वीरगंज । नेपाल कम्युनिष्ट पार्टी (एमाले) पर्साको जिल्ला स्तरीय बृहत् कार्यकर्ता भेला बुधबार वीरगंजमा सम्पन्न भएको छ। तर, अपेक्षाकृत न्यून उपस्थितिले पार्टीभित्र रुचि र सक्रियता घट्दै गएको संकेत नेताहरुले गरेका छन्।
वीरगंजस्थित नगर सभा गृहमा आयोजित भेलामा केन्द्रीय सदस्य, प्रदेश कमिटीका पदाधिकारी, जिल्ला कमिटी, महानगर तथा पालिका स्तरका नेता–कार्यकर्तालाई अनिवार्य रूपमा बोलाइएको भए पनि करिब एक सय जनाको मात्र उपस्थिति रहेको बताइएको छ।
पार्टीभित्र ३ जना केन्द्रीय सदस्य, एक दर्जनभन्दा बढी प्रदेश कमिटी सदस्य, १३५ सदस्यीय जिल्ला कमिटी, १०१ सदस्यीय वीरगंज महानगर कमिटी, १३ वटा पालिका कमिटी तथा २३ वटा जनवर्गीय संगठन सक्रिय रहे पनि भेलामा न्यून सहभागिता देखिएको एक नेताले जानकारी दिए।
पार्टी अध्यक्ष तथा पूर्वप्रधानमन्त्री केपी शर्मा ओलीको पक्राउविरुद्ध केन्द्रीय सर्कुलरअनुसार आयोजना गरिएको उक्त भेलामा पूर्वमन्त्री प्रदीप यादव तथा केन्द्रीय सदस्य एवं वीरगंज महानगरपालिकाका पूर्वमेयर विजय सरावगीलगायत केही प्रमुख नेताहरू अनुपस्थित रहेका थिए।
भेलाले अध्यक्ष ओलीलाई प्रतिशोधपूर्ण, पूर्वाग्रही तथा गैरकानुनी रूपमा पक्राउ गरिएको दाबी गर्दै तत्काल रिहाइको माग गरेको छ। कार्यक्रममा बोल्ने स्थानीय नेताहरूले वर्तमान सरकारले प्रतिशोधको राजनीति सुरु गरेको आरोप लगाए।
उनीहरूले गौरी बहादुर कार्की आयोगको प्रतिवेदन सार्वजनिक नगरी पूर्वप्रधानमन्त्री ओली तथा नेपाली कांग्रेसका नेता एवं पूर्वगृहमन्त्री रमेश लेखकलाई पक्राउ गरिएको भन्दै आपत्ति जनाए।
एमाले पर्साका नेता रुपेश पाण्डेले पार्टीलाई नयाँ ढंगले अघि बढाउनुपर्ने आवश्यकता औंल्याउँदै निर्देशन अवज्ञा गर्ने नेतामाथि कारबाही गर्नुपर्ने बताए। उनले पार्टी आन्दोलनमा टिकट लिएर चुनाव लडेका तथा निर्वाचित जनप्रतिनिधिहरूको अनिवार्य उपस्थिति सुनिश्चित गर्नुपर्ने माग पनि गरे।
डा. विशम्भर कुमार शर्मा को अध्यक्षतामा सम्पन्न भेलामा केन्द्रीय सदस्य प्रभु हजरा, निर्मला देवकोटा, प्रदेश उपाध्यक्ष बिचारी प्रसाद यादव, नेता जालिम मियाँ, नेतृ रिमा कुमारी यादव, प्रदेशसभा सदस्य एवं पूर्वमन्त्री प्रमोद जयसवाल, जन्नत अन्सारी तथा जिल्ला सचिव महेश दास, मानदेव हजरा, सन्जु छतकुलीलगायतले मन्तव्य राखेका थिए।
