वीरगंज । वीरगंज नाकास्थित शंकराचार्य प्रवेशद्वारमा जनअधिकार पार्टीले आइतबार धर्ना प्रदर्शन गरेको छ। भारतबाट १०० रुपैयाँभन्दा बढी मूल्यको सामान ल्याउँदा अनिवार्य भन्सार कर तिर्नुपर्ने सरकारी नियमको विरोधमा पार्टीका अध्यक्ष डा. शरदसिंह यादवको नेतृत्वमा नेता तथा कार्यकर्ताहरूले एक घण्टा सडकमा बसेर विरोध जनाएका हुन्।
धर्नामा सहभागीहरूले उक्त नियमले नेपाल–भारतबीचको ऐतिहासिक रोटी–बेटी सम्बन्धमा असर पर्ने भन्दै तत्काल खारेज गर्न माग गरेका छन्। अध्यक्ष यादवले सरकारले भन्सार कर असुलीको नाममा सीमावर्ती क्षेत्रका नागरिकलाई सास्ती दिने नीति लिएको आरोप लगाए।
उनले मधेसका जनताले ठूलो आशा गरेर सरकारलाई समर्थन गरे पनि छोटो समयमै यस्तो अप्रिय निर्णय आएको भन्दै असन्तुष्टि व्यक्त गरे। महँगी नियन्त्रणमा सरकार असफल भएको उल्लेख गर्दै उनले खाद्यान्न, इन्धन लगायत दैनिक उपभोग्य वस्तुको मूल्य निरन्तर बढिरहेको अवस्थामा थप कर लगाउनु जनविरोधी कदम भएको बताए।
यादवले भन्सारमा लागू गरिएको यो व्यवस्था मधेसमाथिको ‘अघोषित नाकाबन्दी’ जस्तै भएको टिप्पणी समेत गरे।
सरकारले केही दिनयता नेपाल–भारत सीमानाकामा राजस्व चुहावट रोक्ने उद्देश्यले १०० रुपैयाँभन्दा बढी मूल्यका सामानमा भन्सार कर अनिवार्य गर्ने नियम कडाइका साथ कार्यान्वयनमा ल्याएको छ। यसले विशेषगरी सीमावर्ती क्षेत्रमा बसोबास गर्ने नागरिकलाई प्रत्यक्ष असर पारेको छ।
भन्सार महसुल ऐन, २०८१ को दफा १३ उपदफा (३) अनुसार यो व्यवस्था २०८० जेठ १५ गतेदेखि नै लागू भए पनि व्यवहारमा हाल मात्रै कडाइका साथ कार्यान्वयन हुन थालेपछि यसको चौतर्फी आलोचना भइरहेको छ।
