वीरगंज,७ चैत ।
तराई मधेश क्षेत्रमा बिहीबार होली मनाइँदै छ । जनकपुरबाहेकका तराई तथा मधेसका जिल्लाहरूमा आज हर्साोलासपूर्वक मनाइँदै छ । तराई–मधेशका अधिकांश क्षेत्रमा पूर्णिमाको भोलिपल्ट होली पर्व मनाइने चलन भए पनि प्राचीन मिथिलाको राजधानी जनकपुनगरको परिक्रमा सकेको भोलिपल्ट होली पर्व मनाइने गरिएको छ ।
पन्ध्र दिने मिथिला परिक्रमा सहभागी तीर्थयात्री जनकपुरको परिक्रमा गरी आआफ्नो गन्तव्यमा पुग्ने गरेका कारण होली मनाइने चलन रहेको छ । पहाडी भूभागमा होलिका दहनअघि नै फागु(होली) मनाउने चलन भए पनि तराईमा भने ‘होलिका दहन’ गरेपछि भोलिपल्ट मनाउने परम्परा रहेको छ ।
तराई मधेसका अधिकाश गाउँ घरमा ‘होलिका दहन’ का दिन राति गाउँ टोलका मानिसहरु आआफ्नो घरमा पाकेका परिकार, काठ दाउरा र खेतबारीमा लगाइएका अन्नबालीको केही अंश लिएर एक ठाउँमा राखी त्यसमा आगो लगाई ‘होलिका दहन’ गरिन्छ । ‘होलिका दहन’ भइसकेपछि मानिसहरू स्थानिय आफनो भाषमा होलीको गीत गाउँदै आ–आफ्नो घर फर्किन्छन्। तराई मधेशमा ‘होलिका दहन’ नभएसम्म कसैले कसैलाई रङ अबिर लगाउन नमिल्ने विश्वास रहेको छ होेली पर्वमा रङ अबिर लगाई एक आपसमा खुसी साटासाट गर्दै मनाइने यो पर्वको बेग्लै धार्मिक, साँस्कृति र सामाजिक महत्व छ । जनकपुरमा भने शुक्रबार होली मनाइँदैछ ।