वीरगंज । अगामी फागुन २१ गते हुने प्रतिनिधि सभा सदस्य निर्वाचन नजिकिँदै जाँदा पर्सा निर्वाचन क्षेत्र नं. २ मा चुनावी सरगर्मी तीव्र बन्दै गएको छ। विभिन्न राजनीतिक दलहरूले उम्मेदवार छनोट प्रक्रिया सुरु गरेसँगै सम्भावित उम्मेदवारबारे चर्चा–परिचर्चा बढेको छ।

नेपाली कांग्रेस पर्साले पुनः पूर्व मन्त्री तथा निर्वतमान प्रतिनिधि सभा सदस्य अजय चौरसिया र संविधान सभा सदस्य राजेन्द्र बहादुर आमात्यको नाम सिफारिस गरेको छ। चौरसिया कांग्रेस संस्थापन पक्षका नेता हुन् भने आमात्य शेखर कोइराला पक्षका नेता हुन्।

यसैगरी क्षेत्रीय समितिले राकेश यादवको नाम पनि सिफारिस गरेकाेमा जिल्ला समितिले दुई जनाको मात्र नाम पठाएपछि मधेश प्रदेश समितिले यादवको नामसमेत उम्मेदवारका लागि सिफारिस गरेको छ। यससँगै कांग्रेसबाट तीन जना आकांक्षी देखिँदा टिकट कसले पाउने भन्ने अझै अन्योलमा रहेको छ।

चाैरसिया र आमात्य मध्ये एकले टिकट पाउने बलियाे सम्भावना रहेपनि महामन्त्री गगन थापाको नेतृत्वमा आयोजित विशेष महाधिवेशनमा यादव खुलेर गगन समूहबाट प्रस्तुत भएकाले युवाको कोटाबाट उनले पनि टिकट पाउन सक्ने आँकलन हुन थालेको छ।

नेकपा एमालेले पूर्व मन्त्री तथा पर्सा क्षेत्र नं. ३ बाट निर्वाचित निर्वतमान प्रतिनिधि सभा सदस्य राजकुमार गुप्ता, युवा नेता अरविन्द सिंह र केन्द्रीय सदस्य निर्मला देवकोटाको नाम सिफारिस गरेको छ। पर्सा–२ बाट सिफारिस भएका गुप्ता भ्रष्टाचार मुद्दामा हाल थुनामा रहेकाले उनको उम्मेदवारी अनिश्चित देखिएको छ। यस कारण क्षेत्र नं. १ र २ बाट सिफारिस भएका अरविन्द सिंहले क्षेत्र नं. २ बाट टिकट पाउने सम्भावना देखिए पनि एमाले अध्यक्ष केपी शर्मा ओली निकट मानिएकी देवकोटाको नामसमेत सिफारिस भएकाले अन्तिम निर्णय माथिल्लो तहबाट हुने देखिन्छ।

प्रचण्ड–माधव नेपाल नेतृत्वको नेकपाबाट मनोज चौधरी, सत्यनारायण रौनियार र प्रभाकर गुप्ताको नाम सिफारिस भएको छ। यीमध्ये कसले टिकट पाउने भन्ने टुंगो लागिसकेको छैन।

राष्ट्रिय प्रजातन्त्र पार्टी (राप्रपा)बाट निर्वतमान समानुपातिक सांसद विना जयसवाल कुर्मी चुनाव लड्ने सम्भावना छ । पार्टी स्रोतका अनुसार उम्मेदवारकाे लागि अन्यकाे नाम समेत सिफारिस भए पनि कुर्मीले टिकट पाउने सम्भावना बलियो देखिएको छ।

जनता समाजवादी पार्टी (जसपा) नेपालबाट अधिवक्ता सुरेन्द्र प्रसाद कुर्मी, अशोक कुमार टेमानीसहित आधा दर्जन व्यक्तिको नाम सिफारिस भएको छ । २०७९ को निर्वाचनमा कांग्रेस उम्मेदवार अजय चौरसियासँग पराजित भएका कुर्मी यसपटक परिवारकै सदस्य विना कुर्मी चुनावी मैदानमा उत्रने चर्चा चलिरहेकाले कुर्मी स्वयं उम्मेदवार नबन्ने सम्भावना रहेको बताइन्छ। त्यसो भएमा जसपाबाट टेमानीले टिकट पाउन सक्ने आँकलन गरिएको छ।

जनमत पार्टीबाट राष्ट्रिय अध्यक्ष डा. सीके राउत र जेनजी नेता नविन प्रकाश साहको नाम सिफारिस भए पनि पार्टी स्रोतका अनुसार नविन प्रकाश साह नै उम्मेदवार बन्ने सम्भावना बढी रहेको छ।

राष्ट्रिय स्वतन्त्र पार्टी (रास्वपा)ले हालसम्म औपचारिक रूपमा कसैको नाम सिफारिस गरेको छैन । यद्यपि केही जिल्ला तहका नेताहरूले पूर्व प्रदेश सांसद राजेश्वर साहलाई पार्टीमा प्रवेश गराई उम्मेदवार बनाउने प्रयास गरिरहेको बुझिएको छ। साहलाई एमालेबाट पनि उम्मेदवार बनाउने केही नेताहरु प्रयसामा रहेकाे बुझिएकाे छ ।

यसैगरी नेपाल जनता पार्टीबाट हिन्दुवादी नेता सन्तोष पटेलले उम्मेदवारी घोषणा गर्दै हिन्दु राष्ट्रको एजेन्डासहित चुनावी अभियान सुरु गरिसकेका छन्। अन्य साना दलहरूबाट पनि उम्मेदवार आउन सक्ने सम्भावना रहे पनि हालसम्म निर्वतमान सांसद वा नेपाली कांग्रेसका उम्मेदवारलाई कडा टक्कर दिने को हुने भन्ने स्पष्ट भइसकेको छैन।

निर्वाचन तालिका अनुसार मनोनयन दर्ताका लागि आठ दिन मात्र बाँकी रहेपनि अहिलेसम्म कुनै पनि दलले उम्मेदवारको अन्तिम टुंगो लगाइसकेका छैनन्। सबै दल आन्तरिक तयारी र समीकरण मिलाउन व्यस्त देखिएका छन्।

वीरगंज । प्रतिनिधि सभा सदस्यको निर्वाचन नजिकिँदै जाँदा पर्सामा चुनावी सरगर्मी तीव्र बन्दै गएको छ। आगामी फागुन २१ गते हुने भनिएको निर्वाचनका लागि प्रमुख राजनीतिक दलहरूले उम्मेदवारको नाम केन्द्रमा सिफारिस गरिसकेका छन्।

पर्सा निर्वाचन क्षेत्र नम्बर १ मा विभिन्न शीर्ष दलबाट सिफारिस भएका उम्मेदवारहरूबीच कसले टिकट पाउने र कसले चुनाव जित्ने भन्ने विषयमा चर्चा सुरु भएको छ। जेन–जि आन्दोलनको प्रभाव देखिन सक्ने आँकलन भइरहँदा यस क्षेत्रका लागि अधिकांश पुरानै अनुहार देखिए पनि केही नयाँ नामहरू पनि चर्चामा आएका छन्।

जनता समाजवादी पार्टी (जसपा)बाट पूर्व मन्त्री एवं निर्वतमान प्रतिनिधि सभा सदस्य प्रदीप यादवको एकल नाम सिफारिस भएको छ। यद्यपि जसपा नेपालतर्फ पूर्व मुख्यमन्त्री लालबाबु राउत गद्दीसहित तीन जनाको नाम पनि सिफारिस गरिएको छ। अशोक राई नेतृत्वको जसपाबाट अलगिएर पुनः उपेन्द्र यादव नेतृत्वको जसपा नेपालसंग एकता गरेका प्रदीप यादवले  कुन दलबाट चुनाव लडने अझै अनिश्चित बनेको छ।

नेपाली कांग्रेसमा पनि गुटगत सिफारिस देखिएको छ । संस्थापन पक्षले अनिल रुंगटाको एकल नाम सिफारिस गरेको छ भने शेखर कोइराला पक्षले अजय द्विवेदीसहित तीन जनाको नाम सिफारिस गरेको छ। अघिल्लो निर्वाचनमा स्वतन्त्र उम्मेदवार बनेर जसपा नेपालका प्रदीप यादवसँग पराजित भएका द्विवेदीमाथि लागेको पार्टी कारबाही हालै फिर्ता भएपछि कांग्रेसभित्र टिकटको प्रतिस्पर्धा थप जटिल बनेको छ।

नेकपा एमालेले अरबिन्द सिंहसहित सात जनाको नाम सिफारिस गरेको छ। सूचीमा केन्द्रीय सदस्य प्रभु हजरा, सुन्दर कुर्मी, नवराज शर्मा, बसरुदिन अंसारी तथा महिला उम्मेदवारतर्फ ममता गुप्ता र इन्दु घिमिरेको नाम समेटिएको छ। यसले एमालेभित्र पनि टिकटको टुंगो लाग्न नसकेको संकेत दिएको छ।

राष्ट्रिय स्वतन्त्र पार्टी (रास्वपा)बाट जिल्ला सभापति हरि पन्त उम्मेदवार हुने चर्चा छ। होटल व्यवसायीसमेत रहेका पन्तले चुनावी तयारी अघि बढाइसकेका छन् । तर रास्वपाबाटै प्रदेश सभा सदस्य रहबर अन्सारीले पनि टिकटकाे लागि पहल गरिरहेको चर्चा छ । हालै नेकपा परित्याग गरेका अन्सारी एमालेबाट पनि टिकटको पैरवीमा रहेको बताइन्छ । उनले प्रदेश सभा सदस्यबाट राजीनामा दिने संकेत दिए पनि कुन दलबाट प्रतिनिधि सभा निर्वाचन लड्ने भन्ने अझै खुल्न सकेको छैन।

नेकपाबाट रामदरस कुशवाहासहित सुरेन्द्र गुप्ता, प्रभु यादव र सब्बा अंसारीको नाम सिफारिस गरिएको छ। प्रचण्ड र माधव नेपाल नेतृत्वको नेकपाभित्र पनि टिकट कसले पाउने भन्ने अन्योल कायमै छ।

जनमत पार्टीबाट जिल्ला अध्यक्ष ओमप्रकाश सर्राफको नाम सिफारिस भएको छ । उम्मेदवारकाे औपचारिक घोषणा नभए पनि सर्राफले चुनावी अभियान सुरु गरिसकेका छन् । यस्तै, कुलमान घिसिङ नेतृत्वको उज्यालो नेपाल पार्टीबाट वीरगंज–२० का वडाध्यक्ष रामकिशोर सिंह (पराग) उम्मेदवारी दिने तयारीमा छन् । उनी जेन–जि आन्दोलनपछि एमाले परित्याग गरेका थिए।

अन्य दल तथा स्वतन्त्र उम्मेदवारसमेत मैदानमा आउन सक्ने भएकाले यसपटक पर्सा–१ मा उम्मेदवारको संख्या बढ्ने सम्भावना देखिएको छ । निर्वाचन तालिकाअनुसार माघ ६ गते मनोनयन दर्ता हुने भए पनि हालसम्म कुनै दलले औपचारिक रूपमा उम्मेदवार घोषणा गरेका छैनन्। तर सबै दल आन्तरिक तयारीमा जुटिरहेका छन्।