वीरगंज । वीरगंजमा लामो समयदेखि रोकिएको सडक विस्तारको काम सुरु भएसँगै सहर विकासको नयाँ चरणमा प्रवेश गरेको छ । त्रिभुवन राजपथ अन्तर्गत गण्डक चोकदेखि मितेरी पुल सम्मको सडक खण्डमा अतिक्रमित संरचना हटाउने अभियान तीव्र रूपमा अघि बढाइएको हो।
प्रशासनले २५/२५ मिटर मापदण्डअनुसार सडक फराकिलो बनाउने लक्ष्य राख्दै आइतवार बिहानैदेखि डोजर परिचालन गरेपछि सयौँ घर, पसल तथा टहरा भत्काइएका छन् । यससँगै वर्षौँदेखि अवरुद्ध रहेको योजनाले गति लिएको भए पनि प्रभावित नागरिकका लागि भने यो प्रक्रिया पीडादायी बनेको छ ।
सडक विस्तारले दीर्घकालीन रूपमा ट्राफिक व्यवस्थापन, व्यापारिक वातावरण सुधार तथा सहरको सौन्दर्य अभिवृद्धिमा योगदान पुर्याउने अपेक्षा गरिएको छ । तर, तत्कालीन अवस्थामा भने धेरै स्थानीयवासी घरबारविहीन हुने, व्यवसाय गुम्ने र दैनिक जीवन प्रभावित हुने समस्यासँग जुधिरहेका छन् ।
अचानक गरिएको तोडफोडका कारण धेरैले आफ्नो सम्पत्ति जोगाउन नसकेको, सामान व्यवस्थापन गर्न समय नपाएको तथा वैकल्पिक व्यवस्था बिना विस्थापित हुनुपरेको गुनासो गरेका छन् । विशेषगरी साना व्यवसायी, मजदुर तथा दैनिक ज्यालादारी गर्ने वर्ग सबैभन्दा बढी प्रभावित भएका छन् ।
सडक डिभिजन कार्यालयका अनुसार अदालतको निर्णयपछि वर्षौँदेखिको विवाद टुंगिँदै काम अघि बढाइएको हो । यसअघि पनि पटक–पटक सूचना जारी भए पनि कार्यान्वयन हुन सकेको थिएन ।
अचानक १२ घण्टाकाे सूचनामा डाेजर चलेपछि आइतबारदेखि साेमबार दिउसाे सम्म विद्युत् लाइन अवरुद्ध हुँदा सर्वसाधारणले थप समस्या झेल्नुपरेको थियाे । पानी आपूर्ति, सञ्चार तथा दैनिक कामकाजमा समेत अवरोध सिर्जना भएको स्थानीयको भनाइ छ।
यता, केही स्थानीयवासीले भने विकासका लागि यस्तो कदम आवश्यक भएको बताएका छन् । उनीहरूका अनुसार समयमै योजना पूरा भए वीरगंज आधुनिक र व्यवस्थित सहरको रूपमा विकास हुने विश्वास गरिएको छ।
वीरगंज महानगरपालिकाका अनुसार हालसम्म करिब १ हजार २ सय संरचना हटाइसकिएको छ भने सडक विस्तार क्षेत्रभित्र सरकारी तथा निजी दुवै प्रकारका भवनहरू परेका छन्।
सडक विस्तारले सहरको भविष्य उज्यालो बनाउने अपेक्षा गरिए पनि पुनर्स्थापना, मुआब्जा र प्रभावित नागरिकको व्यवस्थापनबारे स्पष्ट योजना नआउँदा यो विषय अहिले पनि बहसको केन्द्रमा रहेको छ ।
