वीरगंज । पर्सा क्षेत्र नं. १ का प्रतिनिधि सभा सदस्य हरि पन्तले वीरगंजमा भइरहेको सडक विस्तार अभियानलाई लिएर आम नागरिकको पीडाप्रति सहानुभूति व्यक्त गरेका छन्।
काठमाडौंबाट सडक विस्तार कार्यका लागि आएका गृहमन्त्रीका स्वकीय सचिव, भौतिक योजना तथा निर्माण मन्त्रीका स्वकीय सचिव तथा सचिवालय सचिवसँगकाे गढीमाई दर्शनकाे तस्बिर सामाजिक सञ्जाल फेसबुकमार्फत सेयर गर्दै उनले यस्तो धारणा सार्वजनिक गरेका हुन्।
सांसद पन्तले वीरगंजलाई फराकिलो र विकसित शहर बनाउने सबैको साझा चाहना पूरा हुने क्रममा ऐतिहासिक महत्व बोकेको मुख्य बजार क्षेत्रका संरचना भत्किँदा स्वाभाविक रूपमा पीडा महसुस हुने बताएका छन्। उनले विशेषगरी घर, आँगन तथा व्यवसायिक संरचना गुमाउनुपरेका स्थानीय बासिन्दाको दुःखलाई आफूले नजिकबाट बुझेको उल्लेख गरेका छन्।
उनले लेखेका छन्, “हामी जन्मिनुभन्दा अघिको ऐतिहासिक पृष्ठभूमि बोकेको वीरगञ्जको मुख्य अंश भत्किँदा पक्कै पनि दुखी नहुने कोही पनि छैनन्। अझै जसका घर, आँगन र पसल परेका छन्, उहाँहरूको दुःख त मैले पनि भोगेको जस्तै हो।”
सडक विस्तारका क्रममा कतिपय घरमा अहिले विद्युत् र खानेपानी सेवा समेत अवरुद्ध भएको उल्लेख गर्दै उनले यस अवस्थालाई ‘प्रसव पीडा’सँग तुलना गरेका छन्। विकासको क्रममा केही असहजता आउनु स्वाभाविक भएको भन्दै उनले नागरिकहरूलाई धैर्य गर्न आग्रह गरेका छन्।
अन्त्यमा उनले सबै प्रभावित नागरिकप्रति क्षमायाचना व्यक्त गर्दै असुविधाप्रति आफू संवेदनशील रहेको बताएका छन्।
