वीरगंज । पाँचौं परवानीपुर गोल्डकप फुटबल प्रतियोगिताअन्तर्गत सोमबार सम्पन्न खेलमा वीरगंज युनाइटेड क्लबले सडेनडेथमा जित निकाल्दै प्रतियोगितामा प्रभावशाली सुरुवात गरेको छ।
परवानीपुर खेल मैदानमा भएको प्रतिस्पर्धात्मक खेलमा वीरगंज युनाइटेड क्लबले चिडियादह स्टार क्लब रौतहटलाई ४–३ गोल अन्तरले पराजित गरेको हो । खेल सुरु भएदेखि नै दुवै टोली आक्रामक शैलीमा प्रस्तुत भएका थिए र जितका लागि निरन्तर दबाब सिर्जना गरेका थिए ।
निर्धारित समयमा दुवै टोलीले बराबरी खेलेपछि खेल ट्राइब्रेकरमा पुगेको थियो । पेनाल्टी सुटआउटमा पनि दुवै टिमले समान गोल गरेपछि खेलको निर्णय सडेनडेथबाट गरिएको थियो । सडेनडेथमा वीरगंज युनाइटेडका खेलाडीले निर्णायक गोल गर्दै टोलीलाई जित दिलाएका हुन् ।
खेलमा उत्कृष्ट प्रदर्शन गरेका वीरगंज युनाइटेडका गोलकिपर तबरेज अन्सारी ‘म्यान अफ दि म्याच’ घोषित भए । उनले नगद २१ सय रुपैयाँ पुरस्कार प्राप्त गरे, जुन पर्सा जिल्ला फुटबल संघका उपाध्यक्ष हेमन्त चौरसियाले प्रदान गरेका थिए ।
प्रतियोगिताअन्तर्गत भोलिको खेल नव जन जागृति युवा क्लब सिमरा र रिगल एन्फा क्लब मकवानपुरबीच हुने आयोजकले जनाएको छ।
प्रतियोगिताका संयोजक संजय मण्डलको अध्यक्षतामा सम्पन्न कार्यक्रममा पर्सा जिल्ला फुटबल संघका उपाध्यक्ष चौरसियाले उद्घाटन गरेका थिए । वैशाख १२ गतेसम्म सञ्चालन हुने प्रतियोगितामा भारतबाट एक र नेपालका सात गरी कुल आठ टोलीको सहभागिता रहेको सहसंयोजक दीपक यादवले जानकारी दिए ।
“राष्ट्रको लागि खेलकूद, स्वास्थ्यको लागि खेलकूद” भन्ने नारासहित आयोजना गरिएको प्रतियोगिता करिब १७ लाख रुपैयाँको लागतमा भइरहेको छ । प्रतियोगितामा विजेताले २ लाख र उपविजेताले १ लाख रुपैयाँ पुरस्कार प्राप्त गर्नेछन् ।
यसका साथै उत्कृष्ट डिफेन्डर, फरवार्ड, प्रत्येक खेलका उत्कृष्ट खेलाडी तथा समग्र प्रतियोगिताका उत्कृष्ट खेलाडीलाई समेत नगद पुरस्कार प्रदान गरिने आयोजक क्लबका अध्यक्ष सुबोध श्रीवास्तवले जानकारी दिएका छन् ।
