वीरगंज १९ असार ।
न्यु फ्रेन्ड्स क्लब करैयामाई–८ बाराको आयोजनामा आज बिन्दवासिनी गाउँपालिकाको वडा नं २ र ३ मा दलित वर्ग क्षमता विकास तालिम सम्पन्न भएको छ ।
कार्यक्रमका प्रमुख अतिथि गाउँपालिकाका उपप्रमुख किरण देवी गुप्ताले हामी २१ औं शताब्दीको युगमा प्रवेश गरे पनि समाजमा अहिले पनि दलितहरु माथि विभेद भएको सुन्दा अत्यन्तै दुःख लाग्ने गरेको बताउनु भएको छ ।
दलिहरु माथि समाजमा हेर्ने दृष्टिकोण सुधार हुदै गए पनि कुनै कुनै स्थानमा अहिले पनि दलितलाई तल्लो दर्जाको नागरिक मान्ने गरिएकोले त्यस्ता विभेदहरुलाई हटाउन यो तालिम फलदायी हुने बताउनु भयो ।
उहाँले दलित वर्गमाथि छुवाछुत, भेदभाव गरेमा कानुन बमोजिम कारवाहि हुने र आफुहरुले पनि त्यस्ता अपराधिहरुलाई कानुनी कठघरामा उभ्यान हरसम्भव प्रयास गर्ने बताउनु भयो ।
संस्थाका अध्यक्ष राजेश कुशवाहाको सभापतित्वमा भएको कार्यक्रममा वडा नं २ का वडा अध्यक्ष संजय चौहान, गाउँपालिकाकी मंजु कुमारी कायस्थ लगायतकाले तालिममा सिखेका ज्ञानलाई व्यवहारमा उतार्न सुझाव दिनु भएको थियो । यसैगरी वडा नं। ३ मा पनि दलित वर्ग क्षमता विकास तालिम सम्पन्न भएको छ ।
संस्थाका अध्यक्ष राजेश कुशवाहाको सभापतित्वमा भएको कार्यक्रममा वडा नं ३ का वडा अध्यक्ष सलमा खातुन, वडा सदस्य कृष्णा राउत, दलित सदस्य जगतीय देवी लगायतकाले तालिमका सफलताका शुभकामना व्यक्त गर्नु भएको थियो ।
कार्यक्रममा सहभागी करिब ७० जनालाई बृजलाल पासवान, अनिल कुशवाहा, दिवाकर गुप्ता लगायतकाले प्रशिक्षण दिनु भएको थियो । यस अघि बिन्दवासिनी गाउँपालिकाको वडा नं १ र ५ मा पनि दलित वर्गको क्षमता विकास तालिम सम्पन्न भएको संस्थाका लुकमान मियाले जानकारी दिनु भयो ।