वीरगंज । पर्सा प्रहरीले प्रतिबन्धित लागूऔषध ट्रामाडोलको ठूलो परिमाणसहित एक मालवाहक ट्रक र चालकलाई नियन्त्रणमा लिएर अनुसन्धान अघि बढाएको छ ।
जिल्ला प्रहरी कार्यालय पर्साका अनुसार असार १ गते राति ११ः५६ बजे वीरगञ्ज महानगरपालिका–१४ स्थित गण्डकचोक सडकखण्डबाट राजस्व छली गरी विलबिजकभन्दा बढी औषधि तथा अन्य मालसामान ढुवानी भइरहेको सूचनाका आधारमा बा.प्र. ०३–००१ ख ३३४६ र ना.६ ख ५५०१ नम्बरका मालवाहक ट्रकलाई नियन्त्रणमा लिइएको थियो ।
प्रहरीले प्रारम्भिक अनुसन्धानपछि दुवै ट्रकलाई थप कारबाहीका लागि राजस्व अनुसन्धान कार्यालय पथलैया, बारामा बुझाएको थियो । राजस्व अनुसन्धान कार्यालयले असार ८ गते ट्रकहरूको चेकजाँच गर्दा बा.प्र. ०३–००१ ख ३३४६ नम्बरको ट्रकबाट प्रतिबन्धित लागूऔषध Tramadol Hydrochloride IP-50 (Tramol) बरामद गरेको हो ।
प्रहरीका अनुसार उक्त ट्रकबाट १२ हजार ६२ पत्तामा रहेका प्रति पत्ता १० ट्याब्लेटका दरले जम्मा १ लाख २० हजार ६ सय २० ट्याब्लेट बरामद भएको छ । बरामद लागूऔषधको अनुमानित मूल्य ९ लाख ८४ हजार २ सय ५९ रुपैयाँ रहेको छ ।
घटनामा संलग्न रहेको आरोपमा ट्रक चालक मकवानपुर जिल्लाको थाहा नगरपालिका–७ निवासी २३ वर्षीय सुशिल घलेलाई नियन्त्रणमा लिइएको छ । बरामद लागूऔषध, ट्रक तथा चालकलाई जिल्ला प्रहरी कार्यालय पर्सामा ल्याई लागूऔषध सम्बन्धी कसुरमा थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
