमन्त्रीको जिम्मेवारीमा थिए। सोही घटनासँग सम्बन्धित विषयमा अनुसन्धानका लागि दुवै नेतालाई पक्राउ गरिएको जनाइएको छ।
ओली र लेखक पक्राउ परेपछि एमालेले देशभर विरोध कार्यक्रम घोषणा गरेको छ। सोही कार्यक्रमअन्तर्गत वीरगंजमा पनि प्रदर्शन गरिएको हो।
प्रदर्शनमा एमाले पर्साका अध्यक्ष विश्वम्भर शर्मा, नेता जालिम मियाँ, तेज प्रकाश निसाद लगायत नेता तथा कार्यकर्ताहरूको उल्लेख्य उपस्थिति रहेको थियो।
प्रदर्शनका क्रममा कार्यकर्ताहरूले सरकारविरुद्ध चर्को नाराबाजी गर्दै पक्राउ परेका नेताहरूको अविलम्ब रिहाइको माग गरेका थिए। स्थिति सामान्य रहे पनि सुरक्षा व्यवस्थालाई कडा बनाइएको थियो।
