काठमाडौँ । राष्ट्रिय प्राकृतिक स्रोत तथा वित्त आयोग, सिंहदरबारमा कार्यरत शाखा अधिकृत गणेश घिमिरेले निजामती सेवाबाट राजीनामा दिएका छन्। ‘जेन जेड’ कर्मचारीहरूको नेतृत्व गर्दै सार्वजनिक प्रशासन रूपान्तरण अभियान–२०८२ सञ्चालन गर्दै आएका घिमिरेले सरुवा निर्णयप्रति असन्तुष्टि जनाउँदै पद त्याग गरेका हुन्।
घिमिरेको अछाममा सरुवा भएपछि उनले सोमबार आयोगका सचिव दिनेश कुमार घिमिरेसमक्ष हस्तलिखित राजीनामा पत्र बुझाएका छन्। पत्रमा उनले आफू २०६७ सालदेखि निरन्तर रूपमा निजामती सेवामा रही विभिन्न निकायमा काम गर्दै आएको उल्लेख गरेका छन्।
हाल नेपाल प्रशासन सेवा, सामान्य प्रशासन समूहअन्तर्गत राजपत्र तृतीय श्रेणीको शाखा अधिकृत पदमा कार्यरत रहेका उनले निजामती सेवा नियमावली, २०५० को नियम १२८ बमोजिम सोमबारदेखि लागू हुने गरी स्वेच्छाले पद त्याग गरेको जनाएका छन्।
राजीनामा पत्रमार्फत उनले हालसम्म राष्ट्रसेवा गर्ने अवसर प्रदान गरेकोमा नेपाल सरकारप्रति धन्यवादसमेत व्यक्त गरेका छन्।
घिमिरे सार्वजनिक प्रशासन सुधारका विभिन्न मागहरू अघि सार्दै ‘सार्वजनिक प्रशासन रूपान्तरण अभियान–२०८२’ सञ्चालन गर्दै आएका थिए। पछिल्लो समय सरकारले स्थानीय तहमा निमित्त प्रमुख प्रशासकीय अधिकृत हटाई स्थायी पदपूर्ति गर्ने प्रक्रियाअनुसार सरुवा गर्दा उनी अछाम पुगेका थिए।
सरुवा निर्णयसँगै आएको उनको राजीनामाले निजामती वृत्तमा चर्चा सुरु भएको छ।
