बीरगंज । श्री जगदम्बा सिमेन्ट मिल्स प्रालिले वीरगन्ज स्थित घण्टाघर चौकमा शनिबार मोटरसाईकल चालकहरुलाई हेल्मेट बितरण गर्ने क्रममा गैर जिम्मेवारीपन देखाएकाे छ ।
जगदम्बाका निर्देशक राजेश अग्रवाल सहितका कर्मचारीहरुले हेल्मेट वितरण गर्ने क्रममा घण्टाघरमा भएकाे फाेहर जस्ताकाे त्यस्तै छाेडेर हिडेका छन् । नयाँ हेल्मेटबाट निस्केकाे सम्पूर्ण पलास्टिकहरु र पूराना फुटेका हेम्लेटहरु घण्टाघर चाेक मै छाेडेर हिडेका हुन् ।
घण्टाघरमा साे प्लास्टिक र पुराना हेल्मेटका छाेडेर हिडेका कारण घण्टाघर अगाडी फाेहर देखिएकाे छ भने फाेहर सफा नगरेर जगदम्बाले गैरजिम्मेवारीपन देखाएकाे स्थानियहरुले वताएका छन् ।
सामुदायिक प्रहरी साझेदारी कार्यक्रम अन्तर्गत जगदम्बाले पुराेनाे हेल्मेट लिई जगदम्बा लेखिएकाे नयाँ हेल्मेट प्रचारकाे लागि वितरण गरेको हो । घण्टाघरमा अव्यवस्थित तरिकाले हेल्मेट वितरण गरिएका कारण केही बेर सडक पनि अवरुद्ध भएकाे थियाे ।
जगदम्बाकाे हेल्मेट वितरण कार्यक्रमकाे उदघाटन वीरगन्ज महानगरपालिकाका प्रमुख बिजय कुमार सरावगीले गरेका थिए । साे कार्यक्रममा २ नं. प्रदेश ट्राफिक प्रहरी कार्यालयका प्रमुख प्र.उ.गोग बहादुर पालकाे पनि उपस्थिती रहेकाे थियाे ।