काठमाडौं । नेपाल कम्युनिस्ट पार्टी (एमाले) का अध्यक्ष एवं पूर्व प्रधानमन्त्री केपी शर्मा ओली र नेपाली कांग्रेसका नेता एवं पूर्व गृहमन्त्री रमेश लेखकलाई प्रहरीले हाजिर जमानीमा रिहा गरेको छ।
काठमाडौँ जिल्ला प्रहरी परिसर प्रमुख रमेश थापाका अनुसार दुवै नेतालाई अनुसन्धानका लागि आवश्यक परेको बेला उपस्थित हुने शर्तमा थुनामुक्त गरिएको हो।
प्रहरीका अनुसार अध्यक्ष ओलीलाई स्वास्थ्य अवस्था कारण अस्पतालमै परिवारको जिम्मा लगाइएको छ। जिल्ला प्रहरी परिसर काठमाडौंका एसपी पवन कुमार भट्टराईले ओलीको स्वास्थ्य अवस्था चिकित्सकको निगरानीमा रहेको र आगामी निर्णय चिकित्सकको सल्लाहअनुसार हुने जानकारी दिए ।
ओली हाल त्रिवि शिक्षण अस्पतालमा उपचाररत थिए । प्रहरीले उनलाई पत्नी राधिका ओलीको जिम्मा लगाएको छ ।
जेनजी आन्दोलनमा दमन गरेको आरोपमा चैत १४ गते गुण्डुस्थित निवासबाट पक्राउ परेका ओलीको हिरासतविरुद्ध उनकी पत्नी राधिका ओलीले सर्वोच्च अदालतमा बन्दीप्रत्यक्षीकरणको निवेदन दर्ता गराएकी थिइन्।
यसैबीच, पूर्व गृहमन्त्री रमेश लेखकलाई पनि स्वास्थ्य परीक्षणपछि रिहा गरिएको प्रहरीले जनाएको छ । उनलाई पत्नी यशोदा लेखकको जिम्मा लगाइएको छ। पक्राउ परेको १३ औँ दिनमा उनी नेपाल प्रहरीको नम्बर–२ गणबाट बाहिरिएका हुन्।
लेखकलाई अनुसन्धानका क्रममा आवश्यक पर्दा उपस्थित हुने सर्तमा रिहा गरिएको एसपी भट्टराईले बताए । चैत १४ देखि हिरासतमा रहेका उनलाई मन्त्रिपरिषद्को निर्णयअनुसार गौरीबहादुर कार्की आयोगको सिफारिस कार्यान्वयनसँगै भक्तपुरबाट पक्राउ गरिएको थियो।
प्रहरीले दुवै नेतामाथिको अनुसन्धान जारी रहेको जनाएको छ।
