[real3dflipbook id=”66″]
पर्सागढीको बहुअर्वामा वडाध्यक्ष आलमद्वारा हिन्दुमाथि दमनको आरोप
्वीरगंज । पर्साको पर्सागढी नगरपालिका वडा नं. ५ बहुअर्वामा हिन्दु समुदायमाथि दमन भइरहेको खुलासा भएको छ । वडाध्यक्ष असलम आलमले हिन्दु समुदायका व्यक्तिमाथि धार्मिक विभेद गरिहेको गाउँवासीले आरोप लगाएका छन् । मुस्लिम समुदायको बाहुल्यता रहेको बहुअर्वामा हिन्दु समुदायको चाँड पर्वमा हस्तक्षेप भइरहेको उनीहरुको गुनासो छ । शुक्रवार वीरगंजमा पत्रकार सम्मेलन गर्दै बहुअर्वा निवासी हिन्दु समुदायका व्यक्तिहरुले भर्खरै बितेको होलीमा पनि प्रहरी प्रयोग गरी वडाध्यक्ष आलमले हस्तक्षेप गरेको आरोप लगाएका छन् ।
नेपाल धर्मनिरपेक्षता राष्ट्र भएपनि बहुअर्वामा हिन्दु धर्मावलम्बीहरुले मनाउने हरेक चाडवाडमा वडाध्यक्ष आलमको सलंग्नतामा मुस्लिम समुदायले हस्तक्षेप गर्ने गरेको स्थानीय नितिश मिश्राले बताए । उनले भने ‘३ वर्षभन्दा बढी भयो, हामी हिन्दु समाजमाथी धार्मिक हस्तक्षेप हुन थालेको, हामीले गर्ने बिहेवारीमा पनि बाजागाजा बजाउन दिदैनन् ।’ वडाध्यक्ष आलमले होली गाउने समयमा गाउँको बिचमा रहेको मस्जिद नजिकैको बाटोमा प्रहरी खटाएर होली मनाउन पनि अवरोध गरेको अर्का स्थानीय सुनिल रायभरले वताए । सुरक्षित रुपमा स्वास्थ्य सर्तकता अपनाएर मनाइने होलीमा पनि पहुँचको आधारमा सुरक्षाकर्मी नै परिचालन गरेर अवरोध खडा गर्नु धर्म तथा संस्कृतिमाथीको प्रहार भएको स्थानीय अग्रज जोगि रायभरको भनाई छ ।
करिब डेढ किलोमिटर बहुअर्वामा दुवैतिर हिन्दु समुदाय र बिचमा बहुसंख्यक मुस्लिमहरुको बसोबास रहेको छ । ७० प्रतिशत मुस्लिम समुदायको बसोबास रहेको छ भने ३० प्रतिशत मात्र हिन्दु समुदायको बसोबास रहेको छ । एक गाउँबाट अर्काे गाउँमा होली (तराई मधेसमा होलीमा गाइने गीत) गाउँदै जाने क्रममा वडाध्यक्ष आलमले प्रहरी प्रयोग गरेर रोक लगाए । आपसी सद्भाव र एकताको पर्व होली कै दिन पहुँचको आधारमा प्रहरी प्रयोग गरेर आवतजावत समेत गर्न नदिए होली नै प्रभावित बनाएको अर्का स्थानिय शिवशरण महतोले बताए ।
उनीहरुका अनुसार गत वर्ष पनि होली मनाईरहदाँ मुस्लिम समुदायबाट ढुंगामुढा प्रहार हुँदा ७ जना स्थानीय हिन्दु समुदायका व्यक्ति घाइते भएका थिए । राजनितिक पहुँचको आधारमा वडाध्यक्ष आलमले घटनालाई साम्य बनाउँन विभिन्न चलखेल समेत गरेको उनीहरुको आरोप छ । विवाद पश्चात जिल्ला प्रशासन कार्यालय पर्साका प्रमुख जिल्ला अधिकारीकै रोहबरमा पर्सा क्षेत्र न. १ का प्रतिनिधि सभा सदस्य प्रदिप यादव, नेपाली कांग्रेस पर्साका सभापति अजय द्विवेदी, पर्सागढी नगरपालिकाका नगरप्रमुख लोकनारायण यादव लगायतको उपस्थितीमा भएको ५ बुँदे सहमति भएको थियो ।
होली तथा बिहेबारीमा विवाहको बाजागाजामा मुस्लिम मसुदायबाट अवरोध नहुने, धार्मिक स्थल तथा ब्रहमस्थानमा तोडफोड नगर्ने, हिन्दु समाजको गौतर पर्ति जग्गाको नाप नक्सा गरी छुट्याउने लगायत पाँच बुन्दे सहमती मुस्लिम समाजले गरेका थिए तर राजनितिक पहुँचको आधारमा हालसम्म उक्त सहमती कार्यान्वयन नगरेको मिश्रले बताए । बहुसंख्यकको बल र पहुँचको आधारमा विगत ३ वर्षदेखी हिन्दु समाजमाथी मुस्लिम समुदायले दमन गर्दै आएको हिन्दु समाजको आरोप छ । हिन्दुहरुको महान चाड छठ तथा दिपावलीमा मुख्य सडकमै रागां काटेर पुरै सडक रगतयाम गरी अशुद्ध बनाई चाडपर्व समेत प्रभावित गर्दै आएका छन् ।
स्थानिय ६५ बर्षिय बृद्ध रामशरण राय भरले भने, २० बर्ष पहिला पनि मुस्लिम समुदायले हिन्दुमाथि अन्याय अत्याचार गर्न खोजेका थिए, त्यो बेला हिन्दु समाज एकजुट हुदाँ उनीहरु पछि घटेका थिए तर तीन बर्ष यता जनप्रतिनिधिमा निर्वाचित मुस्लिम वडाध्यक्ष भएपछि पुनः हिन्दुमाथि अन्याय र अत्याचार गर्न खोजिएको छ, स्थानिय प्रशासनले यसमा ठोस निर्णय नलिए ठूलो दुर्घटना निम्तन सक्ने चेतावनी समेत उनले दिए । नगरपालिकामा ९ वटा वडा छ । हामी ५ नम्बर वडामा कम्जोर छौ, यहाँ मुस्लिम ७० प्रतिशत छन, तर पुरै ९ वटा वडा मिलाए भने हामी ९० प्रतिशत हिन्दु छौ उनले भने, स्थानिय प्रशासनले समयमै कारवाही नगरे, त्यसको परिमाण नराम्रो हुने छ ।
यता वडाध्यक्ष आलमले भने दुवै पक्ष मिलेर होली मनाएको आफुमाथी लगाइएका आरोपहरु सबै निराधार भएको सफाई दिएका छन् । हुन त घटना स्थलको तस्बिर हेर्दा गाउँमा व्यापक रुपमा प्रहरी परिचालन गरिएको प्रस्टाएको छ । आलम तत्कालिन संघीय समाजवादी पार्टीबाट निर्वाचित वडाध्यक्ष हुन् ।
रेडक्रसद्वारा विपद् पुर्व बजार लेखाजोखा
वीरगंज । वपद पूर्व बजार लेखाजोखा सम्बन्धी एक दिने अभिमुखिकरण कार्यक्रम शुक्रबार रेडक्रस पर्सा जिल्ला शाखामा सम्पन्न भएको छ । नेपाल रेडक्रस सोसाइटी, सामुदायिक विकास विभाग, खानेपानी सरसफाइ तथा स्वच्छता प्रबद्र्घन महाशाखा र रेडक्रसको अन्तराष्ट्रिय महासघंकोे आर्थिक तथा प्राविधिक सहयोगमा आपतकालीन खानेपानी सरसफाइ तथा स्वच्छता परियोजना अन्तर्गत क्षमता विकास गतिविधिहरु सन् २०१९ देखि २०२१ डिसेम्वर सम्मका लागि प्रदेश २ मा सञ्चालन भइरहेको छ ।
परियोजनाका गतिविधिहरु मध्ये विपद पूर्व बजार लेखाजोखा एक महत्वपूर्ण गतिविधि हो । लेखाजोखा कार्य मिति २०७७ साल चैत २० देखी २७ सम्म पर्सा, रौतहट, महोतरी, सम्तरीमा सन्चालन हुने रेडक्रस पर्साका सहायक राजन कुमार श्रीवास्तवले जानकारी गराए । नेपाल रेडक्रस सोसाइटी पर्सा जिल्ला शाखाका सभापति विरेन्द्र राज कँडेलको सभापतित्व र रेडक्रस प्रदेश २ का अध्यक्ष फूलमहम्मद मियाँको प्रमुख आतिथ्यतामा विपद् पुर्व बजार लेखाजोखा सम्बन्धि अभिमुखिकरण कार्यक्रममा भएको थियो ।
कार्यक्रममा विपद्को समयमा बजारमा हुने बाधाअवरोध तथा त्यसको कारणले सामाग्रीहरुको परिमाण र मुल्यमा हुनसक्ने उतारचढावको लेखाजोला वारेमा सम्बोधन गर्दै विपद्को समयमा सबै निकायले निश्पक्ष तरिकाले सहयोग गर्नु पर्ने वक्ताहरु जोड दिएका थिए ।
प्रकोप पूर्व बजार लेखाजोखा वारेमा रेडक्रस केन्द्रका उपनिर्देशक अमरमनी पौडेल र सुभेक्षा मानन्धरले सहभागीलाई प्रशिक्षण दिनु भएको थियो । प्रकोप पूर्व बजार लेखाजोखामा नेपाल रेडक्रस सोसाइटी पर्सा शाखाका उपसभापति मधुराण, भगवती चौधरी, कोषाध्यक्ष महन्थ प्रसाद यादव, उपमन्त्री साविर अहम्मद एराज, उपकोषाध्यक्ष दयाशंकर सिह कार्यसमिति सदस्य मदन प्रसाद गुप्ता, जितेन्द्र वर्मा, दिनानाथ प्रसाद रौनियार, राजेश्वर प्रसाद चौरसिया, बबिता गुप्ता, ईन्फोरमेसन म्यान्जमेण्ट स्वमसेवक सौरभ दकाल, उमेश मिश्र, लक्ष्मीनारायण राउत लगायतको उपस्थिती रहेको भने रेडक्रसका लेखाअधिकृत विरसम्सेर प्रसाद कुर्मीले कार्यक्रमको संचालन गरेका थिए ।
वीउवा संघको नव निर्वाचित कार्य समितिको शपथ ग्रहण सम्पन्न
वीरगंज । वीरगंज उद्योग वाणिज्य संघको नवनिर्वाचित कार्यसमितिको शपथ ग्रहण समारोह शुक्रबार सम्पन्न भएको छ । वीउवा संघको ४५ औं वार्षिक साधारण सभाबाट सुबोध गुप्ताको अध्यक्षतामा नवनिर्वाचित कार्यसमितिको वरिष्ठ उपाध्यक्ष अनिल पाटवारी, उपाध्यक्षद्वय हरि गौतम र माधव राजपाल, महासचिव मनोज दास, वाणिज्यतर्फ सचिव आशिष् लाठ, सहसचिव अनुज रूँगटा, उद्योगतर्फ सचिव अरविन्द आमात्य, सहसचिव सुशान्त चाचान, कोषाध्यक्ष गोविन्द शाह, सहकोषाध्यक्ष प्रेमचन्द्र गोयल, सदस्यहरू मुरली जालान, नीरज अग्रवाल, अवधेश सरावगी, नवनीत अग्रवाल, सुरेश रूँगटा, प्रभात रूँगटा, सौरभ केडिया, सुनील खेतान, मनोज शर्मा लगायतका रहेका छन् ।
वीउवा संघका निवर्तमान अध्यक्ष गोपाल केडियाको अध्यक्षतामा भएको कार्यक्रममा प्रमुख निर्वाचन अधिकृत बालमुकुन्द खरेलले शपथ ग्रहण गराएका थिए । सपथ ग्रहण कार्यक्रमलाई सम्बोधन गर्दै मुख्यमन्त्री लालबाबु राउत गद्दीले यो मुलुकमा उद्योगी व्यवसायीलाई राज्यले हेर्ने दृष्टिकोण गलत रहेको आरोप लगाए ।
सरकारको नजरमा यहाँका व्यापारीहरु लुटेरा, डाकाहरु हुन् र यिनीहरुलाई कसरी निरुत्साहित गर्ने मानसिकताको कारण उद्योग व्यावसाय फस्टाउन नसकेको भन्दै यसमा अहिलेसम्म शासन सत्ता सञ्चालन गर्ने नेताहरु त्यति नै दोषी रहेको आरोप लगाए । उनले सबै मिलेपछि मात्रै मुलुक विकास र समृद्धिको बाटोमा जाने बताउदै राज्यले मात्रै उद्योग धन्दा सञ्चालन गरेर आफ्नो स्तरबाट विभिन्न किसिमका प्रोजेक्टहरु सञ्चालन गरेर मुलुक समृद्धतर्फ जाँदैन भन्दै मुख्यमन्त्री गद्दीले मुलुकको विकास गर्नुछ भने मुलुकको कानून लगानीमैत्री बन्नुपर्छ, मुलुकका शासक लगानीकर्ताप्रति सद्भाव र उनीहरुसँग नरम व्यवहार गर्नुपर्ने बताए ।
प्रतिनिधि सभा सदस्य प्रदीप यादवले देशलाई समृद्ध बनाउन वीरगंजलाई समृद्ध बनाउनुपर्ने वताए । उनले वीरगंज देशकै मुख्य नाका भएपनि वीरगंजको भौतिक पूर्वाधार गतिलो नभएको आरोप लगाए । उनले पारवहनको सबैभन्दा छोटो नाका भएर वीरगंजले जति फाइदा लिनुपर्ने हो, लिन नसकेको उनको जिकिर थियो ।
वीरगंज गण्डकस्थित कलर्स रिसोर्टमा भएको सपथ ग्रहण कार्यक्रममा नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकाल, वीरगंज महानगरपालिकाका मेयर विजयकुमार सरावगी, नेउवा महासङ्घका पूर्व उपाध्यक्ष उमेशलाल श्रेष्ठ, नेउवा महासङ्घ प्रदेश २ का अध्यक्ष गणेश लाठ, नेउवा महासङ्घका केन्द्रीय सदस्य अजयराज सुमार्गी, प्रदेश सांसद तथा वीउवासङ्घका पूर्वअध्यक्ष ओमप्रकाश शर्मा, नेका पर्साका सभापति अजय द्विवेदी, नेकपा एमालेका अध्यक्ष प्रभु हजरा, नेकपा माओबादी केन्द्रका वीरगंज महानगर अध्यक्ष रहबर अन्सारी, जसपा पर्साका अध्यक्ष रामनरेश यादव, उद्योगी अशोक टेमानी लगायतले शुभकामना मन्तव्य व्यक्त गरेका थिए ।
पर्साको जगरनाथपुरस्थित सिकटा नदीमा निर्माण हुने पुलको मुख्यमन्त्री राउतद्वारा शिलान्यास
वीरगंज । प्रदेश नम्बर २ का मुख्यमन्त्री लालबाबु राउतले पर्साको जगरनाथपुर–मधुवाहा झकरा मसिहानी जोडन सिकटा नदी मधुवाहा खोलामा निर्माण हुने पक्की पुलको शिलान्यास गरेका छन् । मुख्यमन्त्री राउतले प्रदेश सरकारको रु ७ करोड ८५ लाखको लागतमा साढे ४२ मिटर लामो निर्माण हुने पक्की पुलको शुक्रबार एक कार्यक्रमका बिच शिलान्यास गरेका हुन् ।
जगरनाथपुर र मधुवाहा झकरा मसिहानी छिमेकी गाउँ भएपनि बिचमा रहेको सिकटा नदीको खोलाले सो क्षेत्रमा वर्षात लागयत विभिन्न समयमा जनताले वर्षाैदेखी खेप्दै आएको समयलाई मध्य नजर गर्दै सो ठाउँमा पक्की पुल निर्माण गर्न लागिएको हो ।
शिलान्यास कार्यक्रमपछि झखरा मसियानीस्थित विद्यालयमा आयोजित कार्यक्रमलाई सम्बोधन गर्दै मुख्यमन्त्री राउतले भौतिक पूर्वाधारको विकाससंगै प्रदेश सरकारले शिक्षा, स्वास्थ्य र रोजगारलाई पनि प्राथमिकतामा राखेर अगाडी बढिरहेको बताए । उनले पुल निर्माण पछि जनरनाथपुर र झखरा मसियानी लगायतका गाउँबासीको सम्बन्ध अझै प्रगाढ हुने विश्वास व्यक्त गरे ।
कार्यक्रमका प्रमुख अतिथि समेत रहेका मुख्यमन्त्री राउतले सामुदायिक विद्यालयमा साधारण यता पढाई लेखाईले रोजगारी खासे नहुने भन्दै त्यसको लागि प्राविधिक शिक्षामा यहाँका बालबालिकाको पहुँच सहज बनाउँदा मात्रै प्रदेशको समृद्धि र विकास चाडो हुने बताए । उनले प्रदेश सरकार प्राविधिक शिक्षाकै लागि प्रदेश सभामा विध्येक लगेको बताउँदै विध्येक पास हुँदै जेटिए, एग्रिकलचर, ओभरसियर, नर्स आदी जस्ता प्राविधिक शिक्षाको लागि प्रदेश सरकारले अनुमति दिनुको साथसाथै कक्षा संचालन गर्न बजेट पनि दिने भएकोले यहाँका बालबालिका प्राविधिक शिक्षासंगसंगै रोजगारी पनि सृजना भई प्रदेश समृद्ध हुने बताए । ‘‘यो देशमा प्रदेश नंं २ मात्रै महिलालाई ५० प्रतिशत आरक्षणको व्यवस्था छ,’ उनले भने, ‘ यो एउटा मात्रै प्रदेश हो यहाँ जुन जाति जति छन्, त्यति संख्याको आधारमा जातिय आरक्षण गरिएको छ, ।’’ ्
उनले अबको १०-१२ सालभित्रमा देशको ठुल(ठुला पदमा समेत मधेशीका छोरा र छोरीले प्रतिनिधित्व गर्ने दाबी गर्दै छोरा र छोरीलाई समान शिक्षा र व्यवहार गर्न आग्रह गरे । प्रदेश सरकार कक्षा ११ मा पढ्ने केही छात्राहरुलाई ल्यापटप पनि वितरण गरिने तयारीमा रहेको मुख्यमन्त्री राउतले बताए । उनले प्रदेश सरकारले प्रदेश प्रहरी ऐन, प्रदेश निजामति सेवा ऐन बनाईसकेको चाँडै नै कर्मचारी भर्ना हुने बताए ।
जगरनाथपुर गाउँ पालिकाका अध्यक्ष जालिम मियाँको अध्यक्षतामा भएको कार्यक्रममा जसपा नेता हरिनाराण रौनियार, प्रदेश सांसद प्रहलाद गिरी, करिमा वेग्म, सिघासन साह, जसपा केन्द्रिय सदस्य बिरेन्द्र यादव, युवा नेता सरिफ गद्दी, जसपा निकट मुस्लिम फोरमका अध्यक्ष मोलाना नुरुल ओधा, जसपा पर्सा अधयक्ष रामनरेश यादव, जिल्ला सचिव तब्रेज अहमद, पर्सा क्षेत्र नं. ३ का क्षेत्रिय अध्यक्ष नागेन्द्र यादव, जसपाबाट गाउँपालिका अध्यक्ष पदका प्रत्यासी क्रिसमोहन यादव, विद्यालयका पधानाध्याक, शिक्षक तथा स्थानीयको बाक्लो उपस्थिति रहेको थियो ।
पत्रकार महासंघ प्रदेश २ को २१ पदका लागि ५३ जनाको उम्मेदवारी
वीरगंज । चैत २५ गते हुन लागेको नेपाल पत्रकार महासंघको प्रदेश २ को चुनावमा ५३ जना उम्मेदवारले विभिन्न पदका लागि मनोनयन दर्ता गराएका छन् ।
निवार्चन समितिले प्रकाशित गरेको उम्मेदवारको नामावली अनुसार २१ पदका लागि ५३ जनाले मनोनयन पत्र दर्ता गराएका हुन् । पहिलो पटक हुन लागेको प्रत्यक्ष निर्वाचन प्रणालीको फाइदा उठाउँदै एकै पदमा धेरै जना पत्रकारले उम्मेदवारी दिएका छन् ।
प्रदेश २ को अध्यक्ष पदका लागि जितेन्द्र प्रसाद सिंह, नवलकिशोर यादव र राजेश कुमार कर्ण गरी ३ जनाले उम्मेदवारी दिएका छन् । त्यस्तै, उपाध्यक्षमा बृजलाल पासवान, राजु विश्वकर्मा र रामनन्दप्रसाद गुप्ता गरी ३ जनाले मनोनयन दर्ता गराएका छन् ।
उपाध्यक्षमा उम्मेदवारी दिएका मध्येका बृजलाल पासवान वीरगंजका पत्रकार हुन् । यस अघि पासवानले पत्रकार महासंघकाे केन्द्रिय सदस्य (दलित) पदमा उम्मेदवारी दिएका थिए । तर साे पद प्रेस युनियनकाे भागमा परेपछि उनले आफ्नाे उम्मेदवारी फिर्ता लिएका थिए ।
महिला उपाध्यक्षका लागि ज्योति झा, नेहा झा, मालाकुमारी कर्ण र रेणु कुमारी चौधरी गरी ४ जनाले मनोनयन दर्ता गराएका छन् ।
महासचिवमा वीरगंज कै ३ जनाकाे उम्मेदवारी दर्ता
महासचिवमा अशोककुमार तिवारी, धु्रब साह र श्याम प्रसाद बञ्जारा गरी ३ जनाले उम्मेदवारी मनोनयन दर्ता गराएका छन् । तिनै जना वीरगंज कै पत्रकार हुन् ।
सचिवमा अजित कुमार सिंह (खुल्ला), आलोक पाण्डे (खुल्ला), उपेन्द्रप्रसाद यादव (समावेशी), कमलकुमार उपाध्याय (खुल्ला), जितलाल श्रेष्ठ (समावेशी) र भोला पासवान (समावेशी) ले मनोनयन दर्ता गराएका छन् ।
त्यस्तै, कोषाध्यक्षमा विश्वनाथ ठाकुर, मनोजकुमार मिश्र, रमेश सुवेदी र शैलेन्द्रकुमार महतो गरी ४ जनाले मनोनयन दर्ता गराएका छन् ।
५ जना खुल्ला सदस्यका लागि अजयकुमार साह, अनिलकुमार तिवारी, दीपकप्रसाद गौतम, नवीन सिंह, वैधनाथ चौधरी, मनोज तिमिल्सिना, महेश्वर अधिकारी, रमेश सिंह, ललनकुमार साह, शैलेन्द्र झा, सन्तोष कुमार सिंह र त्रिलोकीनाथ यादव गरी १२ जनाले उम्मेदवारी दिएका छन् ।
३ जना महिला सदस्यका लागि प्रतिभा झा, लक्ष्मी खरेल, सुधा देव, सपना ढकाल, सरिता चौधरी र वरुणा यादव गरी ६ जनाले उम्मेदवारी दर्ता गराएका छन् भने २ जना मधेसी सदस्यका लागि धनवीर महतो, नवीन मिश्र र सञ्जयकुमार राउत गरी ३ जनाले मनोनयन दर्ता गराएका छन् ।
त्यस्तै, २ जना आदिवासी जनजाति सदस्यका लागि उदयकुमार दास थारु, रोयाण्टर मण्डल र शंकर श्रेष्ठ गरी ३ जनाले आ–आफ्नो उम्मेदवारी दिएका छन् ।
१ जना दलित सदस्यका लागि कैलाश दास, वीरेन्द्र विश्वकर्मा र राम एकवाल महरा गरी ३ जनाले मनोनयन दर्ता गराएका छन् भने १ जना अल्पसंख्यक सदस्यका लागि ग्यासु मिया देवान, प्रभास चन्द्र कर्ण र हदिस खुद्दार गरी ३ जनाले मनोनयन दर्ता गराएको निर्वाचन संयोजक रामभरत साहले जानकारी दिए ।
निर्वाचन समितिले उम्मेदवार उपरको दाबी विरोधका लागि बिहीबार साँझ ६ बजेदेखि शुक्रबार अपराह्न साढे १२ बजेसम्मका लागि समय निर्धारण गरेको छ भने उम्मेदवारले शुक्रबार दिउँसो ४ बजेसम्म उम्मेदवारी फिर्ता लिनसक्ने जनाइएको छ ।
उम्मेदवारको अन्तिम नामावली प्रकाशन शुक्रबार साँझ ६ बजे गरिने निर्वाचन समितिले जनाएको छ ।
प्रेस युनियन, प्रेस संगठन लगायतका ११ संगठनहरुकाे मिलेर चुनाव लड्दै छन् भने प्रेस चाैतारी र प्रेस मंच मिलेर चुनाव लडिरहेकाे छ । तर दुबै तर्फ बागी उम्मेदवारहरु देखिएका छन् ।












